Kangbingo ambeti ti tisango ndo na Mémorial ayeke to nda ni na lango 2 ti avril
1. E yeke kangbi ambeti ti tisango ndo na Mémorial ti ngu so lawa? Nda ti kapa ti kangbingo mbeti ti tisango ndo so e yeke sara ni ngu oko oko so ayeke nyen?
1 Ti londo na lango 2 ti avril ti si na lango 17 ti avril, e yeke kangbi ande ambeti ti tisango ndo na kota matanga ti yâ ti ngu ni: Matanga ti Dango Bê na kuâ ti Christ. Na ngu so ahon, azo mingi so asara nzara ti tâ tënë ayeda na tisango ndo so e yeke sara ni ngu oko oko. Na tapande, na lango ti Mémorial ni, mbeni wali airi ndo na filiale ti kodoro so lo yeke dä lo tene: “Kiringo ti mbi na yanga-da la, mbi wara mbeni mbeti ti tisango ndo na gbe ti porte ti mbi. Mbi ye ti gue, me mbi hinga l’heure ni nzoni pëpe.” Ita koli so asara tënë na lo na téléphone afa na lo place so lo lingbi ti bâ l’heure ni dä na ndo ti mbeti ti tisango ndo ni. Ti hunzi na atënë ti lo wali ni atene, “Mbi yeke gue ande na matanga ti ala ni na lakui so!”
2. E lingbi ti tene nyen na ngoi so e yeke fa mbeti ti tisango ndo ni?
2 E yeke sara ni tongana nyen: Teti so e yeke gi na kete ngoi ti sara territoire ni kue, a yeke nzoni ti sara tënë gi nduru. E lingbi ti tene: “Bara mo. E ye ti mû na mo na sewa ti mo mbeti ti tisango ndo na mbeni kpengba matanga so a yeke sara ngu oko oko so a yeke sara ande na ndo ti sese kue na dimanche lango 17 ti avril. [Mû mbeti ti tisango ndo ni na zo ni.] Lango ni so ayeke lango ti Matanga ti Dango Bê na kuâ ti Jésus. A yeke mû ande mbeni diskur so a yeke futa ni pëpe ti fa tongana nyen so e lingbi ti bâ nzoni na lege ti sandaga ti Christ. Mbeti so afa ndo nga na l’heure so a yeke sara bungbi ni dä na yâ ti vaka ti e ge.”
3. Nyen la e lingbi ti sara ti tisa azo mingi?
3 Tongana territoire ti congrégation ti ala akono mingi, a-ancien alingbi ti hunda na ala ti zia ambeti ti tisango ndo ni na ayanga-da so azo ni ayeke dä pëpe me gi na mbeni place so azo so ayeke hon hongo na lege alingbi ti bâ ni pëpe. Girisa pëpe ti tisa avizite ti mo, afami ti mo, azo ti place ti kua ti mo, akamarade ti mo ti ekole, nga na ambeni zo so mo na ala ahinga tere. Na ngoi so ala yeke kangbi ambeti ti tisango ndo na samedi wala na dimanche, tongana lege ayeke dä ala lingbi ti zia apériodique na azo. Mo lingbi ti mû kua ti pionnier auxiliaire na nze ti avril tongaso si mo fa tënë mingi na ngoi ti pendere kapa ti kangbingo ambeti ti tisango ndo so?
4. Ngbanga ti nyen la e ye ti tene azo so asara nzara ti tâ tënë aga na Mémorial?
4 So tâ kpengba tënë ti témoin si azo so asara nzara ti tâ tënë nga so ayeke ga ande na Matanga so ayeke wara! Ala yeke mä ande tënë na ndo ti kota ndoye so apusu Jéhovah ti mû ngere so a futa ti zi na azo (Jean 3:16). Ala yeke mä ande tënë na ndo ti aye ti nzoni so Royaume ti Nzapa ayeke ga na ni na azo (És 65:21-23). Fade a yeke hunda nga na ala ti ga nduru na tere ti aita so ayeke yamba azo ti hunda ti tene a manda Bible na ala si ala hinga ambeni ye mingi na ndo ni. Sambela ti e ayeke ti tene mingi ti azo so asara nzara ti tâ tënë ayeda ande na tisango ndo so ti ga ti sara Mémorial legeoko na e.