BATA NI
Bata ye so Mbeti ti Nzapa afa na ndo ti tënë ti lungo kuâ—Mbage 3
Lungo kuâ ti Chrétien: na lege so ayeke senge, na fandara pëpe, na so ane zo
1. (a) Ngbanga ti nyen apaïen ayeke leke ka akota ye ndali ti lungo akuâ? (b) Nyen la ambeni zo ayeke sara ti tene azo aga mingi na lungo kuâ?
1 Azo so ahinga nzoni pëpe dutingo ti akuâ amä na bê so ti leke akota ye teti lungo kuâ ayeke zia ngia na bê ti wakuâ ni nga na afami ti lo so angbâ na fini. Ti apaïen, sarango ye na “fandara ti fini” na lege ti fango na azo dutingo ti wakuâ ni na yâ ti kodoro, mosoro ti lo wala ti sewa ti lo ayeke kota ye (1 Jean 2:16). Mingi ni, bibe ti sese so ayeke ti sara mandako, na mingi ti azo aye ti lu akuâ ti ala ti hon ti amba ti ala. Ti tene azo mingi aga, a sara afoto ti wakuâ ni na a zia ni na ando nde nde ti fa na azo tënë ti lungo kuâ ni. Ambeni akiri na lango ti lungo kuâ ni na peko teti ayenga wala anze ti mû lege na ala ti bungbi nginza mingi si lungo kuâ ni ane na lê ti azo. Tënë ni agbu bê ti azo mingi na tongaso asewa so ayeke na yâ ti nzinga alingbi ti tï na yâ ti kota bon ti mû lege na ala ti sara mbeni “kota matanga ti lungo kuâ” si bê ti amembre ti sewa ni nga na ti azo ti yâ ti kodoro ni anzere.
2. (a) Tongana nyen lege so aChrétien ayeke lu na akuâ ti ala ayeke nde na ti azo ti sese so? Tongana ti so Jean 17:16 na aProverbe 11:2 atene, ngbanga ti nyen ayeke kota ye ti tene lungo kuâ ti azo ti Jéhovah aduti na lege ti fandara pëpe na aduti senge?
2 Me ti azo ti Nzapa, ala hinga polele so akuâ ahinga ye oko pëpe, na tongaso akuâ ni mveni ahinga pëpe so azo ayeke yekia ala wala ayeke sepela ala. Atâa Chrétien ayeke leke akota ye teti lungo kuâ ti gboto lê ti azo pëpe. Tongana e sara mara ti aye tongaso, fade atënë so e mä na bê na ni ayeke duti nde na ti azo ti sese so tongana nyen? (Jean 17:16). Fade e yeke fa na azo so e nga kue e yeke sara mbeto ti kuâ pëpe? Ti hinga so sarango mbeto ti kuâ ayeke na yâ ti ngobo ti sarango ye ti azo na yâ ti kodoro ti e alingbi ti pusu e ti sara hange na ti duti na ndara ti bata si ye so e leke ndali ti lungo kuâ aduti na lege ti fandara pëpe na aduti senge (aProv. 11:2). E lingbi ti sara ni tongana nyen?
3. (a) Akode wa ambeni zo asigigi na ni ti ro na nginza ndali ti lungo kuâ? Tongana nyen azo ti Jéhovah abâ akode so?
3 Nginza teti lungo kuâ: Na ambeni ndo, tongana tënë ti kuâ asi, aita awara mbeni ngobo fadeso ti mä tere ti bungbi nginza teti lungo ni. Ala tokua mbeti na ambeni congrégation ti hunda nginza. Ti ambeni, ti tene ala wara nginza hio ti lu na kuâ ti aita, ala créé na popo ti ala mbeni sanduku ti “nginza ndali ti lungo kuâ”. Na lango ti lungo kuâ ni mveni, a zia ambeni zo ti ro nginza, na a zia asanduku na ndo nde nde ti mû lege na azo kue so aga ti bi nginza dä. Na pekoni, a yeke sara mbeti ti nginza ni na a sara tokua na ndo ni ti fa azo wala bungbi ti azo so abi nginza ni nga na wungo ti nginza so a wara. Na angoi tongaso, a kangbi na azo kobe na ye ti nyon ti pusu azo kue so aga ti mû ye ti maboko ti ala. A lingbi e bâ asarango ye tongaso tongana nyen? Tongana tënë ti lungo kuâ asi, atâa Chrétien ayeke hunda nginza na mara ti alege tongaso pëpe.
