Ti duti nzoni-kue aye ti tene nyen?

Kiringo tënë ti Bible

Ti duti nzoni-kue aye ti tene ti duti na sioni oko pëpe. Tënë ti Hébreu so a kiri peko ni na “nzoni-kue” alondo na mbeni tënë so ndani aye ti tene “ ti zia ye ni nde.” Tongaso, tongana a tene mbeni ye ayeke nzoni-kue aye ti tene so a yeke sara kua na ye ni tongana ti so a yeke sara na tanga ti aye ape, wala a zia ni nde ndali ti kua ti Nzapa, mbilimbili ngbanga ti so sioni oko wala saleté ayeke na terê ni ape.

Nzapa ayeke nzoni-kue kue kue. Bible atene: “Mbeni zo so ayeke nzoni-kue tongana mo Jéhovah ayeke dä pëpe.”a (1 Samuel 2:2). Nzapa la ayeke na droit ti lu andia na ndö ti ye so ayeke nzoni-kue.

A peut ti sara kua na tënë “nzoni-kue” na ndö ti aye kue so andu Nzapa, mbilimbili aye so a zia ni nde ndali ti vorongo lo. Na tapande, Bible asara tënë ti:

• Ando so ayeke nzoni-kue: Nzapa atene lani na Moïse so ayeke nduru na terê ti mbeni keke so wâ amû terê ni kue, lo tene: “Ndo so mo luti dä so ayeke nzoni-kue.”​—Exode 3:2-5.

• Angoi so a bâ ni tongana ye so ayeke nzoni-kue: Ândö, azo ti Israël ayeke voro Jéhovah na ngoi ti ambeni matanga so ala yeke sara ni lakue so a iri ni “akota bungbi so ayeke nzoni-kue.”​—Lévitique 23:37.

• Akungba so ayeke nzoni-kue: A iri aye so ayeke sara kua na ni na yâ ti temple ti Nzapa ândö na Jérusalem a tene ‘akungba so a zia ni nde ndali ti kua ti Nzapa.’ (1 aGbia 8:4). A yeke ne mara ti akungba ni so, me lâ oko a voro ni tongana Nzapa ape.b

Eskê mbeni zo so ayeke na siokpari na terê ti lo apeut ti duti nzoni-kue?

En. Nzapa ahunda na aChrétien atene: “A yeke nzoni ala ga nzoni-kue, ngbanga ti so mbi yeke nzoni-kue.” (1 Pierre 1:​16). Tâ tënë, azo so ayeke na siokpari na terê ti ala alingbi lâ oko ape ti sara ye alingbi kue na andia ti Nzapa so andu tënë ti dutingo nzoni-kue. Me, tongana mbeni zo asara ye alingbi na andia ti Nzapa so ayeke mbilimbili, a lingbi ti bâ lo tongana zo so “ayeke nzoni-kue, so anzere na Nzapa.” (aRomain 12:1). A yeke hinga so mbeni zo aye ti duti nzoni-kue na lege ti atënë ti yanga ti lo nga na asarango ye ti lo. Na tapande, zo ni ayeke sara ye alingbi na wango ti Bible so ahunda na e ti ‘ga nzoni-kue, ti gbanzi terê ti e na lango-sioni’ nga ti ga “azo so ayeke nzoni-kue na yâ ti sarango ye ti ala kue.”​—1 aThessalonicien 4:3; 1 Pierre 1:​15.

Eskê zo apeut ti perdre dutingo nzoni-kue so lo yeke na ni na lê ti Nzapa?

En. Tongana mbeni zo asara encore ye alingbi na andia ti Nzapa ape, Nzapa ayeke zia lege ti bâ lo tongana zo so ayeke nzoni-kue. Na tapande, a sû mbeti ti Hébreu so ayeke na yâ ti Bible na “aita so ayeke azo ti be-vulu,” me a tene na ala ti sara hange si “mbeni sioni bê so mabe amanke ni amaï na yâ ti . . . ala pëpe ngbanga ti so [ala] gue yongoro na Nzapa so ayeke na fini.”​—aHébreu 3:​1, 12.

Aye so azo atene na ndö ti dutingo nzoni-kue

Aye so azo atene: Ti duti kumbamba ayeke sara si zo aga nzoni-kue ahon ti kozo.

Tâ tënë ni: Mbeni zo apeut ti soro ti ngbâ kumbamba, me dutingo kumbamba la ayeke sara pëpe si lo ga nzoni-kue na lê ti Nzapa. A yeke tâ tënë so azo so angbâ kumbamba alingbi ti mû terê ti ala mingi ti sara kua ti Nzapa (1 aCorinthien 7:​32-​34). Me, Bible atene so azo so asara mariage awe alingbi nga ti ga nzoni-kue. Pierre, so ayeke lani mbeni bazengele ti Jésus, ayeke mbeni koli so asara mariage.​—Matthieu 8:​14; 1 aCorinthien 9:5.