Chapitre 130

Na Kota Ngu ti Galilée

ABAZENGELE akiri fadeso na Galilée, lege-oko tongana Jésus atene kozoni na ala ti sala. Ye oko, ala hinga mbilimbili pepee ye so ala yeke sala ka. Na peko ti mbeni kete ngoi, Pierre atene na Thomas, Nathanaël, Jacques na ita ti lo Jean, na ambeni bazengele use: “Mbi gue ti gi susu.”

Ala omene atene: “E gue na mo nga.”

Na bi so kue, ala wara ye oko pepee. Tongana nda ade, Jésus asi aluti na tele ti ngu, me abazengele ahinga pepee so a yeke lo. Lo tene na ngangu: “Akete molenge, i yeke na ye ti te?”

Ala dekongo tongana ala yeke na ya ngo: “Pepee!”

Lo tene: “I sa gbanda ni na mbage ti koli ti ngo na fade i wara asusu.” Tongana ala sala ni, ala lingbi gboto gbanda ni pepee, teti asusu asi singo.

Jean adekongo: “A yeke Seigneur!”

Tongana Pierre ama tene so, lo kanga bongo ti lo ti ndoni, teti lo lungula bongo ti lo awe, na lo ti na ngu. Lo gbu ngu teti ndulu na mètre bale gumbaya ti si na yanga ti ngu. Ambeni bazengele amu peko ti lo na ya kete ngo na gbanda so asusu asi singo da.

Tongana ala zu na sese awe, ala baa mbeni wa ti pindiri ka na susu ayeke na ndoni, na mapa ayeke nga. Jésus atene: “Ga na ambeni susu so i gbu ala fade fadeso.” Pierre azu na ya ngo, lo gboto gbanda ni na sese. Na ya ni akota susu ayeke ngbangbo oko na bale oku na ndoni ota!

Jésus atisa ala: “Ga, i te kobe.”

Mbeni oko na popo ti ala ayeke na ngangu ti hunda lo tene so pepee: “Mo yeke zo wa?” teti ala kue ahinga a yeke Jésus. So ayeke fani mbasambala ni so lo fa tele ti lo na peko ti londongo ti lo na popo ti awakinda, na fani ota ni so lo fa tele ti lo na abazengele mingi. Ti fadeso lo kangbi kobe, lo mu na ala oko oko mapa na susu.

Tongana ala hunzi ti te kobe awe, Jésus, na ngoi so lo baa na mbage ti asusu mingi so ala gboto, ahunda Pierre: “Simon, molenge ti Jean, mo ndoyee mbi ahon ala so?” Lo ye ti tene: Mo ye kusala ti mo ti gingo susu mingi ahon kusala so mbi leke mo ndali ni?

Pierre akiri tene: “Mo hinga mbi yeke na ndoyee teti mo.”

Jésus atene na lo: “Mu kobe na amolenge ti ngasangbaga ti mbi.”

Ti fani use ni lo kiri lo hunda: “Simon, molenge ti Jean, mo ndoyee mbi?”

Pierre akiri tene na be ti lo kue: “Biani, Seigneur, mo hinga so mbi ndoyee mo.”

Jésus akiri amu yanga na lo: “Bata akete ngasangbaga ti mbi.”

Na pekoni, ti fani ota ni, lo hunda: “Simon, molenge ti Jean, mo ndoyee mbi?”

Fadeso be ti Pierre aso. Lo hunda tele ti lo wala Jésus ade kite na ndo dutingo be-taa-zo ti lo. Teti, a ninga pepee, tongana ague na Jésus na ngbanga fade tene ti fini ti lo, Pierre atene lege ota so lo hinga lo pepee. Tongaso Pierre atene: “Seigneur, mo hinga ye kue; mo hinga mbi ye mo.”

Jésus atene na lo ti fani ota ni: “Mu kobe na akete ngasangbaga ti mbi.”

Na ndo so Jésus amu Pierre tongana tapande ti yoro na ya be ti ambeni kusala wa lo ye si ala sala ni. Ngbanga ti so a ngba gi kete na fade lo zia sese ni, Jésus aye si ala mu li ni na kusala ti bata nzoni azo so fade ayeke ga ande na ala na ya yangbo ti Nzapa.

Lege-oko tongana akanga Jésus na afa lo teti lo sala kusala so Nzapa amu na lo ti sala, lo fa polele fadeso so fade aye tongaso ayeke si ande na Pierre nga. Jésus atene na lo: “Tongana mo de pendere, mo mveni mo yu bongo na tele ti mo, na mo gue na ndo so be ti mo aye. Me tongana mo ga mbakoro, fade mo ye maboko ti mo, na fade mbeni zo ayu na mo bongo, lo yo mo na lo gue na mo na ndo so be ti mo ayeda pepee.” Ataa kua ti ngangu aku Pierre, Jésus awa lo tongaso: “Mo ngba ti tambela na peko ti mbi.”

Tongana Pierre agi tele ti lo, lo baa Jean na lo hunda: “Seigneur, fade zo so asala nyen?”

Jésus akiri tene: “Tongana mbi ye lo ngba juska mbi kiri, tene ti mo ayeke da? Mo ngba ti tambela na peko ti mbi.” Adisciple mingi abi be ti ala so tene ti Jésus so aye ti tene Jean ayeke kui ande pepee. Ye oko, tongana bazengele Jean afa ndani ngoi mingi na pekoni, Jésus atene pepee so Jean ayeke kui la oko pepee, me Jésus atene gi so: “Tongana mbi ye lo ngba juska mbi kiri, tene ti mo ayeke da?”

Na pekoni Jean amu kota tene so: “Jésus asala mbeni ye mingi nga, me tongana ala sala ye so kue na mbeti, mbi hinga pepee tongana kota ti sese ni alingbi na mbeti so fade ala sala.” Jean 21:1-25; Matthieu 26:32; 28:7, 10.

▪ Ye nyen afa so abazengele ahinga mbilimbili pepee ye so ala lingbi ti sala na Galilée?

▪ Na tele ti Kota Ngu ti Galilée, tongana nyen abazengele ahinga Jésus?

▪ Fadeso Jésus afa tele ti lo fani oke na peko ti londongo ti lo na popo ti awakinda?

▪ Tongana nyen Jésus afa mbilimbili ye so lo ye abazengele asala?

▪ Tongana nyen Jésus afa mara ti kui so aku Pierre?

▪ Atene wa so Jésus asala na ndo Jean adisciple mingi agbu ndani nzoni pepee?