4. (a) Zo wa si ayeke bâ lege ti nginza ti lungo kuâ? (Bâ kete tënë na gbe ni*) (b) Tongana ye oko ayeke na sewa ni pëpe, ala lingbi ti gi mungo maboko na ndo wa? (Bâ kete tënë na gbe ni#) (c) Kpale wa alingbi ti si tongana a yeda na nginza ti asewa so ayeke Témoin pëpe? na tongana nyen aProverbe 27:12 andu tënë ni?
4 A lingbi sewa so ayeke Chrétien ahinga so a yeke kozoni kue kungba ti ala ti futa aye kue so andu tënë ti lungo kuâ ti ala.a Tongana biani sewa ni ayeke na nginza pëpe nga ala lingbi pëpe ti sara gi mbeni senge lungo kuâ, fade tanga ti amembre ti sewa ni alingbi ti mû mabokob (1 Tim. 5:3; od l. 132, par. 1). Tongana ambeni ye amanke ala, fade ambeni zo wala congrégation alingbi ti mû maboko na ala (1 Jean 3:17, 18). Ye oko, a lingbi e sara hange na mbeni tënë: Tongana a hunda na ambeni zo ti yâ ti sewa so ayeke aTémoin pëpe ti mû maboko ndali ti lungo kuâ ni, ala lingbi ti tene so ala yeke na droit ti tene mbeni tënë na ndo ti lege so a leke ti lu na kuâ ni. Ye so alingbi ti ga na kota kpale mbilimbili tongana a leke ti lu kuâ ni sân ti tene asioni sarango ye alï na yâ ni. Ye so aye ti tene pëpe so a lingbi aChrétien ake ye kue so ambeni sewa aye ti mû na bê ti ala mveni. Me tongana mbeni zo abâ so yengo dä na ye so a mû ndali ti lungo kuâ ni a lingbi ti zi lege na ala so ayeke aTémoin pëpe ti yôro yanga ti ala na yâ ti tënë ni wala ti hunda ti sara mbeni ye na ngoi ti lungo kuâ ni, a yeke nzoni ti ke ni na lege ti ndara.—aProv. 27:12.
5. (a) Diko aÉphésien 4:17-19 na aRomain 12:2. Na lege wa akpengba tënë so amû maboko na e tongana e yeke leke tënë ti lungo kuâ? (b) Na lege wa a lu lani Jésus na a lingbi e bâ ni tongana nyen? (c) Diko Luc 14:28 na 2 aCorinthien 8:12. Ti kpe ti hunda ye, ti sara bon, wala ti lï na yâ ti bon, a yeke nzoni sewa Chrétien aleke ti lu kuâ ti ala tongana nyen?
5 Nzoni hingango ye so e yeke na ni na ndo ti dutingo ti akuâ alingbi biani ti mû na e ngangu ti tene na ngoi ti lungo akuâ ti e aye ti sioni ti azo ti sese so, so mingi ti ala ahinga Mbeti ti Nzapa nzoni pëpe, alï na yâ ni kete pëpe (aÉph. 4:17-19). Atâa so e ye si ambeni azo apika gere ti ala pëpe na lege so e ke aye kue kue kue ndali ti lungo kuâ ni, e ye pëpe si aye ti sese so asara ngangu na ndo ti e si e mû peko ti azo so ayeke na yâ ti bingo na lege ti yingo (aRom. 12:2). E dabe ti e na Jésus so ayeke koli so ahon tanga ti azo kue; a lu lo na mbeni lege so ayeke senge nga na yâ ti nengo tere (Jean 19:40-42). Ti ala so ayeke na “bibe ti Christ”, ala yeke na kamene pëpe ti sara tongaso (1 aCor. 2:15, 16). Ye oko, ti kpe ti hunda ye na azo, ti kpe ti sara bon wala ti lï na yâ ti bon, a yeke lege ti ndara ti tene mbeni sewa Chrétien alu kuâ ti ala na mbeni lege so ayeke senge, na fandara pëpe, alingbi na ye so ala yeke na ni.—Luc 14:28; haka ni na 2 aCorinthien 8:12.
