E Duti na Ngia ti Sala Beoko na Jéhovah nga na Molenge ti Lo
Matanga ti Kota Ahon, So Ayeke Sala Ande na Lango 28 ti Nze ti Mars
1 Matanga ti Kobe ti Seigneur ayeke duti ande na lango 28 ti nze ti mars 2002, na peko ti lindango ti lâ. Na salango matanga so, e yeke fa na gigi ngia ti e ti sala beoko na Jéhovah nga na Jésus Christ. A yeke duti ande mbeni kota lango, so na ndembe ni, tanga ti aChrétien so a sa yingo na ndo ti ala ayeke wara ngia ti “mû mbage” dä legeoko na ambeni héritier ti Royaume, na Jéhovah, nga na Molenge ti lo. (1 Jean 1:3; aEph. 1:11, 12) Fade “ambeni ngasangbaga” kutu mingi ayeke gbu li na ndo pendere lege so azi na ala ti sala beoko na Jéhovah nga na Molenge ti lo, ti duti na mara bê na bibe ti ala na yâ salango kusala ti Nzapa!—Jean 10:16.
2 Salango Kusala Ndo Oko na yâ Songo: Na angoi kue, Jéhovah na Jésus ayeke lakue na ngia ti duti beoko. Ala yeke na ngia ti duti na nzoni songo teti angu mingi kozoni si a créé zo. (Mi. 5:1) A sala si mbeni kota songo amaï na popo ti ala. Kozo Molenge ti Nzapa ayeke ndara lo mveni. Tongaso, kozoni ti ga na ndo sese, lo lingbi ti tene: “Mbi yeke na tele ti Lo [Jéhovah] tongana wakode. Lakue lo wara ngia na yâ mbi, mbi duti na ngia na gbele lo lakue.” (aProv. 8:30) Ndali ti so teti angoi mingi Jésus aduti na kota songo na Babâ ti lo so ayeke Lingu ti ndoye, a sala mbeni kota ye na ndo Jésus mveni!—1 Jean 4:8.
3 Jéhovah ahinga lani so a lingbi a ton azo. Lo hinga nga so Jésus, Molenge ti lo ngengele oko andoye azo mingi. Tongaso, lo soro lo ti mû sadaka ti kota ngele, sadaka so amû gi na e beku oko. (aProv. 8:31) Legeoko tongana ti so Jéhovah na Molenge ti lo aduti beoko ti sala gi ye oko, zia e ngbâ nga beoko na ala nga na popo ti e, na yâ songo ti kpengba ndoye, ti sala ye so bê ti Nzapa aye na ngia.
4 E Fa Bê ti Kiri Singila na Bê Kue: Ti gue na Mémorial, ti dengi mê nzoni na yekiango ndo, e lingbi ti fa na gigi tâ bê ti kiri singila teti ndoye ti Jéhovah, nga teti sadaka so Molenge ti lo amû teti e. Fade a yeke gboto lê ti e na ndo tapande ti ndoye ti Jésus, dutingo be-ta-zo ti lo juska na kui ti mû kota ngele, komandema ti lo tongana Gbia ti Royaume ti Nzapa so aleke gere ni awe, nga adeba nzoni so fade Royaume ni ayeke ga na ni na azo. Fade a da nga bê ti e so a lingbi e ngbâ lakue ti fa na gigi mabe ti e, ti sala na wâ ye so bê ti Jéhovah aye, tongana ‘afon lo na kusala ti tene-biani.’—3 Jean 8; Jacq. 2:17.
5 E Mû Maboko na Ambeni Zo ti Bungbi na E: Na yâ ti territoire, ambeni ita ayeke dä so ayeke fa tënë mbeni pëpe. A lingbi bungbi ti a-ancien asala ngangu kue ti wa aita tongaso ti ga na Dango bê na kui ti Christ. (Mat. 18:12, 13) Sû iri ti azo so mo ye ti tisa ala, si mo glisa mbeni pëpe.
6 Mo hinga ambeni zo nde so alingbi ti ga na Mémorial? Mû maboko na ala ti bâ ngoi so na nene ni. Tisa ala na wâ, nga na pekoni, fa na ala biani so a yeda biani na ala tongana ala ga. E hinga so a yeke duti ande mbeni kpengba ngoi na yâ ngu 2002 so. Tongaso, zia e sala ngangu kue ti tisa azo so e manda Bible na ala, azo so asala nzala ti tâ tënë, azo ti sewa ti e, nga azo so e hinga ala. Azo kue so amanda “ti hinga Christ Jésus” alingbi ti wara aye ti nzoni so aga na lege ti kota ngele. (aPhil. 3:8) Ala so afa mabe na gigi na yâ sadaka ti Christ alingbi ti wara kpengba beku ti fini ti lakue lakue.—Jean 3:16.
7 Bâ lâ oko pëpe tongana senge ye ngangu so Mémorial alingbi ti sala na ndo azo so ayeke na bê ti mbilimbili. A sala ngu use awe, mbeni ye asi na ndo zoa ti Papouasie-Nouvelle Guinée. Ambeni zo bale oko na ndo ni oko so asala nzala ti tâ tënë asua ngbonga 17 na lê ti ngu-ingo na yâ mbeni kete mangboko ti gue na Mémorial, atâa so angu ni ayengi mingi. Ngbanga ti nyen ala sala ngangu ti gue kâ? Ala tene: “E ye ti sala matanga ti Dango bê na kui ti Christ na awakua ti Jéhovah; tongaso, e yeke gue kâ gi senge pëpe, nda ni ayeke dä.” Gbu li na ndo wâ so azo so asala nzala ti tâ tënë afa na gigi! Bi bê nga bê ti kiri singila so ala yeke na ni ti duti na ngia ti sala beoko na Jéhovah, na Molenge ti lo, nga na bungbi ti aita Chrétien!
8 Tene na azo so asala nzala ti tâ tënë so lege ayeke dä ti manda Bible. Wa ala ti gue lakue na abungbi ti kongregation, nga ti fa na ambeni zo atâ tënë so ala yeke manda. Mû maboko na ala ti ‘tambela na yâ lumière’ na ti ‘sala ye alingbi na tâ tënë’ na batango akpengba-ndia ti Bible na yâ fini ti ala. (1 Jean 1:6, 7) Mû maboko na ala ti kpengba songo ti ala na Jéhovah, na ti ngbâ lakue ti kono bê ti kiri singila ti ala teti kota matabisi ti duti beoko na salango ye so bê ti lo aye.
9 Bâ tongana nyen dutingo na ngia “na yâ yingo oko, ti tiri na bê oko teti mabe ti tene-nzoni” ayeke biani mbeni pendere matabisi! (aPhil. 1:27, 28) Zia e ku ti wara ngia na tingbingo aita na ngoi ti Mémorial na lango 28 ti nze ti mars, na ti kiri singila mingi na Jéhovah nga na Molenge ti lo!—Luc 22:19.