Mo yeke duti nduru ti changé ambeni ye?
1. Aye so ayeke si na yâ ti dunia so, a hunda na e ti gbian aye wa?
1 Na 1 aCorinthien 7:31, Bible afa polele so, aye ti dunia so ayeke changé tere changengo. Ni la, a hunda na e ngoi na ngoi ti gbian yâ ti akode ti fango tënë ti e, kapa ti e, nga na ambeni lege ni nde. Mo yeke duti nduru ti changé ambeni ye?
2. Ti gue na li ni legeoko na bungbi ti Jéhovah, ngbanga ti nyen a lingbi e gbian kode ti fango ye ti e?
2 Akode ti mo ti fango tënë: Lakue, a yeke changé aye na yâ ti congrégation ti aChrétien. Na ngoi so Jésus atokua lani adisciple ti lo, lo tene na ala ti mû pëpe bozo ti kobe, wala bozo ti nginza (Mat. 10:9, 10). Ye oko, kete na pekoni lo kiri lo gbian yâ ti afango ye so ti leke adisciple ti lo ndali ti akangango lege so ayeke ga, nga ti kono yâ ti kusala ti ala ti fango tënë na ando nde nde (Luc 22:36). Na yâ ti ngu 100 so ahon, bungbi ti Jéhovah asara kua na akode nde nde na yâ ti kusala ti fango tënë. Na tapande fango tënë na lege ti mbeni pancarte, radio nga na akutukutu so ayeke na haut-parleur. Fango tënë na akode tongaso alingbi lani na ngoi ni. Laso, teti so a yeke ngangu ti wara ambeni zo na yanga-da na ngoi so e yeke fa tënë da na da, a yeke nzoni ti fa tënë na ando so azo ayeke dä wala ti fa tënë na alege kue so azi. A wa e nga ti fa tënë da na da na alakui tongana azo ayeke na kua na ndapre. Mo yeke ngbâ ti tambela legeoko na char ti Jéhovah so ayeke tambela na yayu?—Ézéch. 1:20, 21.
3. Na lege wa gbiango yâ ti kode ti e alingbi ti mû lege na e ti ndu bê ti azo ti territoire ti e?
3 Lege ti ndu bê ti azo: Na yâ ti territoire ti mo, tënë wa a gbu bê ti azo mingi? A yeke tënë ti nginza, tënë ti sewa wala ti bira? Tongana e hinga tënë na ndo ti ambeni kpale nga ambeni ye so asi na yâ ti territoire ti e, a yeke mû lege na e ti leke mbeni nzoni kode ti fango ye (1 aCor. 9:20-23). Na mbage, tongana e bâ so zo so e yeke fa tënë na lo ato nda ti fa atënë ti bê ti lo na e, ahon ti ngbâ gi lakue na ndo ti oko tënë so e leke awe, a yeke nzoni e gi ti sara tënë na ndo ti aye so agbu bê ti zo ni.
4. Ngbanga ti nyen a lingbi e ku pëpe ti changé ambeni ye?
4 Na yâ ti kete ngoi aye ti dunia so ayeke gue ti hunzi na kota ye ti vundu ayeke ga. “Ngoi so angbâ ayeke mingi pëpe.” (1 aCor. 7:29). Ni la, a yeke kota ye ti ku pëpe me ti duti nduru ti changé ambeni ye, ti mû lege na e ti sara kusala mingi na yâ ti kete ngoi so angbâ.