6. (a) Ngbanga ti nyen a hunda pëpe ti sara tokua ti kuâ nga na ti lungo ni na ambeni congrégation? (b) Ngbanga ti nyen a yeke na lege ni pëpe ti miro bungbi ti fango tënë wala ti changé angoi ni ndali ti lungo kuâ? Diko Matthieu 6:33, 34 na fa nda ni.
6 Lege so ye ni ayeke tambela: Tënë ti kuâ ayeke hon ka hio mingi, tongaso a hunda pëpe ti sara tokua na ndo ni wala na ndo ti tënë ti lungo ni na yâ ti mbeni congrégation nde na ti so wakuâ ni ayeke dä. A hunda nga pëpe ti tokua mbeti na ambeni congrégation nde ndali ni. Biani, a yeke nga na lege ni pëpe ti miro wala ti changé kapa ti abungbi ti congrégation ndali ti tënë ti lungo kuâ. Na ziango aye ti yingo na kozo ndo, a yeke mû maboko na e ti duti na nzoni bango ndo na ndo ti kui na ti ngbâ lakue ti zia aye ti Royaume na kozo ndo na yâ ti fini ti e.—Mat. 6:33, 34.
7. (a) A lingbi a sara nyen tongana a yeke ti sara diskur na ndo ti kuâ ni? (b) A lingbi wamungo diskur ni asara hange na atënë wa na yâ ti diskur ti lo?
7 Tongana a-ancien ti congrégation aye, a yeke sara diskur na Da ti Royaume wala tongana sewa ni aye, a lingbi ti sara ni na ndo ti wakuâ ni wala na mbeni ndo nde. A lingbi wamungo diskur ni so sewa ni asoro lo asara diskur ni na lege ti plan so bungbi ti Jéhovah aleke. A lingbi diskur ni adë bê ti zo, awa zo, na akpengba zo na lege ti yingo. A lingbi wamungo diskur ni afa atënë kue so ayeke na yâ ti plan ni, na lo yôro atënë ti nzapa ti wataka na yâ ni kete pëpe. Na tapande, tongana gbe ti atënë ti lo afa so mbeni zo la si afâ zo ni na lege ti yorö wala azo si asara sioni na lo, a yeke tâ tënë ti Mbeti ti Nzapa la pëpe na lo fa so Jéhovah ayeke na ngangu ti bata awakua ti lo pëpe (aProv. 18:10). A lingbi nga wamungo diskur ni asara hange si tënë so asigigi na yanga ti lo wala sambela ti lo afa pëpe so lo yeke sara tënë na kuâ ni mo bâ mo tene lo de na fini (Zo-ti. 9:5, 10). Tongana mbeni wakua be-ta-zo ti Jéhovah akui, wamungo diskur ni alingbi ti sara nga nduru tënë ti anzoni kusala so zo ni asara ândö na yâ ti gigi ti lo (aHéb. 6:12). Ye oko, a yeke duti ande na lege ni pëpe ti zi lege na azo kozoni na kapa ni, wala na ngoi ti kapa ni wala na pekoni ti sara tënë ti sepela kuâ ni wala ti sara témoignage ti lo.
