Salango kusala na mbeni plan

TI AZO mingi, tënë ti salango tënë na lege ti mbeni plan asala si ala yeke gi bê ti ala. Ala bâ so ye ni ayeke duti nzoni mingi na ala tongana ala sû na mbeti wala ala manda na li ye oko oko kue so ala yeke tene ande.

Ye oko, ti tâ tënë ni, e kue e yeke sala tënë lâ oko oko na mbeni mbeti na gbele e pëpe. A yeke tongaso na yâ ti lisoro ti e na sewa, na akamarade ti e nga na fango tënë. E yeke sala nga tongaso na ngoi so e yeke sambela na bê ti e kue, atâa gi e mveni wala ndali ti mbeni bungbi ti azo.

Tongana mo yeke mû diskur wala mo yeke sala devoir, ti sû atënë ni kue na mbeti wala ti sala ni na lege ti mbeni plan ayeke sala mbeni ye? Atâa so dikongo atënë so a sû kue na mbeti alingbi ti mû maboko ti tene atënë tâ na lege ni nga ti soro atënë nzoni, kode so ayeke na aye so akanga lege ti ndu bê. Tongana mo diko ambeni bungbi ti atënë kete awe, mingi ni loro ti salango tënë ti mo nga na gbiango totongo ti go ti mo ayeke ga nde na ti so mo yeke sala ka na yâ ti lisoro. Tongana lê ti mo ayeke mingi na ndo ambeti ahon ti duti na ndo azo so ayeke mä mo, azo ni mingi ayeke dengi mê kue na mo pëpe, tongana ti so ala lingbi fade ti sala tongana ala bâ so bê ti mo ayeke na ala nga mo tingbi diskur ni na aye so alingbi na ala. Salango tënë so aga gi na bê ti lo mveni ayeke nzoni mingi ti tene mbeni devoir apusu zo biani ti sala ye.

A leke Ekole ti Kusala ti aChrétien ti mû maboko na e na yâ gigi ti e ti lâ oko oko. Tongana e tingbi na akamarade, e yeke mû pëpe mbeni ndulu mbeti ti diko na ala abibe ti e si e leke gere ti atënë ti e pendere mingi. Na fango tënë, e yeke mû na tele ti e pëpe mbeti so e sû atënë ti e kue na ndo ni ti diko na zo, na mbito ti tene e girisa pëpe ambeni tënë so e ye ti fa na azo. Tongana mo yeke sala démonstration na ekole na ndo tongana nyen ti fa tënë na yâ aye tongaso, tara tele ti sala tënë tongana ti so mo yeke sala ka. Tongana mo leke tele nzoni, mo yeke bâ ande so mingi ni mbeni plan, atâa a yeke na yâ ti li ti mo wala na mbeti, alingbi awe ti dabe mo na angbongboro ye so mo ye ti sala tënë na ndo ni. Me tongana nyen mo lingbi ti gi ti maï kode ti sala kusala na mbeni plan?

Leke yâ ti abibe ti mo. Ti sala kusala na mbeni plan na ngoi so mo yeke sala tënë, a yeke nzoni mo leke yâ ti atënë so ayeke na li ti mo. So aye ti tene pëpe ti soro sorongo atënë so mo ye ti sala na kua. A ye gi ti tene ti gbu li kozoni ti sala tënë.

Na yâ gigi ti lâ oko oko, zo so ayeke sala tënë hio hio alingbi ti bâ so lo tene mbeni tënë so na pekoni lo ye fade ti tene pëpe. Mbeni zo nde alingbi ti sala tënë gi tongaso, lo londo hio na mbeni tënë ti gue na mbeni nde. Me zo alingbi ti hon ndo ti asioni salango ye so tongana lo luti kete ti leke mbeni kete plan na yâ ti li kozo ti sala tënë. Zia na yâ ti li ti mo ye so mo ye ti si dä. Na pekoni soro aye so a lingbi mo sala ti si dä, na to nda ti sala tënë.

