Zabolo ayeke tongana nyen?

Kiringo tënë ti Bible

Zabolo ayeke yingo, so ti tene lo yeke na terê so e peut ti bâ ni ape.—aÉphésien 6:11, 12.

Azo mingi asara dessin ti Zabolo lo gbu fourchette na maboko ti lo. Lo kpa ngasa so ayeke na adidi nga na damba.

Ambeni zo asara dessin ti Zabolo lo kpa ngasa, adidi ayeke na li ti lo, lo yeke na damba nga yongoro fourchette ayeke na maboko ti lo. Ambeni zo atene so akozo zo so asara dessin ti Zabolo tongaso ayeke azo ti sarango dessin so avivre asara ngu saki oko tongaso awe. A tene so peut-être apande nga na atere so ala amä la apusu ala ti sara adessin ni tongaso.

Bible atene nyen na ndö ti Zabolo?

Bible asara kua na ahakango ye nde nde ti sara tënë na ndö ti Zabolo. Ye so amû lege na e ti hinga asarango ye ti lo, me pëpe forme ti lo. Na tapande, Bible ahaka lo tongana:

Mbeni ange ti lumière. Lo handa azo lo fa na ala so lo yeke mû na ala mbeni ye ti nzoni ti pusu ala ti mû peko ti lo ahon ti mû ti peko ti Nzapa.—2 aCorinthien 11:14.
Mbeni bamara so ayeke toto. Lo yeke sara ye ti ngangu mingi na awakua ti Nzapa.—1 Pierre 5:8.
Mbeni kota sioni nyama so akpa ngbo. Lo yeke zia mbeto na yâ ti zo mingi, lo yeke na ngangu mingi nga lo yeke sara aye ti sioni mingi.—Apocalypse 12:9.

Aversê ti Bible so asara tënë na ndö ti Zabolo

2 aCorinthien 11:14: “Satan wani ayeke sara terê ti lo lakue tongana mbeni ange ti lumière.”

Nda ti versê ni: Satan asara ye mo bâ mo tene lo yeke mbeni nzoni zo ti handa azo ti mû peko ti lo ahon ti mû peko ti Nzapa.
A-Éphésien 6:11: “Ala yü aye ti bira kue so alondo na Nzapa si ala wara lege ti luti ngangu ti ke amayele ti Zabolo.”

Nda ti versê ni: Zabolo asara kua na asioni kode nde nde ti pusu azo ti ke yanga ti Nzapa.
Jacques 4:7: “Ala woko terê ti ala na gbe ti Nzapa; me ala luti na Zabolo, na lo yeke kpe ande yongoro na ala.”

Nda ti versê ni: Tongana mbeni zo amä yanga ti Nzapa lo peut ti dö sese na Zabolo.
1 Pierre 5:8: “Wato ti ala Zabolo ayeke tambela tongana mbeni bamara so ayeke toto, na lo yeke gi mbeni zo ti te lo.”

Nda ti versê ni: Zabolo ake azo so amä yanga ti Nzapa na lo ye ti buba yâ ti songo ti ala na Lo.