E kiri singila na Nzapa teti kota matabisi ti lo
1. Ngbanga ti nyen a lingbi e kiri singila mingi na Jéhovah?
1 Na popo ti ‘anzoni matabisi’ kue ti Jéhovah, ti so ayeke kota mingi ayeke ngere so lo futa ti zi azo na lege ti Molenge ti lo so lo ye lo mingi (Jacq. 1:17). A zi lege na aye ti nzoni mingi, so na popo ni pardon ti asiokpari ti e ayeke dä (aÉph. 1:7). Ndani la e yeke kiri singila lakue. Na ngoi ti Mémorial, e yeke mû ngoi ti gbu li na ndo ti matabisi ti ngere ngangu so.
2. E na sewa ti e e yeke fa tongana nyen so e kiri singila teti ngere so a futa ti zi azo?
2 Bâ ngoi so na nene ni: Ti tene mo sara si sewa ti mo abâ ngoi so na nene ni, na ayenga so aga kozoni na lango 30 ti mars so a yeke sara na Mémorial ni, mû mbeni ngoi na lango ti Mandango tënë ti Nzapa na sewa ti kiri ti bâ atënë na ndo ti ngere so a futa ti zi azo. Nga lâ oko oko ala diko na sewa aversê ti Bible so andu Mémorial. Gbu li ti mo na ndo ti lege so ngere so a futa ti zi azo asara nzoni na mo na achangé bango ndo ti mo na ndo ti Jéhovah, na ndo ti mo wani, amba ti mo nga na ndo ti gigi ti kekereke. Fade mo yeke bâ nga so a yeke nzoni ti manda ti he afini bia use so a yeke he ande na Mémorial, bia 8 na 109, tongana fini mbeti ti bia ni ayeke na congrégation ti mo awe.—Ps. 77:13.
3. E lingbi ti fa singila ti e tongana nyen?
3 Alege ti fa singila ti mo: Bango na nene ni ngere so a futa ti zi azo ayeke pusu e ti fa na azo tënë ti Jéhovah na ti kota ndoye ti lo na tokuango Molenge ti lo (Ps. 145:2-7). Na mars, avril nga na mai, ambeni sewa ayeke fa singila ti ala na lekengo ti tene mbeni oko ti ala amû kua ti pionnier auxiliaire. Tongana lege ayeke dä pëpe, mo lingbi ti ‘sara kusala nzoni na ngoi’ ti mo na sigingo mingi na fango tënë? (aÉph. 5:16). Fade singila so ayeke na bê ti e ayeke pusu nga e ti mû maboko na azo ti gue legeoko na e na Mémorial (Apoc. 22:17). Sû na mbeti iri ti avizite ti mo, azo so mo manda Bible na ala, afami, azo so mo na ala asara kua place oko nga na avoizin so mo ye ti tisa ala, na pekoni mû mbage ti mo mingi na kapa ti kangbingo mbeti ti tisango ndo na Mémorial.
4. Na lege wa e lingbi ti sara kusala na ngoi ti Mémorial na ndara?
4 Ngoi ti Mémorial azi na e fini lege ti fa na Jéhovah so e bâ na nene ni mingi matabisi so lo mû na azo. Zia e mû ngoi so ti maï na ti fa singila ti e teti ngere so a futa ti zi e nga teti “amosoro ti Christ so zo alingbi ti gbu nda ni kue pëpe”.—aÉph. 3:8.