Zia e sara kue ti fa so e kiri singila
A yeke sara ande Mémorial na lango 17 ti avril
1. Tënë wa ti wasungo psaume alingbi tâ na ngoi ti Mémorial?
1 Ti fa singila ti lo ndali ti aye so Jéhovah asara ti fa be-nzoni na lo nga so Jéhovah asö lo, wasungo psaume so ahunda tënë atene: “Fade mbi mû nyen na L’Éternel teti ye kue ti nzoni so Lo sara na mbi?” (Ps. 116:12). Laso, awakua ti Jéhovah ayeke na araison mingi ti kiri singila na lo. Angu ngbangbo mingi na pekoni so a sû atënë ti psaume so, Jéhovah amû na azo matabisi ti lo so ayeke kota ahon atanga ni kue: ngere so a futa ti zi na azo. So e yeke leke tere ti e ndali ti Matanga ti Dango Bê na kuâ ti Christ na lango 17 ti avril, e yeke na nzoni nda ti tënë ti fa singila ti e.—aCol. 3:15.
2. Ndali ti aye wa e yeke fa singila ti e teti ngere so a futa ti zi na azo?
2 Aye ti nzoni so e wara na lege ti ngere so a futa ti zi na azo: Na lege ti ngere so a futa ti zi na azo, e lingbi ti wara ‘pardon ti asiokpari ti e.’ (aCol. 1:13, 14). Ye so amû maboko na e ti voro Jéhovah na nzoni yingo-ti-hinga (aHéb. 9:13, 14). E lingbi ti sara tënë polele na Jéhovah tongana e yeke sambela lo (aHéb. 4:14-16). Ala so amä na bê na ngere so a futa ti zi na azo ayeke na pendere beku ti wara fini ti lakue lakue!—Jean 3:16.
3. Tongana nyen e lingbi ti fa singila ti e na Jéhovah teti ngere so a futa ti zi na azo?
3 E yeke fa singila ti e tongana nyen: Mbeni lege ti fa kota singila ti e ayeke ti diko lâ oko oko aversê ti Bible so andu Mémorial na ti gbu li na ndo ni. A leke article ti Tour ti Ba Ndo ti 1 février 2011 na Français, so li ti tënë ni ayeke “Êtes-vous prêt pour le jour le plus important de l’année?” ti mû maboko na e na lege so. E lingbi nga ti sambela Jéhovah na bê kue ti fa na lo so e bâ ngere so a futa ti zi na azo na nene ni mingi (1 aThes. 5:17, 18). Ti ga na Mémorial a lingbi na yanga so Jésus amû afa singila ti e (1 aCor. 11:24, 25). Na ndo ni, e lingbi ti mû tapande ti kota ndoye ti Jéhovah na tisango azo na alege kue so azi ti ga na matanga ni.—És. 55:1-3.
4. A yeke nzoni e leke na bê ti e ti sara nyen?
4 Awakua ti Jéhovah so ayeke na bê ti kiri singila ayeke bâ Mémorial gi tongana tanga ti abungbi kue pëpe. A yeke bungbi so ayeke kota ahon atanga ni kue na yâ ti ngu ni. So Mémorial ayeke ga nduru, a yeke nzoni e leke na bê ti e ti tene oko tënë so wasungo psaume so atene: “O âme ti mbi, sara tënë nzoni na L’Éternel, na mo girisa pëpe ye ti nzoni ti Lo kue.”—Ps. 103:2.