Mo yeke leke tele ti gue ti fa tënë? Mû ngoi pëpe gi ti leke bozo ti mo ti fango tënë, me nga ti leke yâ ti abibe ti mo. Tongana mo soro ti sala kusala na mbeni oko ti awango ti Kusala ti Royaume, diko ni fani mingi si angbongboro tënë ni aduti polele na yâ ti li ti mo. Tene angbongboro tënë ni gi na lege ti andulu tënë. Sala si atënë ti yâ ni alingbi na mo nga na aye so ayeke si na yâ ti territoire ti mo. Mo yeke bâ ande so a yeke nzoni ti duti na mbeni plan na yâ ti li ti mo. A lingbi mo zia nyen na yâ ni? (1) Na yâ ti akozo tënë ni, mo lingbi ti sala tënë ti aye so agbu bê ti azo mingi na ndo ni so. Hunda zo ni ti fa atënë ti bê ti lo. (2) Zia na li ti mo mbeni mbilimbili ye so mo lingbi ti tene na ndo tënë ni, so andu versê oko wala use so afa ye so Nzapa amû zendo ni ti ga na dengo bê. Tongana lege ayeke dä, fa so Jéhovah ayeke sala ande ye so na lege ti Royaume ti lo, ngorogbia ti lo so ayeke na yayu. (3) Wa zo ni ti sala mbeni ye alingbi na ye so ala sala lisoro na ndo ni. Mo lingbi ti fa mbeni mbeti wala ti hunda ti manda Bible na lo nga ti mä tele ti kiri ti sala lisoro ni.

Oko plan so mo yeke peut-être na bezoin ni ande teti mara ti fango ye tongaso ayeke ti so ayeke na yâ ti li ti mo. Tongana mo ye ti bâ mbeni plan so ayeke na lê ti mbeti kozo ti sala tënë na zo, peut-être plan ni so ayeke gi na ambeni tënë teti akozo tënë, versê oko wala use nga na mbeni ndulu tënë so mo ye ti tene na hunzingo ti tënë ti mo. Ti leke tele tongaso nga ti sala kusala na mara ti plan so ayeke kanga lege na e ti sala tënë gi tongaso. A yeke mû nga maboko na e ti fa tënë so ayeke polele, so zo alingbi ti dabe ti lo na ni hio.

Tongana mbeni hundango tënë wala tënë so aye ti kanga lege ayeke sigigi fani mingi na yâ ti territoire ti mo, mo lingbi ti bâ so a yeke nzoni ti gi nda ti ambeni ye na ndo ni. Mingi ni, kota ye ni kue ayeke ti wara angbongboro tënë use wala ota legeoko na aversê so ayeke na gunda ni. “Sujets de conversation bibliques” nga akete li ti tënë so gere ni avuko mingi na yâ buku Comment raisonner à partir des Écritures alingbi ti mû na mo tâ plan so mo yeke na bezoin ni. Mo lingbi ti wara atënë ti ambeni zo so a fa pekoni na yâ ti mbeni buku nde so mo ye ti zia dä. Sû na mbeti mbeni ndulu plan, na zia tënë ti azo ni so na tele ni. Zia ni na yâ aye ti mo ti fango tënë. Tongana mbeni zo ahunda tënë wala lo tene mbeni tënë so aye ti kanga lege, fa na lo so mo yeke na ngia ti fa nda ti aye so mo mä na bê dä (1 Pi. 3:15). Sala kusala na plan ni ti kiri na tënë.

Tongana mo ye ti sambela na iri ti sewa ti mo, ti mbeni groupe ti mandango ye wala ti kongregation, a yeke nga ye ti nzoni ti leke yâ ti abibe ti mo. Luc 11:2-4 afa so Jésus amû na adisciple ti lo mbeni plan so akpengba pëpe teti sambela so yâ ni ane. Na ngoi ti zingo yanga ti temple na Jérusalem, Salomon asambela a yo. Peut-être lo gbu li kozoni na ndo ye so lo yeke tene ande. Lo gboto lê kozoni na ndo Jéhovah nga na zendo ti lo na David. Na pekoni lo sala tënë na ndo temple; nga na peko ti mba, lo sala tënë na ndo ambilimbili ye nga na bungbi ti azo (1 aGbia 8:22-53). E lingbi ti wara ye ti nzoni na lege ti atapande so.

Zia aye mingi pëpe na yâ plan ti devoir ti mo. Plan ti mo ni ayeke ti tene mo mû na diskur? A lingbi mo zia aye oke dä?

