Leke tere teti Mémorial na ngia na bê
1. Ngoi ti Mémorial ayeke mbeni ngoi so ayeke nde ti sara nyen?
1 Mémorial so ayeke duti ande na mardi lango 26 ti mars, a yeke mû na e mbeni kota pasa ti wara ngia na yâ ti ye so Nzapa aleke ti mû na e salut (És. 61:10). Biani, kozo na matanga so, mbeni bibe so ayeke na ngia ayeke pusu e ti leke tere ti e nzoni. Tongana nyen la e lingbi ti leke tere ti e nzoni?
2. Nyen la ayeke pusu e ti leke tere teti Mémorial?
2 Leke tere teti matanga ni: Matanga ti Dango Bê na kuâ ti Jésus ayeke kota mingi ahon mbeni senge matanga. Ye oko, a hunda ti leke aye kozoni si bê ti e agirisa anzene nzene ye pëpe (aProv. 21:5). A lingbi a soro ngoi nga na mbeni nzoni ndo teti matanga ni. A lingbi a wara mapa na vin so ayeke nzoni. A lingbi a sukula ndo ti bungbi ni nga a leke ni. A yeke nzoni ti tene wamungo diskur ni aleke tere ti lo na lege ni, nga alingbi a mû awango so ayeke polele na aita ti accueil nga na aita so ayeke kangbi mapa na vin. Kite ayeke dä pëpe so a sara awe mingi ti aye so e londo ti fa ni ge. Bê ti kiri singila ndali ti ngangu so sandaga ti Jésus ayeke na ni ti sö fini ti e ayeke pusu e ti leke tere nzoni teti kota lango so.—1 Pi. 1:8, 9.
3. Tongana nyen e lingbi ti leke bê ti e ndali ti Matanga ti Dango Bê na kuâ ti Jésus?
3 Leke bê ti mo: A yeke nga nzoni ti leke bê ti e ti gbu nda ti atënë kue na ndo ti Mémorial ni (Esdras 7:10). Ti hunzi na ni, a lingbi e mû ngoi ti diko aversê so a zia ni nde teti Mémorial nga ti gbu li na ndo ti ndangba lango ti fini ti Jésus na sese. Ti gbu li nga na ndo ti bibe ti gbanzingo ye na tere so Jésus afa ni, ayeke pusu e ti mû tapande ti lo.—aGal. 2:20.
4. Na popo ti aye ti nzoni so sandaga ti Jésus aga na ni, so wa la amû ngia na mo mingi?
4 Kuâ ti Jésus afa so yanga-ti-komande ti Jéhovah ayeke mbilimbili. A zi e na gbe ti ngbâa ti siokpari na kuâ (1 Jean 2:2). A zi lege na e ti duti na siriri na Nzapa nga ti wara fini ti lakue lakue (aCol. 1:21, 22). A yeke mû nga maboko na e ti wara ngangu ti ngbâ ti sara kusala ti Jéhovah nga ti kpengba tongana adisciple ti Christ (Mat. 16:24). Zia si mo duti na ngia mingi na ngoi so mo yeke leke tere ti gue na Mémorial!