A dépensé amilliard mingi ndali ti bira: Vrai wungo ti nginza ni kue ayeke oke?

Wungo ti aye so a dépensé ndali ti bira ayeke mingi.

• “Na yâ ti ngu so ahon, agouvernement na yâ ti dunia kue adépensé 2 200 milliard ti dollar ndali ti abira. Wungo ti nginza ni so ayeke mingi ahon ati so a dépensé ni ndali ti abira na yâ ti ambeni ngu so ahon.”—The Washington Post, 13 février 2024.

Wungo ti nginza ni so ayeke mingi. Bâ mbeni tapande ni: Bira ti Ukraine.

• Aturugu. Mbeni gingo nda ti ye afa so, wungo ti aturugu so a fâ ala wala so awara kä asi presque 500 000 depuis na temps so bira ni akomanse asara ngu use awe.

• Acivil. Tongana ti so ONU (Organisation des Nations unies) afa, wungo ti azo so akui wala so awara kä ahon 28 000. Me, mbeni sous-secrétaire général ti ONU atene: “A yeke ngangu ti hinga wungo ti acivil kue so akui na ngoi ti bira so.”a

Wungo ti azo so abâ pasi ndali ti bira nga ndali ti akpale so aga na pekoni na yâ ti dunia kue ayeke mingi.

• 114 million. A yeke wungo ti azo kue so aquitté ndo ti ala ndali ti bira wala so a sara ye ti ngangu na ala na septembre 2023.

• 783 million. A yeke wungo ti azo so ayeke bâ pasi ndali ti nzara. “Mingi ni, abira la ayeke na gunda ti nzara, tongana a mû azo 100 na yâ ti dunia, azo 70 so ayeke bâ pasi ndali ti nzara ayeke vivre na yâ ti ando so bira nga na sarango ye ti ngangu na zo ayeke dä.”—Programme alimentaire mondial.

Eskê mbeni lâ bira ayeke hunzi ande? Eskê mbeni lâ siriri ayeke mû ande ndö ti sese? Eskê mbeni lâ azo na yâ ti dunia kue apeut ande ti wara gbâ ti kobe si kpale ti nzara nga na yere ahunzi? Bible atene nyen na ndö ni?

Ngoi ti mbeni bira

Bible atene kozo awe so abira ayeke mû yâ ti dunia kue, na a fa ni na lege ti azo ti kpengo na mbarata.

• “Mbeni mbarata ni asigi, terê ti lo abe tongana wâ; a mû lege na zo so aduti na ndö ti lo ti zi siriri na ndö ti sese si ala fâ terê na popo ti ala, na a mû na lo mbeni kota épée.”—Apocalypse 6:4.

Na peko ti zo ti kpengo na mbarata so, ambeni use so amû peko ti lo so aye ti sara tënë ti nzara nga na kuâ la ayeke na gunda ti akobela so amû ndo nga na ti ambeni ye nde (Apocalypse 6:5-8). Ti hinga aye mingi na ndö ti prophétie ti Bible so nga na ndani so e peut ti duti sûr so prophétie ni ayeke ga tâ tënë laso, diko article “Azo wa la ayeke na ndö ti ambarata osio so?”

Mbeni kekereke so siriri ayeke duti ande dä

Na yâ ti kete ngoi, azo ayeke sara ande kua pëpe na amosoro ti gbe ti sese ti sara na bira. Me, azo la ayeke sara ande ye ni so ape. Bible atene:

• Nzapa ayeke sara ande si “abira ahunzi na ndö ti sese kue.”—Psaume 46:9.

• Nzapa ayeke sara ande si akpale ti peko ti bira ahunzi. “Lo yeke mbô ande ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe. Angbene ye ni ahon ti ala awe.”—Apocalypse 21:4.

• Nzapa ayeke sara ande si zo kue aduti na siriri. “Azo ti mbi ayeke sara kodro na ndo so siriri ayeke dä, na yâ ti ada so ayeke bata zo nzoni nga na ando so asara si ala wu terê ti ala nzoni.”—Ésaïe 32:18.

Tongana ti so aprophétie ti Bible afa, abira nga na ambeni ye so e yeke bâ ni laso afa so ngoi ti siriri ni so aga nduru awe.

Tongana nyen la Nzapa ayeke ga ande na mbeni gigi ti kekereke so siriri ayeke duti ande dä? Lo yeke ga ande na ni na lege ti gouvernement ti lo so ayeke na yayu wala Royaume ti lo (Matthieu 6:10). Ti hinga Royaume ni ayeke nyen nga na ye so a yeke sara ande ndali ti mo, bâ nduru vidéo Royaume ti Nzapa ayeke nyen?