Girisa pëpe so mbeni plan ayeke ti mû maboko na mo ti dabe mo na abibe. Mo lingbi ti bâ so a yeke ye ti nzoni ti sû na mbeti andulu tënë ti sala na kusala na yâ akozo tënë ti mo. Me na pekoni, zia lê ti mo na ndo abibe, pëpe na ndo atënë. Tongana mo sû abibe so na mbeti, sû gi na ndulu tënë. A lingbi angbongboro tënë, so ayeke mingi pëpe na so mo ye ti sala tënë na ndo ni, asigigi polele na yâ ti plan ti mo. Ti tene a sigigi polele, sû agere ni kota, na sû kamba na gbe ni wala sala ni na ambeni nzoroko nde. Na gbe ti ngbongboro tënë oko oko, zia na molongo ni abibe so mo ye ti sala tënë na ndo ni. Sû aversê so mo ye ti diko ande. Mingi ni, a yeke nzoni mingi ti diko aversê ni tâ gi na yâ ti Bible. Sû nga atapande so mo ye ti sala na kusala. Mo lingbi ti sala kusala na atënë ti yâ ti abuku ti azo ti gigi so alingbi na ni. Zia si wungo ti atënë so mo sû na mbeti alingbi na ni si mo lingbi ti fa ambilimbili ye nzoni. Tongana plan ni ayeke polele, a yeke duti ande ngangu pëpe ti sala kusala na ni.

Ambeni zo ayeke sala kusala na aplan so ye ayeke na ndo ni mingi pëpe. Ala lingbi ti zia dä ambeni kota tënë, aversê so ala yeke fa ni ande na li ti ala, adessin wala afoto so ayeke mû ande maboko na ala ti dabe ti ala na abibe ni. Na mara ti aye tongaso na ndo ti mbeti, mbeni zo alingbi ti sala devoir ti lo tâ na lege ni nga tongana lisoro. A yeke ye so ye ti manda so aye ti fa la.

Na lembeti 39 ti si na 42 ti buku so, mo yeke wara ye ti manda “Lekengo mbeni plan.” A yeke duti ande nzoni ti diko ye so na ngoi so mo yeke sala kua na ndo ti ye ti manda so, “Salango kusala na mbeni plan.”

Lege ti sala kusala na plan ni. Ye so mo yeke gi ayeke pëpe gi ti leke mbeni devoir tongana plan, me a yeke ti sala kusala nzoni na plan ni.

Kozo kapa na yâ salango kusala na plan ti mo ayeke ti tara peko ti devoir ni. Bâ kota li ti tënë ni, diko angbongboro tënë oko na oko, na tene na yâ ti li ti mo kamba so ayeke na popo ti ngbongboro tënë oko oko na kota li ti tënë ni. Sû wungo ti ngoi so a lingbi ti mû teti ngbongboro tënë oko oko. Fadeso, kiri mo manda kozo ngbongboro tënë ni. Kiri mo bâ atënë so ayeke na gbe ni, aversê nga na atapande so mo ye ti sala na kusala ti sala tënë na ndo ngbongboro tënë so. Manda mbage so fani mingi juska a ga polele na yâ ti li ti mo. Sala legeoko tongaso na tanga ti angbongboro tënë ni. Bâ ye so mo lingbi ti zi na yâ ni, tongana a hunda tongaso, ti hunzi devoir ni na yâ ti ngoi ni. Na pekoni, kiri mo bâ devoir ni kue. Luti na ndo abibe, pëpe na ndo atënë. Manda devoir ni na li pëpe.

Na ngoi so mo yeke sala devoir ni, a lingbi mo bata lê ti mo nzoni na ndo azo so ayeke mä mo. Na pekoni so mo diko mbeni versê awe, mingi ni a lingbi mo fa nda ni na salango kusala na Bible ti mo, me kiri pëpe ti bâ aye so ayeke na ndo ti ambeti so mo sû ye dä. Legeoko nga, tongana mo yeke sala kusala na mbeni tapande, fa ni mo bâ mo tene mo yeke sala tënë fade na akamarade ahon ti diko ni dikongo. Na ngoi so mo yeke sala tënë, bâ mbeti ti mo pëpe ti tene tënë oko oko kue. Zia atënë ti mo alondo na bê ti mo, na mo yeke ndu ande bê ti azo so ayeke mä mo.

Tongana mo hinga nzoni ti sala tënë na lege ti mbeni plan, mo sala awe mbeni kota ye ti gue ti ga mbeni nzoni wamungo diskur.