Kiri singila na dango bê na ye so Nzapa amû ti zi na azo
1, 2. Ndali ti atënë wa a lingbi e kiri singila na Nzapa teti ye so lo mû ti zi na azo?
1 Na yengo dä na komandema ti Jésus, aChrétien na ndo ti sese kue ayeke bungbi na lakui ti samedi 22 mars 2008 ti dabe na kui ti Jésus Christ (Luc 22:19; 1 aCor. 11:23-26). Bê ti kiri singila ti e apusu e ti sara ni teti ye kue so asi a sara fadeso angu 1 975 awe. Na batango bê-biani ti lo na gbe ti pono juska lo kui na ndo ti keke ti pasi, Jésus asara si iri ti Baba ti lo aga nzoni kue; na sarango tongaso, lo mû tâ kiringo tënë na zonga ti Satan.—Job 1:11; aProv. 27:11.
2 Mênë ti Jésus so atuku amû ngangu na fini mbele, na azi lege na azo so ayeke mbilimbili-kue pëpe ti ga amolenge ti Nzapa na beku ti komande legeoko na Christ na yâ ti Royaume ti lo ti yayu (Jér. 31:31-34; Marc 14:24). Na ndo ni, kota ndoye ti Nzapa na mbage ti azo asigigi polele na mungo Molenge ti lo so lo ndoye mingi na sandaga, tongana ti so Jésus lo mveni lo sara tënë ni na Nicodème.—Jean 3:16.
3. Tongana nyen ala so aga na Dango bê na kui ti Seigneur ayeke wara ande ye ti nzoni?
3 Tisa azo: Kusala ti Royaume ti janvier ahunda ti sû na mbeti iri ti azo so e hinga ala na ti tisa ala. Mo to nda ti tisa ala awe? Mo leke tere ti mo awe ti mû mbage mingi na yâ ti kapa ti tisango azo na Dango bê na kui ti Seigneur so ayeke to nda ni na lango 1 ti mars? Ala so ayeke ga na lango ni so ayeke mä ande tënë ti Nzapa so ayeke kpengba mabe ti zo na yâ ti ye so a mû ti zi zo, so na pekoni ague na lo na fini ti lakue lakue.—aRom. 10:17.
4. Ngbanga ti nyen ayeke nzoni ti ga hio na lango ti Dango bê na kui ti Seigneur?
4 A yeke nzoni azo kue so ayeke na ngangu aga hio ti yamba na ngia azo so ayeda na kota tisango ndo so. Teti so wungo ti azo ayeke ka mingi na lango ti Dango bê na kui ti Seigneur, a lingbi e bi bê mingi na afini zo nga na ala so ayeke ga ngoi na ngoi na abungbi.
5. Tongana nyen mo lingbi ti leke bê ti mo teti lango so?
5 Leke bê ti mo: Na yâ ti brochure Gingo nda ti Tënë ti Nzapa lâ oko oko—2008 nga na Calendrier ti ngu 2008, a zia na yâ ni teti Dango bê na kui ti Seigneur kapa ti dikongo Bible so ato nda ni na lango 17 ti mars. Bango na nene ni aye so asi na andangba lango ti fini ti Jésus na sese ayeke pusu ande mo ti leke bê ti mo ti dabe na kui ti lo. Na gbungo li na yâ ti sambela na ndo ti aye so Bible afa na ndo ni ayeke kono bê ti kiri singila ti mo teti ndoye ti Jéhovah na Molenge ti lo so amû ye ti zi na azo.—Ps. 143:5.
6. Ye ti nzoni wa e yeke wara tongana e sara ngangu ti kono bê ti kiri singila ti e teti ye so Nzapa amû ti zi na azo?
6 Teti so Dango bê na kui ti Seigneur aga nduru, zia e leke tere ti e nzoni na e mû maboko na azo ti leke tere ti ala teti kota lango so. Ti kiri singila na Nzapa na dango bê na ye so lo mû ti zi na azo ayeke kpengba ande songo ti e na Jéhovah nga na Molenge ti lo (2 aCor. 5:14, 15). A yeke pusu ande e nga ti duti na ndoye ti gbanzi ye na tere ti e ndali ti amba ti e.—1 Jean 4:11.