Sara kusala nzoni na ngoi ti mo na fango tënë
Na yâ ti ngu ti kusala ti ngu 2014 aTémoin ti Jéhovah afa tënë ahon l’heure 1945487604; ye so afa polele so e leke na bê ti e ti duti na aye mingi ti sara na yâ ti kua ti Jéhovah (Ps. 110:3; 1 aCor. 15:58). Ndali ti so “ngoi so angbâ ayeke mingi pëpe”, eskê lege ayeke dä ti sara kua nzoni na ngoi ti e ti fa tënë na azo mingi ape?—1 aCor. 7:29.
Ti sara kua nzoni na ngoi ti e na fango tënë a hunda ti tene e changé ambeni ye. Na tapande, tongana mo mû l’heure oko wala mingi ti sara kua na mbeni kode ti fango tënë si mo wara zo ti fa tënë na lo pëpe, mo lingbi ti changé kode ni so si mo wara lege ti fa tënë na azo mingi. Aye ayeke changé na ando nde nde. Ni la, awango so ayeke na gbe ni ge so alingbi ti mû maboko na mo ti sara kua nzoni na ngoi ti mo tongaso si mo “pika yâ ti pupu” pëpe.—1 aCor. 9:26.
• Fango tënë da na da: Ndali ti angu mingi, kozo ti tene aita ague na fango tënë na yâ ti lango ni, ala yeke to nda ni na lege ti fango tënë da na da. Me, mingi ti azo ayeke sara kua na ndapre, ngbanga ti nyen mo tara pëpe ti fa tënë da na da na après-midi wala na lakui? Wala na ngoi so azo mingi ayeke na yanga-da nga ala yeke na ye mingi ti sarango ni ape? Na ndapre, fango tënë na lege wala na ando ti dengo buze alingbi ti ga na aye ti nzoni.
• Fango tënë na ando so azo ayeke hon dä mingi: A yeke nzoni acongrégation azia atable nga na apoussette na ando so azo ayeke hon dä mingi na yâ ti territoire ti ala. (Bâ Kusala ti Royaume ti juillet 2013, l. 5.) Tongana ala yeke fa tënë na ando so azo ayeke hon dä mingi si azo ayeke hon dä mingi encore ape, Komite ti Kusala ti Congrégation alingbi ti décidé ti tene a changé place ti table wala poussette ni ti gue na ni na mbeni ndo so azo ayeke hon dä mingi.
• Avizite nga na a-étude: Tongana a yeke ngangu ti wara azo so mo yeke sara avizite nga na a-étude na ala, ngbanga ti nyen mo changé l’heure ni ape? Na tapande, tongana mo yeke wara azo mingi na fango tënë da na da na samedi na ndapre, mo lingbi ti kiri na a-étude ti mo na après-midi wala na lakui ape? Na ngoi so aita ayeke sara avizite, a yeke nzoni ala leke ti sara vizite na azo so ayeke nduru na ndo so ala lango dä tongaso si ala fa tënë mingi.
A yeke tâ tënë so e yeke diko ka angbonga so e sara na fango tënë, me e yeke na ngia mingi tongana e wara ye ti nzoni na peko ni. Tongana mo bâ so na ambeni ngoi kode so mo yeke fa na tënë aga na ye ti nzoni ape, sara kua na ambeni kode ni nde. Sambela Jéhovah, “Wa ti kua ni,” ti wara afango lege ti lo so alingbi ti mû maboko na mo ti sara kusala nzoni na ngoi ti mo na fango tënë.—Mat. 9:38.