“Mbi yeke mbeni zo ti sarango ye na ngangu na zo encore ape”

GIGI TI MBI ÂNDÖ

A dü mbi na Ouganda na kodro-komanda ti Gomba. Mingi ti azo ti kodro ni ayeke pauvre mingi. Wâ ti courant ayeke na yâ ti gbata ni ape, tongaso na bï e yeke za lampe la e yeke bâ na ndo.

Babâ na mama ti mbi ayeke azo ti fango yaka, ala londo na Rwanda la aga na Ouganda. Ala yeke fa lani yaka ti café, ti boulé, nga ala yeke mû boulé ayeke sara na mbeni ngangu sämba so airi ni waragi. Ala yeke bata nga lani akondo, angasa, acochon, nga na bagara. Ngobo ti azo ti kodro ti mbi, nga na aye so babâ na mama ti mbi afa na mbi ague na mbi ti pensé so wali adoit ti mä yanga ti koli ti lo na ngoi kue nga lo doit lâ oko ti fa atënë ti bê ti lo ape.

Na temps so mbi yeke na ngu 23, mbi quitté mbi gue na Rwanda, kâ mbi na amba ti mbi e komanse ti gue na boîte de nuit. Ndali ti so mbi gue na mbeni boîte ni mingi, akota zo ti ndo ni amû na mbi mbeni carte so amû lege na mbi ti lï senge. Mbi ye nga lani ti bâ afilm ti tiri mingi, ati so akpa tâ vrai ye. Akamarade ti mbi nga na afilm so mbi yeke bâ lani asara si mbi ga mbeni zo so ayeke sara ye ti ngangu na zo nga so anyon sämba ahon ndö ni.

Na ngu 2000, mbi komanse ti vivre na mbeni maseka-wali so iri ti lo ayeke Skolastique Kabagwira, mbi na lo e dü amolenge ota. Mbi ye lani ti tene, tongana lo ye ti bara mbi wala lo ye ti hunda mbeni ye na mbi lo sara agenou ndali ti so ti mbi ayeke ye so awali adoit ti sara la. Nga ti mbi aye kue so e yeke na ni ayeke gï ti mbi awe, na mbi doit ti sara kua na ni tongana ti so bê ti mbi aye. Fani mingi, mbi yeke hon na bï na mbi yeke kiri gï na yanga ti ndapre, mingi ni mbi soulé. Tongana mbi pika yanga-da si Skolastique amû temps ngbii ti ga ti zi ni, mbi yeke pika lo.

Na temps ni so lani, mbi yeke mbeni kota zo na yâ ti mbeni société de sécurité privée na a yeke payé mbi lani bien. Skolastique aha mbi gbä lani ti gue na eglize ti lo, lo pensé so ni la ayeke changé mbi. Me mbi ye lani ti gue na eglize ti lo ni ape. Na mbage, mbi komanse ti sara nzara ti mbeni wali. Ndali ti so mbi yeke sara ye ti ngangu nga mbi gue mbi gi mbeni wali nde, a sara si Skolastique amû amolenge ti e ota kue, lo quitté lo kiri na ndö ti babâ na mama ti lo.

Mbeni kamarade ti e so ayeke mbeni mbakoro-koli asara tënë na mbi na ndö ti asarango ye ti mbi. Lo tene na mbi ti tene mbi na Skolastique e kiri. Lo tene na mbi so apendere amolenge ti mbi so adoit ti vivre na terê ti babâ ti ala. Na ngu 2005, mbi zia lege ti nyongo sämba, mbi ke mbeni wali ni so na mbi na Skolastique e kiri. Na ngu 2006 e sara mariage. Me mbi ngba lakue ti sara ye ti ngangu na lo nga mbi yeke tene sioni yanga na lo.

