Fa so mo bi bê na zo ni: Leke tere ti mo kozoni
1 Tongana e leke tere ti e nzoni kozo ti sigigi na fango tënë, e fa so e bi bê na azo. Na lege wa? Tongana e leke tere ti e nzoni, e yeke gi bê ti e mingi pëpe na ndo tënë so e gue ti tene na azo, na tongaso e lingbi ti bi bê mingi ahon na ndo ala. Na ndo ni, tere ti e ayeke dö mingi pëpe nga e yeke tene atënë so alondo na bê ti e. Me, tongana nyen e lingbi ti leke anzoni tënë ti fa na azo?
2 Sara kua na atënë so alingbi: Soro na yâ ti supplément ti Kusala ti Royaume so, lembeti 5-8, mbeni fango tënë oko so alingbi na azo ti ndo ni na leke ni alingbi na kode ti sarango tënë ti mo. Nga, sara si a lingbi na azo ti territoire so mo gue ti fa tënë dä. Na tapande, tongana mo hinga so mo gue ti fa tënë na azo ti mbeni mbilimbili mara wala mbeni bungbi ti nzapa, bi bê na ndo ye so mo lingbi ti sara ti tene tënë ti mo andu bê ti ala. Ti leke atënë ti mo si alingbi na azo so mo yeke sara tënë na ala afa so mo yeke bi bê na ala biani.—1 aCor. 9:22.
3 So mo to nda ti sara kua na mbeni kode ti fango tënë awe, ngbâ lakue ti leke ni, si a kiri a ga nzoni ahon ti kozo. Teti so akozo tënë ayeke kota ye mingi, bâ sarango ye ti azo na peko ti atënë ti mo. Tënë ni agbu bê ti ala? Ala yeke kiri tënë na ahundango tënë ti mo? Tongana a yeke tongaso pëpe, kiri mo leke yâ ti akozo tënë ti mo nzoni, juska mo wara mbeni tënë so agbu bê ti ala.
4 Aye so amû maboko ti dabe na ye: Azo mingi abâ so a yeke ngangu na ala ti dabe na tënë so ala ye ti fa na ngoi so ala si na yanga-da ti mbeni zo. Tongana a si na mo nga, mo tara lâ oko awe ti leke mbeni fango tënë na ti tene ni polele na kota go na gbele mbeni mba ti mo? Ye so ayeke mû maboko na mo ti bata tënë ni nzoni na li, na ti fa atënë ti mo na mbeni lege so akpengba pëpe si zo alingbi ti gbu nda ni. A lingbi nga ti mû maboko na mo ti sara ye na ndara na gbele asarango ye nde nde ti azo.
5 Ti sû nduru tënë na ndo tënë so mo gue ti fa na zo na ti bi lê dä na ngoi so mo yeke ga nduru na yanga-da ti mbeni zo ayeke mû maboko na mo ti bata ye na li. Ambeni ita abâ so mara ti kete dango bê tongaso ayeke sara si ala gi bê ti ala pëpe nga a yeke ngangu na ala pëpe ti sara lisoro na azo. Na yâ aye so, ti leke tere nzoni kozo ayeke mû maboko na e ti fa so e bi bê na azo na e yeke fa tënë nzoni ahon ti kozo.