“I yô joug ti Mbi”
1 Na yâ ti sese so asi singo na atënë nga na agingo bê, e yeke wara ngangu tongana e yeda na tisango ndo ti Jésus ti wu tere ti e na gbe ti joug ti lo (Mat. 11:29, 30). Ti yeda ti yô joug ti dutingo disciple aye ti tene ti sara gi pëpe mbeni kusala so akpengba, me ti sara mbeni kusala so amû ngangu na zo. A ndu nga fango nzoni tënë ti Royaume na ti mû maboko na azo ti wu tere legeoko na e na gbe ti nzoni joug ti Jésus.—Mat. 24:14; 28:19, 20.
2 Fango tënë amû na e ngangu: Jésus ahunda pëpe na adisciple ti lo ti yô kungba ti lo legeoko na ti ala. Lo iri ala ti changé nengo kungba ti ala na ti lo so ane pëpe. Fade agingo bê na aye ti sese so beku ayeke dä pëpe ane e mbeni pëpe; wala e yeke sara kua pëpe ndali ti amosoro so fade ahunzi (Luc 21:34; 1 Tim. 6:17). Kamême so e yeke na kua mingi na a lingbi e sara kusala ti wara aye so atia e lâ oko oko, fini ti e aluti gi na ndo ti kusala ti Nzapa (Mat. 6:33). Tongana e bata mbeni nzoni bango ndo na ndo ti aye so ayeke nzoni ahon atanga ni, e yeke bâ ande lakue fango tënë tongana ye so ayapu, me pëpe ye so ane zo nengo.—aPhil. 1:10.
3 Mingi ni, e ye ti sara tënë ti aye so agbu bê ti e (Luc 6:45). Jéhovah na anzoni ye ti Royaume so lo zê ayeke aye so agbu bê ti aChrétien kue. Tongaso, a yeke ye ti mungo ngangu na zo tongana e sara tënë na ndo ti “Tene-nzoni ti nzoye”, na e zia yamba agingo bê ti e ti lâ oko oko na ngoi so e yeke na fango tënë! (aRom. 10:15). Mingi ni tongana e sara mbeni kua, e yeke yapu na yâ ni mingi, nga e yeke duti na ngia mingi. Tongaso, mungo ngoi mingi na fango tënë, tongana lege ayeke dä, ayeke mû ngangu na e mbeni. Na bâ ngangu so e yeke wara tongana azo ayeda na fango tënë ti e! (Kus. 15:3). Même tongana azo asara nzara ti tënë ti e pëpe wala ala kanga lege na e, fade kusala ni ayeke mû na e ngangu na lege ti yingo tongana e bata na li ti e so aye so e sara amû ngia na Jéhovah; na fade ye ti nzoni kue so e wara na pekoni ayeke gi ndali ti so lo iri tënë nzoni dä.—Kus. 5:41; 1 aCor. 3:9.
4 Na yengo dä na iringo ndo ti Jésus, e yeke na matabisi ti sara na tere ti lo tongana aTémoin ti Jéhovah (Es. 43:10; Apoc. 1:5). Mbeni ye ti mû wungo tere na zo ahon so ayeke pëpe!