8. (a) Ye wa aga fadeso ngobo na popo ti ambeni ita? na ngbanga ti nyen a lingbi e sara ni pëpe? (b) Na lekengo ye ndali ti diskur ti lungo kuâ ni, a lingbi a bâ tënë ti ngoi na ti sambela tongana nyen? (c) Tongana mbeni zo amû li ni na bungbi ni, nyen la a lingbi lo sara pëpe?
8 Na ambeni ndo, a ga fadeso ngobo ti aita ti bungbi na Da ti Royaume na lango ti lungo kuâ ni ti he abia ti Royaume teti angbonga mingi kozo si kapa ni ato nda ni. Atâa so a lingbi ti he bia na tongo nda ti diskur wala na kongo nda ni, a yeke duti ande mungo tapande ti bungbi ti aChrétien ti wataka tongana aita amä tere ti bungbi ti he bia teti angoi mingi kozoni si diskur ato nda ni. Mingi ni, diskur ti kuâ ayeke gi teti penze-ngbonga 30, na alingbi ato nda ni na l’heure. Ti sambela na tongo nda ti diskur ni, ndia ayeke dä pëpe. A yeke kota ye pëpe ti tene wamungo li ti bungbi ni airi wamungo diskur ni ti ga ti sara diskur ni na ti tene lo (wamungo li ti bungbi ni) ko nda ti kapa ni. Ye oko, tongana a yeke ti tene mbeni zo amû li ti bungbi ni, a lingbi atënë ti lo aduti gi nduru na andu gi ye so a lingbi a tene. A hunda na lo pëpe ti kiri na ndo ti atënë so wamungo diskur ni afa fade wala ti “sara tënë ti kiringo singila” na azo so aga. Na yanga ti dû ti kuâ ni, kozoni si a lu zo ni, tongana sewa ni aye, a lingbi ti sara nduru tënë nga na nduru sambela ti tene ye kue ahunzi. Me tënë ti dango bê ayeke so: a lingbi zo so ayeke Témoin pëpe amû mbage na tambelango ti aye ni pëpe wala ti sara tënë na Da ti Royaume wala na yanga ti dû ti kuâ ni.—2 aCor. 6:14-18.
9. A wa e ti sara nyen tongana e gue na diskur ti lungo kuâ?
9 Ye so a hunda na e kue ti sara: Tongana e gue tënë ti lungo kuâ, a lingbi sarango ye ti e aduti tongana nyen? Atâa so bê ti e asi na vundu, e ye ti wara dengo bê so alondo na Mbeti ti Nzapa. Tongaso, a yeke nzoni ala so ague na diskur ti lungo kuâ agirisa ti mû Bible ti ala pëpe. Dikongo aversê legeoko na wamungo diskur ni nga ti bâ lege so lo yeke fa nda ni ayeke kpengba mabe ti e na yâ ti zendo ti Nzapa ti zingo akuâ ande na ngoi so fade “kui ayeke mbeni pëpe”. (Apoc. 21:4). Lege azi na e nga ti dë bê ti afami ti wakuâ ni nga na ambeni zo so aga. Tongana e sara nzoni ye so, e lingbi gi ti dë bê ti amba ti e pëpe, me ti e mveni nga so e zia bê ti e gi na ndo ti pendere beku ti lâ ni so fade Nzapa ahunzi kui teti lakue lakue.—Es. 25:8 .
10. (a) Tongana nyen azo so ayeke na yâ ti bingo na lege ti yingo ayeke fa vundu ti ala na gigi? (b) Tongana nyen ala so ahinga tënë ti Nzapa nzoni ayeke fa vundu ti ala na gigi? na ngbanga ti nyen? Diko 1 aThessalonicien 4:13 na fa nda ni.
