Mungo maboko na ngoi ti akota kpale na ngu 2023: “E bâ ndoye ti Jéhovah na mbage ti e”

Bible atene kozo awe so “mara ayeke londo ande na bira na terê ti mbeni mara” nga akpale ayeke duti dä na “ngoi so aye ti ngoi so ayeke gue ti hunzi.” (Matthieu 24:3, 7). E bâ tongana nyen la atënë ti prophétie ni so aga tâ tënë na ngu ti kusala ti 2023.a Me, atâa so abira nga na angu so asuku amû ndo wala yengingo ti sese asi lani na yâ ti akodro 100 tongaso, aTémoin ti Jéhovah asara ye na ndoye tongana ti Jéhovah. Na lege wa?

Na yâ ti ngu ti kusala ti 2023, akota kpale so aita ti e awara nga na ati so azo la ayeke na gunda ni ahon 200 tongaso. Nginza kue so a-association ti aTémoin ti Jéhovah adépensé ahon kutu bale-oko ti dollarb so aita na yâ ti dunia kue amû na lege ti a-offrande ti aidé na ngoi ti akota kpale. Na ndö ti a-offrande so, mingi ti aita so ayeke na ndo so kpale ni asi dä ayeke mû nga a-offrande na bê ti ala kue. Aita ti e ayeke tingbi na gbâ ti akota kpale, bâ tongana nyen la a sara lani kua na a-offrande mo so mû ti aidé na aita ti e so awara ambeni kota kpale ni use.

“Tâ ndoye ayeke biani dä”

Na ambeni ndo na Nigéria, ngu ayeke suku ka amû ndo. Me, na octobre 2022, ngu ni so asuku abuba ayaka ahon hectare 676 000 tongaso nga azo ahon kutu use aquitté ndo ti ala. Hio, filiale ti Nigéria azia na sese aKomite ti mungo maboko na angoi ti kpale ti leke aye ti aidé aita nga ti mû maboko na ala na lege ti yingo.

Ye so akpale ni asara na ndö ti aita

• Awafango tënë 7 505 aquitté ndo ti ala

• Ada so mbeni mbage ni abuba wala so abuba kue ayeke 860

• Ngu amene aDa ti Royaume 90 nga na mbeni Da ti assemblée oko

Lege so a sara kua na a-offrande

A dépensé lani nginza ahon kutu 250 000 ti dollar ndali ti akota kpale so, ye so andu aye tongana:

• Loso, aharicot nga na spaghetti

• Amatelas nga na amoustiquaire.

• Lekengo ada wala lekengo peko ti ambeni so abuba

Tongana nyen la aita ti e asara lani kua nzoni na a-offrande so? Mbeni lege ni ayeke ti vérifié ada ni oko oko kue nzoni ti bâ wala apeut ti leke ambeni ye so abuba na terê ni. Tongana a bezoin ti leke da ni kue, a yeke sara ni simple ti lingbi na fason ti lekengo ada ti ndo ni.

Aita so awara mungo maboko ni akiri singila mingi ndali ni. Mbeni ita-wali ni atene: “Sukungo ti ngu ni asara si gigi ti e aga kirikiri ndali ti so ngu ni amene ayaka ti e kue na e yeke na ndo ti lango ape. Bê ti e adë lani na temps so na yâ ti même lango ni aita aga ti aidé e nga ti mû na e mbeni nzoni ndo ti lango. Nga, filiale atokua lani akobe na e. Ahon gbungo li ti e ti bâ gango tâ tënë ti Jean 13:34, 35 na yâ ti gigi ti e. . . . Tâ ndoye ayeke biani dä. Mbi na azo ti sewa ti mbi, e kiri singila na bê ti e kue na aita so aga amû maboko na e na tâ ngoi ni.”

