“Ala ngbâ ti sara ye so”: A yeke sara ande Mémorial na lango 5 ti avril
1. Ngbanga ti nyen sarango Mémorial ayeke kota ye?
1 “Ala ngbâ ti sara ye so ti dabe ti ala na mbi.” (Luc 22:19). Na lege ti atënë so, Jésus ahunda na adisciple ti lo ti ngbâ ti sara matanga ti fini ti lo so lo mû na sandaga. Ndali ti aye so sandaga ti Jésus aga na ni, na lê ti aChrétien mbeni kota lango ti hon lango ti Mémorial so a yeke sara ka ni ngu oko oko ayeke dä pëpe. So lango 5 ti avril, lango so na ngu so ayeke sara matanga ni, ayeke pusu nduru, e lingbi ti fa tongana nyen so e kiri singila na Jéhovah?—aCol. 3:15.
2. Tongana nyen na lege ti mandango ye nga na gbungo li e lingbi ti fa so Mémorial ayeke kota ye na lê ti e?
2 Leke tere: E yeke leke ka tere ti e ndali ti aye so e bâ ayeke kota ye. Na yâ ti sewa, e lingbi ti leke bê ti e teti Mémorial na bango aye so asi na andangba lango ti Jésus na ndo ti sese ge nga na gbungo li na ndo ni (Esdras 7:10). Mbeni mbage ti aversê ni ayeke na yâ ti calendrier nga na yâ ti brochure Gingo nda ti Tënë ti Nzapa lâ oko oko, me e yeke wara aversê ni kue so alingbi na achapitre ti buku Koli so ahon tanga ti azo kue, na yâ ti Tour ti Ba Ndo ti lango oko ti février 2011 na Français, lembeti 23-24.
3. Tongana nyen e lingbi ti kono yâ ti kua ti e ti fango tënë ti fa so Mémorial ayeke kota ye na lê ti e?
3 Fa tënë: E lingbi ti fa nga so Mémorial ayeke kota ye na lê ti e na mungo ngoi ti e mingi na kua ti fango tënë (Luc 6:45). Mbeni kota kapa ti tisango azo na Mémorial ayeke to nda ni ande na ndo ti sese kue na samedi lango 17 ti mars. Mo lingbi ti leke yâ ti kapa ti mo ti mû ngoi mingi ti fa tënë, peut-être tongana pionnier auxiliaire? A yeke nzoni ti peko ala sara lisoro na ndo ni na sewa na ngoi ti vorongo Nzapa na yâ ti sewa.
4. Aye ti nzoni wa e lingbi ti wara na guengo na Mémorial?
4 So ye ti nzoni si e yeke wara ka na guengo na Mémorial ngu oko oko! Ngia ti e nga na ndoye ti e na mbage ti Nzapa akiri akono na ngoi so e yeke gbu li na ndo ti nzoni so Jéhovah asara ti mû oko Molenge ti lo tongana sandaga (Jean 3:16; 1 Jean 4:9, 10). Ye so apusu e ti ngbâ na fini ndali ti e wani mbeni pëpe (2 aCor. 5:14, 15). A yeke sara nga si e yeke duti na nzara mingi ti gonda Jéhovah na lê ti azo (Ps. 102:19-21). Biani, awakua ti Jéhovah so ayeke na bê ti kiri singila ayeke ku kungo lege so ayeke zi ande na e na lango 5 ti avril so ayeke lango ti Mémorial ti “fa tënë ti kuâ ti Seigneur”.—1 aCor. 11:26.