Mémorial so ayeke ga ayeke mû lege na e ti fa singila ti bê ti e

1. Kota pasa wa la ayeke zi na e na ngoi ti Mémorial so?

¹ Na Mémorial so e yeke sara ni na lango 14 ti nze ti avril, kota pasa ayeke zi na e ti fa singila ti bê ti e ndali ti nzoni bê ti Jéhovah na mbage ti e. Mbaï so ayeke na Luc 17:​11-​18 afa bango ndo ti Jéhovah nga na ti Jésus na ndo ti kiringo singila. Na popo ti azo ti buruma bale-oko so Jésus asava ala gi oko la aga atene merci. Na yâ ti angoi so ayeke ga, sandaga ti Jésus ayeke sara si mara ti akobela kue ayeke hunzi, nga ayeke sara si e wara fini ti lakue lakue! Kite ayeke pëpe so, e yeke kiri ande singila na Jéhovah lâ oko oko ndali ti aye ti nzoni so. Me tongana nyen e lingbi ti fa singila ti e na yâ ti ayenga so ayeke ga?

2. Tongana nyen e lingbi ti kiri singila ndali ti ngere so Jésus afuta ti zi na e?

² Duti na nzara ti kiri singila: Ye so e yeke pensé na ndo ni la ayeke sara si e ye ti kiri singila. Ti mû maboko na e ti kiri singila ndali ti ngere so Jésus afuta ti zi e, a leke mbeni kapa ti dikongo Bible ti Mémorial so e lingbi ti wara ni na tapande na yâ ti Calendrier, nga na yâ ti brochure Gingo nda ti Tënë ti Nzapa lâ oko oko. E lingbi ti diko ni legeoko na sewa. Tongana e sara tongaso, a yeke sara si e yeke kiri singila mingi ndali ti ngere so Jésus afuta ti zi na azo. Ye so alingbi ti pusu e ti duti na nzoni sarango ye.​—2 aCor. 5:14, 15; 1 Jean 4:11.

3. Na alege wa e lingbi ti fa singila ti bê ti e na ngoi ti Mémorial?

³ Fa singila ti bê ti mo: Mbeni zo ayeke fa singila ti bê ti lo na lege ti sarango ye ti lo (aCol. 3:15). Zo ti buruma so asara kue ti wara Jésus na ti kiri singila na lo. Kite ayeke dä pëpe so, na nzerengo tere lo sara nga tënë ti zingo kobela ti lo so na ambeni zo (Luc 6:45). Bê ti kiri singila ndali ti sandaga ti Jésus ayeke pusu ande e ti mû mbage mingi na kapa ti tisango azo na Mémorial? Ti mû kua ti pionnier auxiliaire wala ti fa tënë mingi na ngoi ti Mémorial so ayeke nga mbeni nzoni lege so e yeke fa singila ti bê ti e. Na lakui ti Mémorial ni, e yeke fa nga singila ti bê ti e na yambango azo so aga, nga na dutingo nduru ti kiri tënë na ahundango ndo ti ala.

4. Nyen la e lingbi ti sara ti tene Mémorial so aduti mbeni ngoi so e lingbi ti girisa ni ape?

⁴ Tanga ti Mémorial la e yeke sara ande so? (1 aCor. 11:​26). E hinga ape. Me tongana a yeke tanga ni la, andâ kota pasa la ayeke zi na e na ngoi ni so ti fa singila ti bê ti e ndali ti sandaga ti Jésus. Mo yeke zia si pasa ni so ahon mo? Zia si atënë ti yanga ti e nga na atënë so e gbu li ti e dä amû ngia na Jéhovah, Nzapa so amû ye mingi, na lege so lo mû Jésus tongana ngere so afuta ti zi na e.​—Ps. 19:15.