‘Leke tere teti nzo kusala kue’
1 Lani so Jésus ato nda ti mbeni fini kapa ti fango tënë, lo mû ngoi ti leke adisciple ti lo (Mat. 10:5-14). Atâa so e kue e yeke na kua mingi, ti mû penze-ngbonga kete ti leke tere kozoni ti gue na fango tënë da na da ayeke mû maboko na e ti ko aye ti nzoni na pekoni.—2 aCor. 9:6.
2 Lege ti leke tere: Nzoni lekengo tere ato nda ni na hingango nzoni atënë ti yâ ti mbeti so e leke ti fa na azo. A yeke nga nzoni ti bi bê na azo ti territoire ti e. Atënë wa agbu bê ti ala mingi? Atënë wa azo amä na bê dä mingi? E lingbi ti diko atapande ti fango tënë so ayeke na yâ ti Kusala ti Royaume nga na buku Comment raisonner à partir des Écritures ti hinga ambeni tënë.
3 Ti dengi mê na adémonstration so a sara na Bungbi ti Kusala ayeke mû nga maboko na e. Tongana e yeke yapu na yâ ti tënë so e yeke fa, fade ngoi so e mû ti leke tere ti e ayeke kiri na peko. Ye oko, lakue kozoni ti gue na fango tënë, tongana e bi bê kete na ndo ti tënë so fade e gue ti tene na azo na ti ngbâ ti leke yâ ni si aga nzoni, fade kusala ti e aga nzoni ahon ti kozo. A yeke nga nzoni ti mû ngoi kete ti bâ wala ambeti so e yeke na bezoin ni ayeke na yâ ti bozo ti fango tënë ti e.
4 Ye wa ayeke mû maboko na e ti dabe ti e na tënë so e gue ti fa? Ti tene ni fani mingi na kota go ayeke mbeni lege ti bata tënë ni na li ti e. Ambeni ayeke tara tere ti ala na ngoi ti mandango ye ti ala na sewa. Ti ambeni, ala bâ so a yeke nzoni ti sû akota kamba ti tënë ti ala ni na lê ti kete mbeti na ti bi lê dä kozoni si ala si na da ti zo ni.
5 Nzoni ti lekengo tere: Nzoni lekengo tere ayeke sara si e sara kusala ti e nzoni na e yeke wara ngia dä. A yeke sara si e yapu na e duti na mbeto pëpe na gbele zo. E yeke wara lege ti dengi mê mingi na zo ni ahon ti pensé gi na tënë so e ye ti tene na lo. Na ndo ni, ti hinga atënë ti yâ ti mbeti ni nzoni ayeke mû maboko na e ti sara tënë na ngia na ngoi so e yeke fa ni na azo.
6 Mbeti ti Nzapa awa e “ti leke tere ti [e] teti nzo kusala kue.” (Tite 3:1). Tâ nzoni kusala so ahon kusala ti fango nzoni tënë ayeke pëpe! Tongana e leke tere ti e nzoni, e yeke fa so na e ne zo so ayeda ti mä e, nga e ne Jéhovah, Nzapa so e ga na iri ti lo.—Es. 43:10.