LEGE TI HON NDÖ TI BIBE TI KENGO ZO
2 | Gi ti kiri pëpe peko ti sioni so a sara na mo
Fango ye ti Bible:
“Ala kiri sioni ndali ti sioni na zo oko pëpe. . . . Tongana lege ni ayeke dä, na ala lingbi ti sara mbeni ye, zia ala duti na siriri na azo kue. ala wani ala kiri pëpe peko ti sioni so a sara na ala, . . . Mbeti ti Nzapa atene: ‘Jéhovah atene: Mbi la mbi yeke kiri na zo peko ti sioni so lo sara, mbi la mbi yeke kiri na ni.’”—AROMAIN 12:17-19.
Tënë so aye ti tene nyen:
Atâa so a yeke na lege ni ti tene bê ti e ason na ngoi so a sara ye ti sioni na e, Nzapa aye ti tene e kiri na peko ti sioni so a sara na e ape. Me, lo ye ti tene e ku lo ndali ti so fafadeso lo yeke zi ande aye ti sioni kue.—Psaume 37:7, 10.
Ye so mo peut ti sara:
Tongana e azo e yeke kiri na peko ti sioni so a sara na e, a yeke sara si bibe ti kengo zo angbâ gï ti mû ndo. Tongaso, tongana mbeni zo asara sioni na mo, kiri na ni na lo ape. Gi ti kanga bê ti mo na sara ye na yâ ti siriri. Na yâ ti ambeni ye ni, a yeke nzoni ti girisa na ndö ti ye so apassé (aProverbe 19:11). Na ambeni ngoi, peut-être a yeke nzoni ti sara tënë ti ye so apassé. Na tapande, tongana a sara ye ti ngangu na mo, mo peut ti sara tënë ni na azo ti lapolice wala na ambeni kota zo ti kodro.
Bibe ti kiri na zo peko ti sioni ayeke sara sioni na mo wani
Na bango ni, ka tongana lege ayeke dä ape ti leke kpale ni na yâ ti siriri? Wala mo sara déjà awe aye kue so mo peut ti sara ti leke kpale ni na yâ ti siriri? Kiri pëpe na peko ti sioni so a sara na mo. Tongana ayeke tongaso ape, ye ni ayeke kiri ti ga sioni mingi. Me, gi ti hon ndö ti bibe ti kengo zo. Mo peut ti sara confiance na lege so Nzapa ayeke leke na kpale ni. “Zia bê ti mo na ndö ti lo, na lo yeke sara ye ndali ti mo.”—Psaume 37:3-5.