Na peko ti so a zingo Jésus na kuâ, eskê lo yeke lani na terê ti zo wala ti yingo?
Kiringo tënë ti Bible
Bible atene so “a fâ [Jésus] na yâ ti mitele, me a kiri na lo na fini [wala a zingo lo na kuâ] na yâ ti yingo.”—1 Pierre 3:18; Kusala 13:34; 1 aCorinthien 15:45; 2 aCorinthien 5:16.
Atënë so Jésus lo wani lo tene lani afa so a yeke zingo lo na kuâ na terê ti yingo. Lo tene lani so lo yeke mû ‘nyama ti terê ti lo . . . ndali ti fini ti dunia so,’ tongana ye so a futa ti zi azo (Jean 6:51; Matthieu 20:28). Tongana fade a kiri na lo na fini na terê ti zo, so ti tene na nyama ti terê so mênë ayeke dä, andâ ye so a futa ti zi azo so ayeke ga ye senge senge. Me ye ni apassé lani tongaso ape, ndali ti so Bible atene so lo mû sandaga ti nyama ti terê ti lo nga na mênë ti lo “gï fani oko biani biani awe”.—aHébreu 9:11, 12.
Me tongana a zingo Jésus na kuâ na terê so ayeke ti yingo, a sara tongana nyen si adisciple ti lo abâ lo lani?
Acréature so ayeke na terê ti yingo apeut ti mû forme ti zo. Na tapande, a-ange so amû ândö forme ti zo ate même kobe nga anyon sämba legeoko na azo (Genèse 18:1-8; 19:1-3). Me, ala ngbâ lani lakue acréature ti yingo so apeut ti zia terê ti ala ti zo ni.—aJuge 13:15-21.
Na peko ti so Jésus azingo na kuâ, teti mbeni kete ngoi lo mû forme ti zo tongana ti so a-ange asara ândö. Me teti so lo yeke mbeni créature ti yingo, lo peut ti sigi gï gbagburu tongaso nga ti girisa na lê ti azo (Luc 24:31; Jean 20:19, 26). Aforme ti terê ti zo so Jésus amû lani ayeke nde nde. Ndali ni la même adisciple ti lo so ayeke nduru na lo mingi ahinga lo gï na lege ti tënë ti lo nga na aye so lo sara.—Luc 24:30, 31, 35; Jean 20:14-16; 21:6, 7.
Na ngoi so Jésus asi na Thomas, lo mû terê ti zo so aplace ti kä ayeke na terê ti lo. Jésus asara tongaso ti kpengba mabe ti Thomas so ayeke lani na kite so a zingo lo na kuâ awe.—Jean 20:24-29.—John 20:24-29.