Nzapa ayeke dä biani?
Kiringo tënë ti Bible
En. Bible afa aye mingi so afa polele so Nzapa ayeke dä biani. Bible a-encouragé e ti duti na mabe na Nzapa, na e yeda gï tongaso ape na afango ye ti abungbi ti Nzapa, me e sara kua na “hingango ndo” ti e nga na ‘lege ti mango yâ ti aye.’ (aRomain 12:1; 1 Jean 5:20, kete tënë na gbe ni). Bâ afango ye so na gbe ni ge so aluti na ndö ti Bible:
Lege so aye ayeke tambela na lege ni na yâ ti dunia afa so mbeni zo so acréé aye ayeke dä. Bible atene: “Biani, da oko oko kue, mbeni zo la asara ni, me zo so asara aye kue ayeke Nzapa.” (aHébreu 3:4). Atâa so tënë so ayeke simple, mingi ti azo so amanda mbeti ayo acomprendre ni ape.a
E azo, e ye ka ti hinga ndani so e yeke na fini; a yeke mbeni nzara so ayeke sara e lakue, même si e te kobe. Bible airi nga ni “bezoin ti aye ti yingo,” so andu nzara so e yeke na ni ti hinga Nzapa nga ti voro lo (Matthieu 5:3; Apocalypse 4:11). Bezoin ti aye ti yingo so afa polele so Nzapa ayeke dä nga afa so Lo la lo créé aye kue na lo ye e, lo ye nga ti tene e hinga lo (Matthieu 4:4).
A sû aprophétie ti Bible asara ngu saki mingi na aga tâ tënë gï tongana ti so a tene lani. Akete kete ye kue so a fa na yâ ti aprophétie ni afa biani so alondo na zo ape (2 Pierre 1:21).
Azo so asû lani Bible ahinga ye na ndö ti science ahon azo ti ngoi ti ala. Na tapande, giriri azo apensé so sese ayeke na ndö ti mbeni nyama, tongana doli, cochon ti ngonda wala bagara. Me, Bible atene so Nzapa ‘azia sese na ndö ti ye oko pëpe.’ (Job 26:7). Legeoko nga, Bible afa so sese ayeke “ronde ronde” wala “tongana ballon.” (Ésaïe 40:22, kete tënë na gbe ni.) Mingi ti azo apensé so ayeke Nzapa la afa aye ni na azo so asû Bible ni, ye so la asara si ala wara mara ti hingango ye ni so.
Bible akiri tënë na gbâ ti angangu hunda, ahunda so tongana zo awara kiringo tënë na ni ape lo peut ti tene so Nzapa ayeke dä ape. Na tapande: Tongana Nzapa ayeke na ngangu mingi nga lo ndoye azo, ngbanga ti nyen la pasi na sarango ye ti sioni ayeke na yâ ti dunia? Ngbanga ti nyen la bungbi ti nzapa ayeke pusu azo mingi ti sara sioni ahon ti sara nzoni? (Tite 1:16).
a Na tapande, mbeni astronome so iri ti lo ayeke Allan Sandage atene mbeni tënë na ndö ti aye so ayeke na yâ ti dunia, lo tene: “Mbi bâ so ayeke ngangu ti yeda so mara ti ordre so abâ gigi gï tongaso. Ambeni ndia ayeke dä so ayeke fa lege na aye ni so. Nzapa ayeke mbeni zo so mbi gi li ti mbi na lo gbä, me ti bâ aye so ayeke na yâ ti dunia afa biani so mbeni zo la asara ni.”