Mû maboko na azo ti wara nzoni na lege ti ye so a mû ti zi na e
Dango bê na kui ti Christ so a yeke sara ni na lango 12 ti avril
1. Mbeni lege so azo ti Nzapa ayeke fa bê ti kiri singila ti ala teti ye so a mû ti zi na e ayeke so wa?
1 Bible atene: “Merci na Nzapa teti Matabisi ti Lo so zo alingbi fa nda ni kue pëpe!” (2 aCor. 9:15). Atënë so afa nzoni mingi atënë ti bê ti e na ndo nzoye nga na nzobe ti Nzapa so zo alingbi na ni pëpe, so lo fa na mbage ti azo ti lo na lege ti molenge ti lo Jésus Christ. E yeke fa bê ti kiri singila so na gigi mbilimbili na ngoi so e yeke bungbi oko na amba ti e na lango 12 ti avril ti sara Dango bê na kui ti Christ.
2. Azo wa la legeoko na awakua ti Jéhovah ayeke ga na Mémorial? Ye wa a lingbi ala sara ti wara nzoni na lege ti ye so a mû ti zi na e?
2 Legeoko na awakua ti Jéhovah, azo kutu bale-oko tongaso ayeke ga ngu oko oko na Mémorial. Na sarango tongaso, ala fa so ala bâ sandaga ti Jésus tongana senge ye pëpe. Ye oko, ti wara nzoni na lege ti ye so a mû ti zi na e, a lingbi azo so afa so ala yeke na mabe na ni (Jean 3:16, 36). Tongana nyen si e lingbi ti mû maboko na ala ti wara mabe so? Na ngoi ti Mémorial so, e lingbi ti wa ala ti manda Bible na ti ga na abungbi ti kongregation. Zia e bâ awango so ge.
3. Tongana nyen e lingbi ti to nda ti manda Bible na azo na ngoi so e yeke tisa ala ti ga na Mémorial?
3 A-étude ti Bible: Tongana mo tisa azo so asara nzara ti tënë ni ti ga na Mémorial, ngbanga ti nyen pëpe ti to nda ti manda Bible na ala na yâ ti buku Bible afa? Ti fa na zo ni tënë na ndo ti Mémorial, zi na lembeti 206-208 na bâ li ti tënë “Kobe ti Seigneur: mbeni matanga so amû gonda na Nzapa” ti fa na wamandango ye ni nda ti Mémorial. Mo lingbi ti sara ni na ngoi ti mbeni vizite oko wala use, peut-être tongana mbeni étude so a yeke sara ni gi na lutingo na nduzu. Tongana mo hunzi mbage so awe, zo ni alingbi peut-être ti yeda ti sara lisoro na ndo chapitre 5 so ayeke “Ye so Nzapa amû ti zi na e: tâ kota matabisi so ahon atanga ni kue.” Tongana mo to nda ti manda Bible nzoni na zo ni awe, kiri na tongo nda ti buku ni ti manda akozo chapitre osio ni na lo.
4. Azo wa la e lingbi ti to nda ti manda Bible na ala na ngoi ti Mémorial?
4 Azo wa la e lingbi ti sara kusala na wango so ti to nda ti manda Bible na ala? Peut-être ambeni mba ti e ti place ti kua, akamarade ti e ti ekole wala azo so alango nduru na tere ti dä ti e alingbi ti yeda ti sara lisoro na e. A yeke duti nzoni ti tene aita-koli aga nduru na akoli ti aita-wali so ayeke aTémoin pëpe. A lingbi e girisa nga pëpe afami ti e so ayeke aTémoin pëpe. Na ndo ni, e lingbi nga ti sara kue ti tisa azo so azia ti ga na abungbi ti kongregation wala ti fa tënë ti ga na Mémorial (Luc 15:3-7). Zia e gi alege kue ti mû maboko na mara ti azo tongaso ti wara nzoni na lege ti ye so a mû ti zi na e.
5. Tongana nyen e lingbi ti wa awamandango Bible nga na azo so asara nzara ti tënë ni ti ga na abungbi yenga na yenga?
5 Abungbi ti kongregation: Kozo bungbi so mingi ti awamandango Bible nga na azo so asara nzara ti tënë ni ayeke ga dä ayeke Mémorial. Tongaso, tongana nyen si e lingbi ti wa ala ti wara nzoni na lege ti tanga ti abungbi ti kongregation? Kusala ti Royaume ti avril 2005, na lembeti 8 amû wango so: “Fa na ala kota li ti tënë ti diskur ti so ayeke ga. Fa na ala article ti Tour ti Ba Ndo so fade a yeke manda ni nga na buku so a yeke manda ni na Bungbi ti Mandango Buku. Fa na ala tongana nyen Ekole ti Kusala ti aChrétien nga na Bungbi ti Kusala ayeke tambela. Tongana mo yeke na mbeni devoir ti sara ni na bungbi ti ekole, peut-être mo lingbi ti manda ni na gbele ala. Fa na ala akota tënë so a fa ni na abungbi so ahon. Sara kusala na afoto so ayeke na yâ ti abuku ti e ti mû maboko na ala ti bâ aye so e yeke sara na abungbi. Gi na kozo sarango étude ti Bible na ala, tisa ala ti ga na abungbi.”
6. Na alege use wa e lingbi ti mû maboko na azo ti nzoni bê ti wara ye ti nzoni na lege ti ye so a mû ti zi na e?
6 Tongana azo ti nzoni bê ayeke manda Bible na ayeke ga na bungbi lakue lakue, mingi ni ala yeke gue na li ni hio na lege yingo. Tongaso, zia e wa amba ti e ti wara nzoni na lege ti aye so, so a leke ti mû maboko na zo na lege ti yingo nga tâ kota matabisi so Nzapa amû ti zi na e.