“Mbi Lingbi ti Wara Ngoi na Ndo Wa?”
1 So ayeke demango tele ti mingi ti azo na popo ti e, teti fini ti e asi singo na akusala. Mbeni zo atene so na popo ti amosoro ti e ngoi ayeke na ngele ngangu ahon, nga a yeke ye so aninga mingi pepe. Tongaso, e yeke wara ngoi na ndo wa teti aye so ayeke biani kota, tongana dikongo nga na mandango Mbeti ti Nzapa?
2 Kelele ni ayeke ti gi pepe ti wara ngoi mingi ahon, me ti soro ye so e yeke sala na ngoi so e yeke na ni. E kue e yeke na angbonga 168 na yâ yenga oko oko, na e yeke mu peut-être angbonga 100 ti lango nga ti sala na kua. Tongaso, tongana nyen e lingbi sala kusala na angbonga so angbâ ti wara ye ti nzoni ahon dä? A-Ephésien 5:15-17 awa e ti tambela ‘pepe tongana awabuba me tongana awandara, ti vo ngoi so alingbi teti e mveni . . . , ti ngbâ ti gbu nda ti ye so bê ti Jéhovah aye.’ A ye ti fa so e yeke na bezoin ti sala kusala kue na yâ alege oko oko kue so azi ti sala aye so Jéhovah aba so ayeke kota mingi.
3 Jésus ahaka la ni angoi ti e na ti Noé. (Luc 17:26, 27) Azo ti ngoi ni kâ abi tele ti ala mingi na akusala ti fini ti lâ oko oko. Ye oko, Noé awara ngoi ti leke mbeni kota arche na ti fa tene. (aHéb. 11:7; 2 Pi. 2:5) Tongana nyen lo wara ngoi ni? Na salango kozoni ye so bê ti Nzapa aye, na mango yanga ti lo nga na salango aye ‘gi tongaso.’—Gen 6:22.
4 Ye nyen alingbi ga kozoni? Jésus atene la ni: “Fade zo angbâ na fini gi na lege ti mapa pepe, me na lege ti tene kue so asigigi na yanga ti Nzapa.” (Mat 4:4) Yenga oko oko, e yeke wara mbeni ‘kobe [ti yingo] na ngoi ni so alingbi.’ (Luc 12:42) A hunda na e ti mu lakue peko ti mbeni kapa ti dikongo na ti mandango mbeti e mveni, ti tene e gbu nda ni kue mbilimbili si e lingbi wara nzoni dä biani. Ndali ti bê ti kiri singila teti kobe ti yingo, e yeke te ni ande na loro pepe, legeoko tongana mbeni zo alingbi ti te kobe gi na loro ti tene lo hon hio. Nde na so, tâ bê ti kiri singila apusu e ti mu ngoi ti manda na ti wara ngia na lege ti aye ti yingo.
5 Gbungo nda ti kobe ti yingo alingbi ti gue na fini ti lakue lakue. (Jean 17:3) A lingbi lo wara mbeni kozo ndo na yâ kapa ti e ti lâ oko oko. E lingbi wara mbeni ngoi ti zia lege na dikongo Bible lâ oko oko na lekengo tele teti abungbi ti Chrétien? Tâ tene, e lingbi. Tongaso, e yeke wara ande “kota futa” so ayeke ga na hingango nga na salango ye so bê ti Nzapa aye.—Ps. 19:7-11, NW (19:8-12, Bible ti Sango).