Ti duti zo ti yingo aye ti tene nyen? Eskê mbi peut ti duti zo ti yingo sân mbeni bungbi ti Nzapa?
Kiringo tënë ti Bible
Na yâ ti Bible, ti duti zo ti yingo aye ti sara tënë ti zo so aye mingi ti nzere na lê ti Nzapa nga so lo ye ti tene apensé ti lo ague oko na ti Nzapa. Zo ti yingo ayeke gi ti sara ye alingbi na andia ti Nzapa nga na fango lege ti yingo vulu ti lo.a—aRomain 8:5; aÉphésien 5:1.
Bible afa kangbi so ayeke na popo ti zo ti yingo nga na zo ti mitele. Na tapande, nde na zo ti yingo, “zo ti mitele ayeda na aye ti yingo ti Nzapa pëpe,” wala afango ye ti Nzapa (1 aCorinthien 2:14-16). Na mbage, azo ti mitele ayeke azo ti ‘kota bê nga na papa’ ahon ti duti azo so amû ye na zo wala so aye siriri (1 aCorinthien 3:1-3). Azo ti pango ndo so ayeke ga na kangbi na popo ti akota kamarade, ‘ala yeke tongana anyama, mbeni ye ti yingo ayeke na terê ti ala pëpe.’—Jude 19; aProverbe 16:28.b
Na yâ ti article so e yeke bâ:
Ngbanga ti nyen la azo aye tënë ti aye ti yingo?
E yeke na ngangu ti bi bê na ndö ti aye ti yingo ayeke ndali ti so Nzapa aleke e na image ti lo (Genèse 1:27). Tongaso, ahon gbungo li ti e ape so mingi ti azo abâ ni na nene ni nga ala ye ti manda ye na ndö ti aye so lê abâ ape.
E azo, e lingbi nga ti duti na asarango ye tongana ti Jéhovahc Nzapa, na tapande siriri, ti sara ye na nzoni bê nga ti sara kangbi na popo ti azo ape (Jacques 3:17). Na ndö ni, Nzapa amû yingo vulu ti lo na azo so agi ti mä yanga ti lo.—Kusala 5:32.
Ngbanga ti nyen la a yeke kota ye ti duti zo ti yingo?
Ti duti zo ti yingo ayeke gue na zo ti wara “fini nga na siriri.” (aRomain 8:6). Acadeau so alondo na Nzapa so ayeke ye ti ngangu ngere.
Fini: Nzapa amû zendo ti fini ti lakue lakue na azo ti yingo.—Jean 17:3; aGalate 6:8.
Siriri: A ye ti sara tënë ti siriri na Nzapa. Azo so azia li ti ala gï na ndö ti abezoin ti ala ti mitele ayeke awato ti Nzapa (aRomain 8:7). Na mbage, Nzapa amû na ala so aye aye ti yingo ‘siriri ti lo so ahon ndö ti bibe kue.’ (aPhilippien 4:6, 7). Mara ti siriri tongaso ayeke aidé ala ti duti na ngia na yâ ti gigi ti ala.—Matthieu 5:3.
Mbi peut ti ga zo ti yingo tongana nyen?
Manda andia ti Nzapa nga sara ye alingbi na ni. Mo peut ti sara ni na lege so mo yeke diko Bible, so a wara na yâ ni apensé ti Nzapa so azo la asû ni “tongana yingo vulu afa lege ni na ala.” (2 Pierre 1:21). Aye so mo yeke manda ayeke aidé mo ti voro Nzapa na “yingo nga na tâ tënë”, nga yingo vulu ayeke fa lege na mo ti tene mo sara ye ague oko na ye so bê ti Nzapa aye.—Jean 4:24.
Sambela ti tene Nzapa a-aidé mo. (Luc 11:13). Nzapa ayeke aidé mo ti duti na asarango ye so afa so mo yeke zo ti yingo (aGalate 5:22, 23). Sambela apeut nga ti sara si mo wara ndara ti hon ndö ti akpale na yâ ti gigi ti mo.—Jacques 1:5.
Sara kamarade na azo ti yingo. Ala yeke encouragé mo ti kpengba na lege ti yingo (aRomain 1:11, 12). Me, ti sara kamarade na azo so pensé ti ala ague nde na ti Nzapa apeut ti buba songo ti mo na lo.—Jacques 4:4.
Eskê mbi bezoin mbeni bungbi ti Nzapa ti ga zo ti yingo?