LEGE SO BIBLE ACHANGÉ FINI TI MBI

Na ngu 2008, mbeni Témoin ti Jéhovah so iri ti lo ayeke Joël aga na yanga-da ti e ti fa tënë na e, na e mä atënë ti lo ni. Teti anze mingi, lo na mbeni Témoin ti Jéhovah ni so iri ti lo ayeke Bonaventure ayeke manke ape ti ga na yanga-da ti e, na e na ala e yeke sara angangu lisoro na ndö ti Bible. Mbi hunda lani na ala gbâ ti ahundango ndo, mbilimbili na ndö ti buku ti Apocalypse. Mbi ye lani biani ti fa so aTémoin ti Jéhovah ayeke azo so ayeke fa tâ tënë ape. Na tapande, mbi hunda ala lani mbi tene so tongana nyen la si ala peut ti tene so “azo mingi mingi” so a sara tënë ti ala na Apocalypse 7:9 ayeke vivre ande na ndö ti sese, so versê so atene so ala luti na devant ti trône ti Nzapa nga na devant ti trône ti Molenge ti taba ni, so ayeke Jésus Christ? Joël akanga bê na lo kiri tënë na ahunda ti mbi ni. Na tapande, lo fa na mbi Ésaïe 66:1 so na yâ ni Nzapa atene so sese ayeke “mbata ti gere” ti lo. Tongaso azo mingi mingi ni ayeke luti na sese na devant ti trône ti Nzapa. Na pekoni, mbi diko Psaume 37:29 so atene azo ti mbilimbili ayeke duti ande na ndö ti sese teti lakue lakue.

A gue ngbii na ndani, mbi yeda ti tene lo manda Bible na mbi. Tongaso, Bonaventure amanda Bible na mbi nga na Skolastique. Na temps so yeke yeke e yeke manda Bible ni, mbi komanse ti sara achangement na yâ ti gigi ti mbi. Mbi manda ti ne wali ti mbi. Mbi ye encore ape ti tene tongana lo ye ti bara mbi, wala lo ye ti hunda mbeni ye na mbi lo sara agenou si, nga mbi tene encore ape so aye kue so ayeke ti sewa ni ayeke gï ti mbi. Mbi arrêté nga ti bâ asioni film. Ti sara achangement ni so ayeke lani ngangu nga a hunda ti tene mbi kanga nzara ti bê ti mbi nga mbi sara terê ti mbi kete.

A sara ambeni ngu tongaso kozo, mbi tokua kozo molenge ti mbi Christian ti gue na ndö ti afami ti mbi na Ouganda. Me na peko ti so mbi diko Deutéronome 6:4-7, mbi bâ so Nzapa atene so a yeke mbi na wali ti mbi la e doit ti bâ lege ti amolenge ti e, so aye nga ti tene ti fa na ala ye so Bible atene. Terê ti e kue anzere lani ngangu so e kue e kiri ndo oko.

NZONI YE SO MBI WARA NA PEKONI

Mbi manda so Jéhovah ayeke Nzapa so ayeke sara nzoni bê na zo, na mbi yeke sûr so lo pardonné mbi awe ndali ti asioni bango ndo nga na asioni sarango ye so mbi yeke na ni lani. A nzere lani na mbi ngangu so Skolastique kue akomanse ti manda Bible. Na lango 4 ti décembre ngu 2010, e use kue e mû fini ti e na Jéhovah, na e wara batême. Fadeso e yeke sara confiance na mba, nga sewa ti e ayeke na ngia ndali ti so e yeke sara ye alingbi na amama-ndia ti Bible. So fadeso, tongana mbi hunzi kua mbi yeke kiri droit na yanga-da, a nzere na wali ti mbi mingi. A nzere nga na lo mingi so fadeso mbi yeke ne lo nga mbi yeke sara ye na lo na nzoni bê, mbi mû desizion ti tene sämba andu encore yanga ti ape nga mbi sara encore ye ti ngangu na zo ape. Na ngu 2015, mbi ga ancien, ye so amû lege na mbi ti mû maboko na azo ti yâ ti congrégation ti e. Na ndö ni, na milieu ti amolenge ti e oku, ota awara batême.

Na temps so aTémoin ti Jéhovah ayeke manda lani Bible na mbi, mbi ye gï dä gï tongaso na tënë so ala fa na mbi ape. Me ye so apika bê ti mbi mingi ayeke so, ti kiri tënë na ahunda ti mbi, ala yeke sara kua na Bible. Mbi na Skolastique e comprendre so azo so atene ala yeke voro tâ Nzapa adoit ti sara ye alingbi na aye so lo fa, sân ti woko yâ ni. Mbi kiri merci mingi na Jéhovah so lo mû lege na mbi ti lë mbeni kpengba songo na lo nga ti voro lo legeoko na ambeni zo so ayeke voro lo be-ta-zo. Tongana mbi gbu li na ndö ti gigi ti mbi, mbi yeke na kite oko ape so grâce na mungo maboko ti Nzapa, zo kue apeut ti sara achangement so zo adoit ti sara ti nzere na lê ti lo.