Ambeni zo abâ kua so e sara ti mû maboko na azo so. Mbeni mokonzi na Sabagreia, (gbata ti Bayelsa) atene: “Na yâ ti dunia kue, gbâ ti abungbi wala abungbi ti vorongo nzapa ayeke dä, me gï aTémoin ti Jéhovah la ayeke sara mara ti aye tongaso. . . . Bungbi ti [ala] la ayeke oko ti abungbi so ayeke nzoni mingi na yâ ti dunia kue.”

“E bâ ndoye ti Jéhovah na mbage ti e”

Na février 2023, wâ agbi ando ahon 400 nga abuba aye ngangu na Chili. Konongo ti ndo so agbi ahon hectare 430 000 nga akota ndokua ti kua agbi. Azo nduru na 8 000 tongaso aquitté ndo ti ala. Kete na peko ti kota kpale ni so, filiale akomanse ti leke aye ti tene a mû maboko na aita.

Ye so akpale ni asara na ndö ti aita

• Awafango tënë 222 aquitté ndo ti ala

• Ada 20 abuba kue

Lege so a sara kua na a-offrande

A dépensé lani nginza ahon kutu 200 000 ti dollar ndali ti akota kpale so, ye so andu aye tongana:

• Kobe nga na ngu

• Essence, akungba ti nettoyengo na aye nga na ayorö

• Lekengo peko ti ada so abuba

Vundu ahon ndö ti mbeni sewa ti bâ so ala perdre aye ti ala kue, so na popo ni a yeke wara da ti ala nga na buze ti ala. Ye so asara si ala yeke na mbeni ye oko ape ti vivre na ni. Ambeni ngoi na pekoni, vundu asara lani sewa ni so mingi ti bâ so da ti ala ayeke encore dä ape. Me tongana ala bâ so kua ti lekengo da ti ala ni ayeke gue na li ni, terê ti ala akomanse ti nzere. Ti bâ ndoye so avolontaire ayeke na ni a-aidé aita ti gbu ngangu na yâ ti kpale ni. Ye so avolontaire ni asara andu bê ti azo ti sewa ni na ala nga kue ague abungbi legeoko na avolontaire ni ti leke da ti mbeni ita.

Kua ti mungo maboko so andu bê ti aita ti e mingi. Mbeni ita-koli atene: “Ye so Jéhovah aleke na lege ti aKomite ti mungo maboko na angoi ti kpale ayeke tâ pendere mingi. Lango oko na peko ti ngangu kpale ni, aita ni aga na ndo so ye ni apassé dä ti mû na aita ti ndo ni aye so ala yeke na bezoin ni. Ti diko ye na ndö ti aye so a leke ti mû maboko na aita na ngoi ti akpale na yâ ti dunia ayeke kpengba zo mingi. Me, tongana ye ni asi na mo ayeke tâ nde mingi. Mo yeke bâ na nene ni mingi ye so bungbi ti Jéhovah asara; tongana nyen la aita asara ye tongana ti Jéhovah, ala mû na e aye so e yeke na bezoin ni ti duti na nzoni seni, ti kpengba mabe ti e nga ti tene e ngbâ ti duti na nzoni bango ndo. E bâ ndoye ti Jéhovah na mbage ti e.”

Na andangba lango ti nda ni so, e yeke ngbâ ande ti bâ akota kpale so ayeke gue gï guengo na li ni (Luc 21:10, 11). Me, grâce na congrégation ti aChrétien e bâ so Gbia ti e so asara ye na ndoye, Jésus Christ, ayeke na e “lango oko oko kue juska na lâ ni so aye ti ngoi so ayeke gue ti hunzi.” (Matthieu 28:20). Na lege ti a-offrande so ala yeke mû na yâ ti dunia kue na lege ti donate.jw.org wala na mbeni lege nde, na lege ti ngoi nga na ngangu so ala yeke mû, ala fa so ala ye ti mû maboko na Royaume ni nga na Gbia ni so asara ye na ndoye. E tene merci mingi na ala ndali ti bibe ti mungo ye so ala yeke na ni.