Chapitre 36

Kota mabe ti mbeni kapitani

TONGANA Jésus afa Lisoro ti lo na ndo hoto, lo yeke ndulu na ndambo ti kusala ti fango tene ti lo. So aye ti tene angba na lo gi ngu oko na nze gumbaya ti hunzi kusala ti lo na ndo sese.

Jésus ali fadeso na kodoro ti Capernaüm, a yeke na ndo so si lo leke kusala ti lo. A yeke ge si ambeni ancien ti aJuif aga ti hunda mbeni ye na lo. A yeke mbeni kapitani ti aturugu ti Rome, so lo yeke Juif pepee me mbeni Gentil, si atokua ala.

Wakua ti kapitani so lo ndoyee lo mingi ayeke na kobela na lo ga ndulu na kua na lo ye si Jésus asava kobela ti wakua ti lo. Tongaso aJuif ahunda Jésus mingi ti sala nzobe na kapitani so: “Zo so alingbi na ye so lo hunda mo ti sala, teti lo ye mara ti e, na a yeke lo si asala synagogue na e.”

Jésus ague na ala fade fade. Me tongana ala ga ndulu na da ni, kapitani so ato andeko ti lo na Jésus lo tene: “Seigneur, a lingbi mo ga pepee, teti mbi lingbi pepee si mo li na da ti mbi. Na le ti mbi, mbi lingbi pepee tongaso mbi si na mo pepee.”

Tene so afa na gigi taa-be-ti-molenge ti kapitani so, lo so amu yanga si azo asala ye ti lo lakue! Na peut-être lo bi be ti lo na Jésus, na lo hinga so ndia agbanzi lege na aJuif ti duti na songo na ala so ayeke Juif pepee. Pierre mveni atene: “I mveni, i hinga ndia amu lege pepee na zo so ayeke Juif ti sala be-oko na azo ti mbeni mara nde wala ti gue ti baa ala.”

Na peut-être lo ye pepee si Jésus ake ndia so, na azo adiko sioni tene na li ti lo, tongaso lo tokua andeko na ala hunda na lo: “Mo sala gi tene oko, na fade wakua ti mbi aga nzoni. Teti zo akomande mbi nga, na mbi komande aturugu ti mbi, mbi tene na oko: ‘Mo gue!’ na lo gue. Na mbi tene na mbeni: ‘Ga!’ na lo ga. Na mbi tene na ngbaa ti mbi: ‘Sala so!’ na lo sala.”

Tongana Jésus ama tene so, be ti lo ado. Lo tene: “Mbi tene na i biani, même na popo ti azo ti Israël, mbi wara kota mabe tongaso pepee.” Na peko ti so lo sava tele ti wakua ti kapitani so, Jésus angba biani ti fa na gigi so ala so ayeke aJuif pepee so ayeke na mabe fade ala yeke wara adeba nzoni so aJuif so ayeke na mabe pepee ake.

Jésus atene: “Fade azo mingi alondo na mbage ti to na ti do na fade ala duti na table na Abraham na Isaac na Jacob na ya royaume ti yayu; me fade abi amolenge ti royaume ni na bingo na gigi. Na ka fade ala toto na ngule na ala te pembe ti ala.”

‘Amolenge ti royaume (...) so abi ala na bingo na gigi’ ayeke aJuif na lege ti mitele so ake hiringo ndo so Jésus afa na ala kozoni ti komande lege-oko na Christ. Abraham, Isaac na Jacob ayeke fa ti Royaume so Nzapa aleke ni. Jésus afa so fade awara aGentil ti duti na table ti yayu, “na ya royaume ti yayu”. Luc 7:1-10; Matthieu 8:5-13; Kusala 10:28.

▪ Ngbanga ti nyen aJuif ahunda mbeni ye na Jésus mingi na iri ti mbeni Gentil so ayeke kapitani ti aturugu?

▪ A yeke peut-être ngbanga ti tene wa si kapitani ahiri Jésus ti li na da ti lo pepee?

▪ Tene ti ndani ti Jésus aye ti tene nyen?