10 Azo mingi abâ atene ti sara vundu mingi afa so mo yekia wakuâ ni, mo ne lo, na mo ye lo mingi. Ni la ka si na ngoi ti bango kuâ ni, na ngoi ti diskur ni, wala na yanga ti dû ni, ambeni ayeke de kongo na toto kirikiri, ala yeke tï gbugbu wala ala sara tënë na ndo ti sanduku ni mo bâ mo tene zo ni ade na fini. Ambeni alondo ti gbu kuâ ni, ti lango na ndo ti sanduku ni wala ti tara ti tï na yâ ti dû ni. Atâa so lâ ti kui ayeke lâ ti vundu teti e kue, azo ti Nzapa ayeke sara ye kirikiri ti fa na lê ti azo vundu ti ala pëpe. Ngbanga ti nyen? Ngbanga ti so ti e, e hinga nzoni “tënë ti azo so alango awe”. E hinga tënë nzoni na ndo ti dutingo ti akuâ. E yeke na beku ti londongo ti akuâ (Jean 5:28, 29). Atënë ti zendo so adë bê ti e, na tongaso “vundu asara [e] pëpe tongana atanga ni so ayeke na beku pëpe.”—1 aThes. 4:13.
Aye so a yeke sara ka na peko ti lungo kuâ:
11. (a) Na peko ti lungo kuâ, tongana nyen e yeke fa so e bi bê ti e na ndoye na mbage ti sewa ni so ayeke na yâ ti mua? (b) Nyen la a lingbi e ku pëpe ti wara na ngoi so e gue ti bâ sewa so ayeke na yâ ti mua? na tënë ti Kusala 20:35 andu tënë so tongana nyen?
11 Gi so a lu kuâ ni awe, ye kue ahunzi awe. Mbeni ye oko ti sara ndali ti zo so akui ayeke dä pëpe. Na peko ti lungo kuâ ni, azo alingbi ti ga ti bâ sewa ni ti kangbi vundu na ala wala ti dë bê ti ala. Na angoi tongaso, lege azi na e ti gbu li nzoni na ndo ti fini ti zo so ayeke nduru, na ti bâ so “lâ ti kui ayeke nzoni ahon lâ ti dungo zo.” (Zo-ti. 7:1). A yeke duti ande sarango nzobe pëpe teti azo so aga ti kiri ti zia vundu na ndo ti sewa ni na hundango na ala ti mû kobe, sämba wala peut-être ndo ti lango. Azo ti Jéhovah ahinga so “ngia ayeke na zo so amû ye, ahon ngia ti lo so akamata ye.” (Kus. 20:35). Tongaso, a yeke nzoni ti pensé na ndo ti aye ti yingo nga na ti mitele so e lingbi ti mû na sewa ti wakuâ ni, ahon ti pensé na aye so e lingbi ti ku ti wara na mbage ti ala na lege ti kobe, ye ti nyon nga na ngia. Na sarango ye na bango mawa ti zo, fade e yeke kiri ti zia vundu na bê ti sewa ni pëpe, na e yeke fa na gigi ndoye na nzobe ti aChrétien.—aGal. 6:2.
12. (a) Nyen la azo so ahinga tâ tënë ti Bible pëpe ayeke sara ka na peko ti lungo kuâ? (b) Ngbanga ti nyen azo ayeke sara amatanga tongaso? na tënë ti nzapa ti wataka wa ayeke na pekoni?
12 E kpe amatanga so azo ayeke sara na peko ti lungo kuâ: Azo so ahinga tâ tënë ti Bible nzoni pëpe ayeke sara ye nde mingi na peko ti lungo kuâ. Gbâ ti azo ayeke bungbi ndo oko ti tene asewa, avoizin na ambeni zo ate kobe, anyon sämba na ado mozoko so a pika ni na kota go. Azo mingi airi ni “tâ lungo kuâ.” Mingi ni, tongana azo abungbi tongaso a yeke ti te kobe ahon ndo ni, ti nyon sämba ahon ndo ni, na ti do adodo so ayeke na lege ni pëpe nga ti sara lango-sioni. Ndali ti so mozoko ni atoto ngangu mingi, azo mingi aga ti lï yâ ti matanga ni atâa so ala hinga même wakuâ ni pëpe wala sewa ti lo. Ambeni atene sarango amatanga tongaso ayeke mû lege ti tomba vundu ti peko ti kuâ ni. Ye oko, a lingbi atâ Chrétien ahinga so, ti mingi ti azo, sarango ye tongaso na ngoi so zo akui ayeke ti mû gonda na kuâ ni na ti zi lege na yingo ti lo ti gue nzoni ti tingbi na yingo ti akotara ti lo.
