Aye so e sara ti sigi na film: Nzoni tënë na ndö ti Jésus

Na popo ti aye so aTémoin ti Jéhovah ayeke ku ni kungo na yâ ti ngu so, a yeke wara na popo ni sigingo ti Kozo épisode ti film Nzoni tënë na ndö ti Jésus. Mingi ti azo abâ kozo épisode ni so awe. So a yeke kozo épisode ti a-épisode 18 ti film so la. Aye wa la aita asara ti sigi na a-épisode so nga tongana nyen la ala nga kue amû maboko dä?

Bango lege ti a-acteur nga na a-équipe ti sarango film ni

A sara mingi ti asérie ti film Nzoni tënë na filiale ti Australasie. Azo 50 wala 80 tongaso ayeke dä na ngoi so a yeke filmé ascène oko oko.a Aita ayeke mû ye ti tengo na ndapre, na midi nga na lakui na a-acteur ni nga na a-équipe ni. A yeke sara programme ti tongo akobe ni ayenga mingi kozoni. Esther, so ayeke sara kua na ndokua ti tongo kobe, atene: “E yeke vo akobe ni na aplace nde nde so qualité ni ayeke nzoni nga so ngere ni ayeke moins cher. Nga, e yeke changé lakue aye so e ye ti tö tongaso si e buba kobe na mbana ape.” E yeke dépensé dollar (U.S.) osio tongaso lâ oko oko ndali ti kobe ti zo oko oko.

A-acteur ti e nga équipe ni abezoin gï kobe ape, me ala bezoin nga ti tene a protégé ala. A yeke protégé ala tongana nyen? Na Australie, lâ ayeke su na ndo ayeke chauffé mingi, me lâ ayeke tokua nga gbâ ti arayon ultraviolet. Ti tene lâ asu aita ni nga ndo achauffé ala mingi ape, aita so ayeke mû maboko na kua ni ayeke leke atente nga na ambeni place so adë ti tene azo ni aduti dä. Nga, ala yeke sara kue ti tene acrème so ayeke protégé zo contre sungo ti lâ, aparapluie nga na ngu aduti lakue dä. Kevin, so ayeke sara kua na ndokua ti audio-vidéo, atene: “Mingi ti aita-koli na aita-wali so ayeke sara kua ni ayeke abéthelite, me so ala lango kâ ape. Ala yeke sara akua so nga na ambeni nde na ngia nga ala sara terê ti ala kete. Sân mungo maboko ti ala e peut fade ti hunzi projet ni ape.”

A filmé ambeni ye ni na Béthel ape

Ambeni scène ni apeut fade ti kpa vrai ye ape, tongana a filmé ni na Béthel wala na studio. Ye so la asara si a sara film ni na mbeni ndo nde. Na tapande, tongana a ye ti filmé ascène ti yâ ti Bible, a-acteur ni nga na a-équipe ni ayeke gue na ando so ayo so courant ayeke dä ape, so alege ni ayeke na pavée nga so ada ti ândö ayeke dä, tongaso si ala sara ascène ni. A bezoin ti emballé abongo nga na aye ti kua ni, a mû ni a gue a zia na mbeni nzoni ndo na place so a yeke sara film ni dä. Kozo ti tene a filmé aye ni, acoordinateur ti a-assistant ti équipe ni adoit ti gi bâ wala agroupe électrogène, nzoni ngu nga na nzoni douche ayeke na aplace ni so. A-acteur nga na équipe ti sarango film ni ayeke lango na ndo ti aita ti ndo ni, na yâ ti a-oto, ahôtel wala na yâ ti acabane.

So a yeke filmé ambeni ye ni na Béthel ape asara si ye ni ayeke cher mingi, a mû temps mingi na azo kue so ajoué film ni ayeke fatigué. Tongaso, na ngu 2023, Bebungbi ayeda ti tene a mû million 2 na ndambo ti dollar (U.S.) ti vo na mbeni vidéo mur, tongaso si aye so ayeke fa na yâ ti avidéo ni akpa mo bâ mo tene zo ni ayeke na mbeni ndo nde. Ye so ahunda ti tene e sara kua na a-écran ti vidéo so lê ni ayeke kota nga so a-image ni ayeke claire, tongaso si aye so a yeke filmé ni na yâ ti da, lumière ni akpa ti so ayeke na gigi. Ye so asara si, e dépensé nginza mingi ape ndali ti afilm so e sara ni na Béthel ape. Darren, mbeni membre ti Komite ti filiale ti Australasie, atene: “Ti filmé aye ni na lege ti vidéo mur ayeke sara si a-acteur ni afatigué mingi ape nga ala peut ti kiri ti sara ambeni scène ni tongana bezoin ni ayeke dä. Na tapande, tongana e yeke filmé aye na gigi, e yeke mû gï kete temps ti filmé lindango ti lâ kozo si lâ ni alinda. Me na lege ti vidéo mur ni, e peut ti créé mbeni lindango ti lâ fani mingi tongana bezoin ni ayeke dä, juska ti tene e wara mbeni pendere image ni.”

“Atufa so mbi wara alingbi na sacrifice so mbi sara ape”

E yeke na bezoin ti a-acteur ngbangbo mingi nga na ti gbâ ti a-équipe ndali ti amolongo ti épisode oko oko ti Nzoni tënë. Mo tene ti mo nyen na ndö ti a-effort kue so a sara ti bâ na lege ti ala?

Amber, so ayeke na Melbourne so asara kilomètre 700 ti gue ti mû mbage na mbeni projet, atene: “Gï so mbi si na aéroport, aita ti Béthel a-occupé na mbi nzoni. Mingi ti aBéthélite ni a-invité mbi ti te kobe wala ti nyon thé. Na ndo so e yeke sara film ni dä, azo kue asara si mbi sentir terê ti mbi bien nga mbi bâ so a ye mbi. Mbi wara gbâ ti atufa na ngoi ti voyage so. Atufa so mbi wara alingbi na sacrifice so mbi sara ape.”

Derek, so ayeke sara kua legeoko na équipe ti sigingo na avidéo so, atene: “Gbâ ti adépartement a-aidé e na temps so projet ni akomanse. Mbi kiri singila mingi na aita-koli nga na aita-wali so asara asacrifice ti mû ngoi ti ala, aye ti ala nga na ngangu ti ala ndali ti projet so. Ala yeke sara kua maboko na maboko, ala yapu na kua ni nga ala sara ye na nzoni bê. Jéhovah asara biani tufa na ndö ti e nga na ala kue. Mbi yeke sûr so Jéhovah asara tufa na ndö ti aye ti nzoni so aga na peko ti kua ti e, me nga na ndö ti fason so e sara na kua ni.”

Merci mingi na ala ndali ti a-offrande so ala yeke mû wala ati so ala yeke mû na lege ti donate.jw.org, ye so asara si e wara lege ti sigi na asérie ti vidéo so.