Mbage 2
Mbeni sese so pasi ayeke da mbeni pepee
1, 2. Bango ndo wa so ayeke nde azo mingi ayeke na ni?
YE OKO, na ya sese kue, azo kutu mingi ayeke na mbeni bango ndo so ayeke nde mingi. Ala baa mbeni pendere gigi ti kekereke so ayeke ga teti azo. Ala tene so na ndo so mveni, na ndo sese, na ya ngoi kete fade mbeni sese so ye ti sioni na sana ayeke da mbeni pepee ayeke ga. Ala hinga so na ya ngoi kete fade a yeke lungula ye ti sioni na fade aleke mbeni sese so ayeke fini kue. Ala tene nga so a tondani awe ti leke gunda ti fini sese so!
2 Azo so ama na be so fade abira, aye ti ngangu, fango zo, nzi, fango ngbanga ti mbilimbili pepee nga na nzinga ayeke duti na ya fini sese so pepee. Fade a yeke duti sese so kobela, wala sana, na ngule nga na kui ayeke da pepee. Na ngoi ni so, fade ayaa azo ti ga mbilimbili kue na fade ala duti na ngia na fini ti lakue lakue na ya paradis na ndo sese. Na ye ti nzoni mingi ahon, fade azingo awakinda na ala wara lege ti duti na fini ti lakue lakue!
3, 4. Ngbanga ti nyen azo so ayeke na taa beku na bango ndo ti ala?
3 Bango ndo tongaso ti ye so ayeke si ande ayeke gi bango li, mbeni ye so ayeke taa ye pepee? Oko pepee. A luti na ndo kpengba mabe na ya lekengo Paradis so ayeke taa ye (aHébreu 11:1). Ngbanga ti nyen azo so ayeke na beku tongaso? Ngbanga ti so zendo ni alondo na Wasalango nda-gigi so ayeke na ngangu ahon kue.
4 Na ndo azendo ti Nzapa, Mbeti ti Nzapa atene: “Ye oko ati pepee ti nzo ye kue so Jéhovah, Nzapa ti i, aze na i. Ye ni kue aga taa tene awe, mbeni tene oko ti tene so kue ati na sese senge pepee.” “Nzapa ayeke zo pepee, si lo sala mvene (...). Ye so lo tene, fade lo sala ye so pepee? Wala lo sala tene, na fade lo sala ye so biani pepee?” “Jéhovah ti aturugu adeba, lo tene: ‘Biani, ye so mbi bi be ti mbi da, fade ye ni aga taa ye; na ye so mbi leke na be ti mbi awe, fade ye ni aga tongaso.’ ” — Josué 23:14; Nombre 23:19; Esaïe 14:24.
5. Ahundango tene wa ahunda kiringo tene?
5 Ye oko, tongana ye so be ti Nzapa aye giriri ayeke ti leke mbeni sese ti paradis so pasi ayeke da pepee, ngbanga ti nyen lo zia lege na aye ti sioni? Ngbanga ti nyen lo ku ngu saki omene, asi fadeso, ti leke ye so ayeke sioni? Angu ngbangbo mingi ti pasi so afa so Nzapa abi be ti lo biani na e pepee, wala a fa so lo yeke da pepee?