Aprésentoir ayeke “mbeni tënë ti témoin ndali ti amara kue”

Na yâ ti angu bale-oko so ahon, e yeke sara kua na aprésentoir ti gboto lê ti azo na ndö ti tâ tënë. Na yâ ti dunia kue, azo ahinga aprésentoir ti e. Aprésentoir ni ayeke pendere nga ayeke ngangu ape ti sara kua na ni. Peut-être mo yeke yeda na tënë so mbeni ita-wali so iri ti lo ayeke Asenata na Pologne atene, lo tene: “Fason so a leke na présentoir ni ayeke simple na ayeke pendere. A yeke ngangu ape ti sara kua na ni nga ti hon na ni.”

Eskê mo hunda terê ti mo awe tongana nyen la a leke aprésentoir ni?

Fason so a leke na ni ayeke simple

Na ngu 2001, Bebungbi ayeda ti tene aita na France akomanse ti sara kua na akode ti fango tënë nde nde na ando so azo ayeke dä mingi, so andu nga sarango kua na présentoir. Ala tara ti sara kua na mara ti aprésentior nde nde. Na tapande, ala sara kua na valise nga na poussette ti zia ambeti ti e dä ti tene azo abâ ni. Na pekoni, filiale ti France asoro mbeni modèle so awafango tënë asara kua na ni teti angu mingi.

Terê ti aita ti France anzere ti bâ aye ti peko ti fini kode ti fango tënë na ando so azo ayeke dä mingi. Na ngu 2011, Bebungbi ayeda ti tene a sara kua na mbeni fini kode ti fango tënë na aprésentoir nga na atable na ando so azo ayeke dä mingi na gbata ti New York, na États-Unis. Apionnier so amû mbage na yâ ti kapa ni so aga ti bâ so aprésentoir ayeke na a-avantage mingi ndali ti so ayeke facile ti tene zo ahon na ni. Apionnier ni afa nga ambeni mbilimbili ye ti tene a amélioré forme ti aprésentoir ni. A leke lani akozo présentoir ni na keke nga ane mingi, na a yeke ngangu ti tene a monté na ni na escalier nga ti descend na ni. Tongaso, a kiri a leke ni ti tene ayapu, me mingi ape si pupu ahon na ni ape. A leke fini présentoir ni na akota roue so kpengba si apeut ti hon na ni na ndö ti alege nde nde. Na ndö ni, a zia mbeni kete place na terê ni ti tene a zia ambeni mbeti dä.

Kapa ni aréussir lani. Tongaso na ngu 2012, Bebungbi ayeda ti tene a fa tënë na présentoir na yâ ti dunia kue. A leke ti tene mbeni ndokua aleke ni gbani na aye so ane mingi ape me so akpengba.

Na yâ ti angu so ahon, a sara akete changement na terê ti présentoir ni. Na tapande, na ngu 2015, a zia mbeni bongo ti ngu na devant ti présentoir ni so ayeke transparent. Dina, so ayeke na kodro ti Géorgie, a-apprécié ye ni so. Lo tene: “So présentoir ni ayeke na ‘bongo ti ngu’ asara si abata ambeti ni.” Na ngu 2017, a sigi na a-affiche na ambeni yanga ti kodro, so tongana a collé ni na terê ti présentoir ni, zingo ni ason ape. Tomasz, mbeni ita-koli na Pologne, atene: “Angbene affiche so e sara na kua, zingo ni ayeke lani ngangu. Afini affiche ni so ayeke pendere mingi.” Na ngu 2019, a changé ambeni ye na terê ti présentoir ni nga na fason so a leke na ni tongaso si abuba hio ape.

Sigingo na présentoir

Mbeni ndokua la ayeke leke aprésentoir ni, na pekoni a yeke kangbi ni na yâ ti dunia kue. Ti ndembe so, a yeke mû 43 dollars (26 176 FCFA) ti leke na mbeni présentoir oko, me nginza ti tokuango ni nga na ti ambeni ye nde ayeke na yâ ni ape. Juska laso, a mû nginza ahon kutu 16 ti dollars (9 664 736 000 FCFA) ti leke na aprésentoir, nga a tokua aprésentoir ahon 420 000 na acongrégation na yâ ti dunia kue.

Ti sara kua nzoni na a-offrande so azo amû, a yeke sara commande ti aprésentoir ni gbani. Na ndö ni, acongrégation apeut ti sara commande ti ambeni ye ti terê ti présentoir ni so abuba si ala wani aleke ni ahon ti hunda ti tene a tokua mbeni fini ni na ala.

Sarango kua na présentoir ti fa na tënë

Anzere na awafango tënë na yâ ti dunia kue ti sara kua na aprésentoir. Martina, so ayeke na Ghana, atene: “Mingi ni, tongana e yeke fa tënë e la e yeke gue na mbage ti azo. Me, ye so mbi ye na présentoir ayeke so azo la ayeke ga na mbage ti e. E peut même ti fa tënë na azo so ayeke hon na terê ni.”

Na yâ ti mbeni kodro nde ti Afrique, mbeni koli aga na terê ti présentoir na lo mû ambeti na yanga kodro ti lo. Yenga oko na pekoni, lo kiri lo ga na lo tene: “Mbi diko ambeti ni kue. Aye so mbeti ni afa ayeke important mingi. Mbi yeke gue na kete kodro ti mbi ti fa tënë ni na azo ti sewa ti mbi.” Kete kodro ti lo ni ayo kilomètre 500 tongaso. Nze use na pekoni, lo kiri lo ga na lo tene: “Azo ti kete kodro ti mbi adiko ambeti ni kue, na aye so ala diko na yâ ni anzere na ala mingi. Ala ye ti ga aTémoin ti Jéhovah. Me, ala yeke na aquestion. Na tapande, ala hinga so ti tene ala wara batême, a lingbi a yôro ala kue na yâ ti ngu. Me, kota ngu ayeke nduru na kete kodro ti e ape. Eskê e doit ti ga ge ti wara batême?” Aita ni amû na koli ni numéro ti mbeni pionnier so atene yanga ti kodro ti lo. Depuis na ngoi ni so, ala yeke sara lisoro lakue.

Anzere na e ti bâ tongana nyen la aita ayeke sara kua na aprésentoir ti fa tënë “na ndö ti sese kue so azo ayeke dä tongana mbeni tënë ti témoin ndali ti amara kue.” (Matthieu 24:14). Tongana nyen la e yeke wara nginza ti tene a leke na aprésentoir ni? A yeke na lege ti a-offrande so azo ayeke mû ndali ti kua ti fango tënë na yâ ti dunia kue, so mingi ni a yeke mû ni na lege ti donate.jw.org. Merci na ala ndali ti bibe ti mungo ye so ala yeke na ni.