Gï ti gue na mbeni bungbi ti Nzapa la ayeke sara si zo aga zo ti yingo ape. Bible atene: “Tongana mbeni zo abâ ti lo so lo yeke zo so ayeke voro Nzapa si na mbage lo bata yanga ti lo pëpe, lo yeke handa bê ti lo wani la, na vorongo Nzapa ti zo ni so ayeke senge senge.”—Jacques 1:26, kete tënë na gbe ni.
Atâa so kue, Bible afa so azo ti yingo ayeke voro Nzapa na lege so lo ye. Ala hinga so yingo vulu ayeke gï oko, so ti tene yingo vulu ti Nzapa. Yingo ni la asara si ala yeke voro Nzapa tongana ‘terê oko’, mbeni bungbi so abata “beoko ti yingo na yâ ti kamba ti siriri.”—aÉphésien 4:1-4.
Atënë so ayeke na lege ni ape na ndö ti zo ti yingo
Tënë so ayeke na lege ni ape: Zo ti yingo ayeke sara kue ti tene lo wani lo gi ti duti na ngia wala ti atteindre objectif ti lo.
Tâ tënë ni: Bible afa so zo ti yingo ayeke zo so asara ye ague oko na apensé ti Nzapa. Lo wani la lo yeke gi ape ti duti na ngia sân Nzapa. Azo ti yingo ayeke na ngia na lege so ala hinga so Jéhovah la acréé ala nga ala yeke sara ye ague oko na ye so lo leke na bê ti lo ti sara.—Psaume 100:3.
Tënë so ayeke na lege ni ape: Mbeni zo apeut ti duti zo ti yingo tongana lo ke aye kue wala lo sara pasi na terê ti lo wani.
Tâ tënë ni: Sarango pasi na terê ti zo wani ayeke “vorongo Nzapa ti li ti zo wani” nga ague oko na bibe ti mitele (aColossien 2:18, 23). Bible afa so ti duti zo ti yingo ayeke ga na zo ngia, me pasi ape.—aProverbe 10:22.
Tënë so ayeke na lege ni ape: Ti tene zo aduti zo ti yingo, a lingbi lo sara yorö wala lo gi ti sara tënë na yingo ti akuâ.
Tâ tënë ni: Ambeni zo so asara yorö amä na bê so azo so akui awe alingbi ti sara lisoro na azo so angbâ na fini. Me, Bible afa so akuâ ahinga ti ala ye oko ape (Zo-ti-fa-tene 9:5). Ti tâ tënë ni sarango tënë na akuâ ayeke sarango tënë na asioni yingo so ayeke awato ti Nzapa. Sarango yorö ason bê ti Nzapa nga akanga lege na zo ti ga kamarade ti lo.—Lévitique 20:6; Deutéronome 18:11, 12.
Tënë so ayeke na lege ni ape: Aye kue so Nzapa acréé ayeke zo ti yingo.
Tâ tënë ni: Aye kue so Nzapa acréé amû gloire na lo (Psaume 145:10; aRomain 1:20). Ye oko, a yeke gï azo la apeut ti duti zo ti yingo. Nde na azo, anyama ayeke na hingango ndo ape nga ala peut ti ga kamarade ti Nzapa ape. Aye so ala yeke sara ayeke gï ti bâ lege ti bezoin ti ala ti mitele (2 Pierre 2:12). Ndani la Bible ahaka sarango ye ti azo ni so tongana ti anyama.—Jacques 3:15; Jude 19.
a Tënë so a kiri peko ni na “yingo” na yâ ti Bible apeut ti sara tënë ti “pupu”. A peut nga ti sara tënë ti aye so zo alingbi ti bâ ni ape, me zo ayeke bâ ngangu ti ye ti peko ni. Bible afa Nzapa tongana mbeni zo ti yingo so ayeke na nduzu na ndö ti aye kue. Mbeni zo ti yingo ayeke mû desizion ague oko na ye so bê ti Nzapa aye nga lo yeke mû peko ti fango lege ti yingo vulu ti Nzapa.
b Na yâ ti Bible, tënë “zo ti mitele” aye ti sara tënë ti zo so apensé ti lo nga na aye so lo yeke sara ayeke gï ti bâ lege ti abezoin ti lo na lege ti mitele, sân ti gbu li na ndö ti andia ti Nzapa.
c Jéhovah ayeke iri ti Nzapa tongana ti so Bible afa ni.—Psaume 83:18.