Kapa ti tisango azo na Mémorial ayeke to nda ni na lango 1 ti mars
1. Kapa ti tisango azo na Mémorial ayeke to nda ni lawa, na ngbanga ti nyen ti ngu so ayo kete?
1 Kapa ti tisango azo ngu oko oko na Mémorial ti ga ti bungbi oko na e, a yeke to nda ni ande na vendredi lango 1 ti mars. A yeke sara ande Mémorial na lango 26 ti mars, so aye ti tene so kapa ni ayeke yo kete ahon ti angu so ahon. A yeke mû lege na congrégation so territoire ni akono mingi ti kangbi mbeti ti tisango ndo na azo mingi.
2. Aye wa a leke ni ti tene e wara ambeti ti tisango ndo nga ti sara kua na territoire?
2 E leke tere ti e: A-ancien ayeke fa ande tongana nyen ti sara kua na territoire nga ti bâ wala a lingbi a zia ambeti ti tisango ndo ni na ayanga-da so azo ayeke dä pëpe. Tongana mo hunzi ti sara da na da si tanga ti ambeti ti tisango ndo ni angbâ, mo lingbi ti kangbi tanga ni na alege wala na ando so azo ayeke dä. Surveillant ti kusala ayeke bâ ande ti tene a zia ambeti ti tisango ndo ni na ndo so a yeke kangbi mbeti wala périodique dä ti tene awafango tënë ague amû ni, me a yeke sigigi pëpe na ambeti ti tisango ndo ni kue gi legeoko. A lingbi e mû gi wungo ni so a lingbi na bezoin ti e teti yenga oko.
3. Nyen la a lingbi e bata na li ti e na ngoi so e yeke kangbi mbeti ti tisango ndo?
3 Tënë so e lingbi ti tene: A yeke nzoni ti sara tënë gi nduru, tongaso si e lingbi ti tisa azo mingi. A yeke wara na lembeti 4 mbeni kode ti ziango na mbeti ti tisango ndo ni so e lingbi ti gbian yâ ni ti lingbi na territoire ti e. Ti tâ tënë ni, tongana zo ni ayamba e nzoni wala tongana lo yeke na ambeni hundango tënë, e yeke sara ye na loro pëpe ti hon. Na ngoi so e yeke kangbi ambeti ti tisango ndo na samedi wala na dimanche, tongana lege ayeke dä e lingbi ti zia nga apériodique na azo. Na lango 2 ti mars, e yeke kangbi gi ambeti ti tisango ndo ahon ti to nda ti manda Bible na azo.
4. Ngbanga ti nyen a lingbi e mû mbage mingi na yâ ti kapa ti tisango ndo ni?
4 Sambela ti e ayeke ti tene azo mingi aga ande ti bungbi legeoko na e na ngoi ti Mémorial. Diskur ni ayeke fa ande so Jésus ayeke biani zo wa (1 aCor. 11:26). A yeke fa ande tongana nyen kuâ ti lo amû maboko na e (aRom. 6:23). A yeke fa nga ngbanga ti nyen a yeke kota ye ti tene e dabe ti e na lo (Jean 17:3). Zia e mû mbage mingi na yâ ti kapa ti tisango ndo ni!