Nyen la apusu e ti fa tënë?
1. Kamba wa la ayeke na popo ti ndoye nga na kusala ti e?
1 Fango nzoni tënë ti Royaume ti Nzapa ayeke kota kua so e lingbi ti sara laso. Biani, na sarango kusala so e yeke fa so e yeda na akota commandement use so: ti ndoye Jéhovah na ti ndoye amba ti e (Marc 12:29-31). Ndoye la ayeke pusu e ti bi tere ti e kue na yâ ti kusala ni.—1 Jean 5:3.
2. Tongana nyen fango tënë ti e afa so e ye Jéhovah?
2 Ndoye teti Jéhovah: Ndoye so e yeke na ni na tâ kamarade ti e Jéhovah apusu e ti gbu koko ti lo. A sara nduru na ngu 6000 tongaso awe si Satan ayeke diko atënë ti mvene na ndo ti Jéhovah (2 aCor. 4:3, 4). Ni la, azo amä na bê so Nzapa ayeke bi azo ti sioni na yâ ti wâ ti enfer ti bâ pasi teti lakue lakue, nga na tënë ti Nzapa Babâ, Nzapa Molenge, na Nzapa Yingo vulu so zo ahinga li ti lo na ni pëpe, nga so lo yeke bi bê na azo pëpe. Azo mingi atene même so lo yeke dä pëpe. E ye mingi ti tene azo ahinga tâ tënë na ndo ti Jéhovah. Ngangu kua so e yeke sara ti fa tënë ti Nzapa amû ngia na lo mingi me amû vundu na Satan.—aProv. 27:11; aHéb. 13:15, 16.
3. Na lege wa kusala ti e afa so e ye amba ti e?
3 Ndoye teti amba ti e: Na ngoi kue so e fa tënë na mbeni zo, e yeke fa so e ye zo ni. Azo ayeke tâ na bezoin ti mä nzoni tënë na ngoi ti akpale so. Mingi ti azo ayeke tongana azo ti Ninive na ngoi ti Jonas so “ahinga koti na gati ti ala pëpe”. (Jonas 4:11). Kusala ti e ayeke fa na azo tongana nyen ti duti nzoni na yâ ti fini ti ala nga ti duti na ngia (És. 48:17-19). A yeke mû na ala beku (aRom. 15:4). Tongana ala mä na ala sara ye alingbi na ye so ala manda, “fade a yeke sö” ala.—aRom. 10:13, 14.
4. Nyen la Jéhovah alingbi ti girisa ni lâ oko pëpe?
4 Anzoni molenge ayeke fa pëpe so ala ndoye ababâ na amama ti ala gi na ambeni ngoi. Me ala yeke sara ngangu ti ye ala na ngoi kue. Legeoko nga, kota ndoye so e yeke na ni teti Jéhovah nga teti azo ayeke pusu e ti gbu alege kue so azi na e ti fa tënë na ngoi kue, me gi pëpe na angoi so congrégation aleke teti fango tënë. E yeke zia pëpe ti fa tënë (Kus. 5:42). Jéhovah ayeke girisa lâ oko pëpe mara ti ndoye so.—aHéb. 6:10.