E kangbi mbeti ti tisango ndo na Mémorial na ndo ti sese kue!
1. Kota kapa ti tisango ndo wa a leke ti sara na ndo ti sese kue kozoni na Mémorial?
1 “Ala ngbâ ti sara ye so ti dabe ti ala na mbi.” (Luc 22:19). Ti sara ye ague oko na commandement ti Jésus so, awavorongo Jéhovah ayeke bungbi ande legeoko na ambeni zo so ayeda na tisango ndo ni na lango 30 ti mars ti ngu 2010, ti dabe ti ala na kuâ ti Jésus. Fade a yeke sara mbeni kota kapa ti tisango azo na Mémorial na ndo ti sese kue alondo na lango 13 asi na lango 30 ti nze ti mars.
2. Tongana nyen e lingbi ti mû mbeti ti tisango ndo ni na mbeni zo?
2 Lege ti sara ni: Mo lingbi ti mû mbeti ni na zo ni na mbeni lege so lo lingbi ti bâ limon so ayeke na ndo ni, na pekoni mo tene: “Na lango 30 ti nze ti mars na lakui, azo kutu mingi na ndo ti sese kue ayeke bungbi ti dabe ti ala na kuâ ti Jésus. Mbi ga ti mû na mo nga na sewa ti mo mbeti ti tisango ndo so ti tene ala ga na bungbi ni. Akamarade ti mo nga alingbi ti ga. L’heure ni na ndo ni la a fa ge so.” Tongana lege ayeke dä, mo lingbi ti diko na lo Luc 22:19 na yâ ti Bible ti fa na lo versê so ahunda na e ti sara ni, na mo fa na lo ngoi nga na ndo so a yeke sara bungbi ni dä. Me, girisa pëpe, teti so e yeke na ngoi mingi pëpe ti sara territoire ni kue, a yeke nzoni ti sara tënë nduru.
3. Zo wa la e lingbi ti tisa lo?
3 Tongana congrégation ti mo ayeke na kota territoire, a-ancien alingbi ti tene na mo so tongana mo si ti kozoni na mbeni yanga-da si zo ayeke dä pëpe, mo lingbi ti zia mbeti ti tisango ndo ni senge. Tongana lege azi na mo, zia apériodique na tere ti mbeti ti tisango ndo ni. Girisa pëpe ti tisa avizite ti mo, azo so mo manda Bible na ala, amba ti mo ti place ti kua wala ti ekole, asewa ti mo, avoizin na ambeni zo so mo hinga ala.
4. Bango na nene ni ndoye so Jéhovah afa na mungo Molenge ti lo na sandaga ayeke pusu e ti sara nyen?
4 Leke tere ti mo ti mû mbage dä mingi: Ngoi ti Mémorial ayeke mbeni nzoni ngoi mingi ti kono yâ ti kusala ti e. Mo lingbi ti leke yâ ti kapa ti akusala ti mo ti mû kua ti pionnier auxiliaire? Ambeni molenge ti mo wala ambeni zo so mo yeke manda Bible na ala ayeke dä so ayeke maï na lege ti yingo nzoni? Tongana a yeke tongaso, pusu nduru na a-ancien ti bâ wala ala lingbi ti ga awafango tënë so ade ti wara batême pëpe na tongaso ala mû mbage ti ala na kota kapa so. Bango na nene ni ndoye so Jéhovah afa na mungo Molenge ti lo na sandaga ayeke pusu e gi pëpe ti ga na Mémorial ni, me nga ti tisa azo mingi ti bungbi na e.—Jean 3:16.