13. (a) Tongana nyen matanga so azo ayeke sara ka na peko ti lungo kuâ alingbi tere na ye so a fa tënë ni na Exode 32:1-6? (b) Diko Zo-ti-fa-tene 3:1, 4. Ngbanga ti nyen sarango ye tongaso alingbi na azo ti Nzapa pëpe? (c) Tongana ti so Jean 17:16 na 1 aCorinthien 10:7 atene, ngbanga ti nyen atâ Chrétien ayeke kpe ti sara matanga ti peko ti lungo kuâ wala ti gue dä?
13 Na yâ ti li ti azo mingi, ala bâ aye tongaso tongana aye ti ngobo ti kodoro ti ala. Ye oko, a lingbi e mû sarango ye ti kodoro tongana mbeni raison ti bi tere ti e na yâ ti ye so a lingbi aChrétien asara ni pëpe. Na tapande, bia na dodo ayeke ândö na yâ ti ngobo ti azo ti Israël. Me tongana bia na dodo ni andu mbeni sarango ye so abuba iri ti Nzapa, a yeke buba songo ti mara ni na Jéhovah (Ex. 32:1-6). A yeke nga legeoko na adodo nga na amatanga so amû ndo laso na ngoi ti lungo kuâ. Kui ti mbeni zo so e ye lo ayeke ngoi ti sara pumba kirikiri pëpe (Zo-ti. 3:1, 4). Tënë ti ndara ayeke na yâ ti versê so: “Vundu ayeke nzoni ahon hengo ngia; teti na lege ti lê so ayeke na vundu, bê aga nzoni.” (Zo-ti. 7:3). Teti so na yâ ti amatanga ti peko ti lungo kuâ tënë ti lango-sioni na tënë ti yorö ayeke dä, atâ Chrétien ayeke kpe ti sara matanga ti peko ti lungo kuâ wala ti gue dä. Tongana e kpe angobo tongaso, e fa so e yeke “ti sese so pëpe”, e ne Nzapa ti tâ tënë, na e ne yingo-ti-hinga ti amba ti e.—Jean 17:16; 1 aCor. 10:7.
14. (a) Na peko ti lungo kuâ, azo ayeke bungbi ka mingi ti sara nyen? na ala yeke sara ka ni lawa? (b) Tënë wa ti asioni yingo ayeke na yâ ti li ti azo na ndo aye so?
14 Ndangba place ti kuâ na matanga ti dango bê na wakuâ ni: Na peko ti lungo kuâ, ambeni membre ti sewa aleke ti sara ye so ala iri ni “ndangba place ti kuâ”. Ti ambeni, ala leke ti sara matanga ti dabe na wakuâ ni. Na angoi tongaso, a lingbi ti kangbi kobe na sämba na azo so aga, a pika mozoko, na azo abi nginza mingi. Atâa so ngoi so a diko ndali ti ndangba place ti kuâ ni alingbi ti duti nde nde, mingi ni azo ayeke sara ka ni lango mbasambala, wala gumbaya, wala bale osio wala bale miombe, wala même ahon so, na peko ti so a lu kuâ ni. Na lê ti azo mingi, ndangba place ti kuâ na matanga ti dango bê na kuâ ni so a sara ngu oko na pekoni ayeke akota mbage ti lungo kuâ ni, teti so azo ni amä na bê so tongana a sara aye so kue awe si yingo ti wakuâ ni alingbi ti gue nzoni.
15. (a) Ngbanga ti nyen azo ayeke sara ka amatanga na peko ti lungo kuâ? (b) Hundango tënë wa abâ gigi fadeso?
15 Guengo na amatanga tongaso wala ti leke ni yenga mingi wala nze mingi na peko ti lungo kuâ ni a lingbi ti bâ ni tongana mbeni lege so azi ti wara azo ti kangbi vundu wala ti dë bê ti sewa ni so ayeke na yâ ti vundu. A lingbi ti bâ ni tongana mbeni lege so azi na azo so aduti lani dä na lungo kuâ ni pëpe ti wara ngoi ti tene bara ti ala na wakuâ ni. Ti ambeni zo, amatanga tongaso amû lege na ala ti kiri singila na asewa nga na akamarade ti wakuâ ni so amû maboko na lungo kuâ ni. Fade e yeke tene na nda ni so teti so sarango ye ti apaïen ayeke na yâ ni pëpe, a yeke na lege ni ti sara mara ti matanga tongaso ndali ti aita ti congrégation nga ndali ti azo ti sewa ni?
16. (a) So ayeke sioni pëpe ti tene zo mveni ague abâ sewa so vundu asi ala, ye wa atâ Chrétien aye ti sara pëpe? (b) Tongana ti so 1 aCorinthien 10:32, 2 aCorinthien 6:17 na Psaume 97:10 afa, ngbanga ti nyen a lingbi e kpe ti leke wala ti gue na amatanga so a sara na peko ti lungo kuâ?
16 Na peko ti lungo kuâ, ambeni membre ti sewa ni oko oko so ayeke nduru na wakuâ ni alingbi ti bungbi ti bâ tënë ti anginza kue so a futa ndali ti lungo kuâ ni nga na ambeni tënë so a lingbi a bâ ni na azo ti letäa na pekoni. Na ndo ni, na peko ti lungo kuâ ni, ambeni zo aye peut-être ti ga na kete ye ti maboko ti ala na sewa ni, ti wa ala, nga ti mû maboko na ala na lege ti yingo. Ye oko, mingi ni, sarango ye tongaso abâ gi zo oko oko, me a yeke tënë ti congrégation kue pëpe. Nyen la ayeke si tongana mbeni sewa, na peko ti so a lu kuâ ni awe, airi congrégation, afami na akamarade ti ala ti bungbi tere? Sarango ye tongaso alingbi ti pusu ambeni zo ti tene so andâ aTémoin ti Jéhovah kue ayeke na kode ti sarango ndangba place ti kua ti ala wala matanga ti dango bê na kuâ. Sarango tongaso alingbi ti sara si ambeni zo atï hio, azo so ahinga tënë ti mabe ti aTémoin ti Jéhovah nga ye so ala fa na ndo ti dutingo ti akuâ (1 aCor. 10:32). Teti so ndangba place ti kuâ nga dango bê na kuâ ngu oko na pekoni alï mingi na yâ ti tënë ti mango na bê na yingo ti akotara, atâ wavorongo Nzapa ayeke kpe aye kue so alingbi ti kpa tere na ati so e sara tënë ni fade na nduzu ge, so azo ayeke sara ka na peko ti lungo kuâ (2 aCor. 6:17). Tongana e sara ye tongaso, e fa na gigi biani so e “ke ye ti sioni” na e ndoye nga e bata ye so ayeke nzoni, ye so ayeke na saleté pëpe, na ye so ayeke mbilimbili (Ps. 97:10; aRom. 12:9). Zia zo oko oko kue abata na bê ti lo akpengba tënë so a fa na nduzu ge, si e hinga biani so lungo kuâ ti e aChrétien aduti senge, na fandara pëpe, nga sarango ye ti sioni oko alï na yâ ni pëpe.
[Akete tënë na gbe ni]
a Ge, e ye ti sara tënë ti tâ sewa ni mveni, mbilimbili babâ, mama na amolenge.
b Ge, e ye ti sara tënë ti asewa ti tere ni tongana a-omba, ababâ kete, ababâ kota, akoya nga na atanga ni.