Lekengo mbeni plan

TONGANA a hunda na ala ti mû mbeni diskur wala ti sala mbeni devoir, azo mingi ayeke sala kue ti sû na mbeti atënë ni kue, a londo na akozo tënë so ala gue ti tënë ti si na atënë ti nda ni. Kozoni si ala hunzi ti leke diskur ni, ala yeke changé gbâ ti ambeti so ala sû atënë dä. Ye so alingbi ti hunda ngbonga mingi.

A yeke tongaso si mo yeke leke adiskur wala adevoir ti mo? Mo ye ti manda mbeni kode so akpengba oko pëpe? Tongana mo manda tongana nyen ti leke mbeni plan, mo yeke duti ande na bezoin mbeni pëpe ti sû atënë oko oko kue na mbeti. Ye so ayeke zia ande na mo ngoi mingi ti tara peko ti diskur wala devoir ti mo. A yeke duti ande ngangu na mo pëpe ti mû adiskur ti mo, na nga ala yeke toto ande pendere mingi na mê ti azo so ayeke mä mo, na a yeke pusu ala ti sala ye.

Tâ tënë, a yeke mû ka mbeni plan teti adiskur so a yeke mû na yâ ti akongregation. Me a yeke tongaso pëpe teti mingi ti ambeni diskur. Ti ambeni diskur wala devoir, a lingbi ti mû gi na mo mbeni ye ti sala tënë na ndo ni wala mbeni kota li ti tënë. Wala a lingbi ti hunda na mo ti sala kusala na mbeni mbilimbili mbeti. Ngoi na ngoi, a lingbi ti mû gi na mo ambeni wango ti mû pekoni si mo sala na devoir ni. Ndali ti aye so kue, a lingbi mo leke plan ti mo mveni.

Tapande so ayeke na lembeti 41 ayeke fa na mo tongana nyen mo lingbi ti leke mbeni ndulu plan. Bâ so ngbongboro tënë oko oko ato nda ni na gati ti mbeti ni na a sû agere ni kota. Na gbe ni, a zia na molongo atënë so amû ngangu na ni. Ambeni tënë na ndo ni, so a yeke sala kusala na ni ande ti fa atënë so, ayeke na gbe ni na a pusu ala kete na mbage ti koti. Bâ plan ni so nzoni. Bâ so kamba ayeke na popo ti angbongboro tënë use ni na kota li ti tënë ni. Mo yeke bâ nga so atënë so ayeke na gbe ni ayeke pëpe gi apendere tënë. Nde na so, ala mû ngangu na ngbongboro tënë so ala yeke na gbe ni.

Plan so mo yeke leke alingbi pëpe ti kpa tâ gi tapande so. Me tongana mo gbu nda ti akota tënë ni, fade a yeke mû maboko na mo ti leke yâ ti atënë ti mo nzoni, na nga ti leke mbeni pendere diskur na yâ ngoi so alingbi na ni. A lingbi mo sala ni tongana nyen?

Gi nda ti ye, soro ni na leke yâ ni

A lingbi mo duti na mbeni kota li ti tënë. A yeke pëpe gi mbeni ye tongaso, so a sû ni gi na mbeni tënë oko. Me a yeke kota tënë so mo ye ti fa na azo, na lo yeke fa na lege wa mo leke ti sala tënë na ndo ni. Tongana a mû na mo mbeni kota li ti tënë, gi na yâ ni nda ti atënë so ayeke mû maboko na mo ande, gi ni nzoni. Tongana a hunda mo ti zi nda ti kota li ti tënë ni na salango kusala na mbeni mbeti, zia kota li ti tënë ni na li ti mo na ngoi so mo yeke manda mbeti ni. Tongana a mû na mo gi mbeni ye ti sala tënë na ndo ni, a yeke ande na mo ti soro kota li ti tënë ni. Me kozoni, a yeke duti ande nzoni ti gi nda ti ambeni ye. Mingi ni, tongana mo yeke na bibe ti hinga aye nde nde kue, fade mo yeke wara anzoni tënë so alingbi.

Na ngoi so mo yeke gue na li ni yeke yeke, hunda tele ti mo lakue: ‘Ngbanga ti nyen atënë so ayeke kota ye na lê ti azo so ayeke mä mbi ande? Mbi zia nyen na gbele mbi?’ Nda ni ayeke pëpe ti fa gi na ndulu tënë atënë ti mbeni mbeti wala ti mû mbeni diskur so a wara aye nde nde kue na yâ ni. Me a yeke ti kangbi mbeni ye ti nzoni na azo so ayeke mä mo ande. Tongana ye so mo zia na gbele mo ti wara aga polele, sû ni na mbeti. Ngbâ ti dabe mo na ni na ngoi ti lekengo diskur ti mo.

Na pekoni so mo hinga awe ye so mo zia na gbele mo ti wara na mo soro awe mbeni kota li ti tënë so ague oko na ni (wala mo bâ kamba so ayeke na popo ti kota li ti tënë so a hunda na mo ti fa nda ni na ye so mo zia na gbele mo), mo lingbi ti gi nda ti aye so aluti gi na ndo ni. Gi atënë so ayeke duti ande na ngele ngangu na lê ti azo so ayeke mä mo ande. Gi pëpe gi atënë tongaso, me gi ambilimbili tënë so fade ayeke fa ye na ayeke mû maboko na zo biani. Zia katikati na aye so mo yeke gi nda ni. Mingi ni, mo yeke wara ande aye ahon so mo lingbi ti sala na kusala. Tongaso, a lingbi mo soro yâ ni.

Gi ti hinga angbongboro tënë so mo yeke sala na kusala ti zi nda ti kota li ti tënë ti mo na ti si na ye so mo zia na gbele mo. Ala yeke duti ande akozo gere ti kusala ti mo, plan ti mo. A lingbi angbongboro tënë ni aduti oke? Ti mbeni ndulu devoir, peut-être use alingbi, nga mingi ni oku alingbi teti diskur so amû même ngbonga oko. Tongana angbongboro tënë ni ayeke mingi pëpe, fade azo so ayeke mä mo ayeke dabe ti ala na ni nzoni mingi.

Na pekoni so mo hinga nzoni awe kota li ti tënë ni na angbongboro tënë ni, leke yâ ti atënë ti mo ni. Soro ala so andu mbilimbili angbongboro tënë ni. Soro anzene nzene tënë so ayeke ga na fini ye na yâ diskur ti mo. Tongana mo soro aversê ti mû ngangu na angbongboro tënë ni, sû na mbeti atënë so ayeke mû ande maboko na mo ti fa nda ti aversê so, si azo agbu nda ni. Zia tënë oko oko na gbe ti ngbongboro tënë so alingbi na ni. Tongana ambeni sango ni alingbi pëpe na mbeni oko ti angbongboro tënë ti mo, lungula ni, atâa ala yeke pendere mingi. Wala bata ni na mbeni ndo nde ti sala kusala na ni mbeni lâ. Bata gi aye so alingbi biani. Tongana mo tara ti sala tënë ti aye mingi, a yeke pusu mo ande ti sala tënë na loro mingi, na yâ ti tënë ti mo ayeke lï mingi pëpe. A yeke nzoni ti fa gi atënë kete, so ayeke na ngele ngangu na lê ti azo ni, na ti fa ni nzoni. Hon ngoi ni pëpe.

Na ndo so, tongana mo de ti sala ni pëpe, leke yâ ti atënë ti mo tâ na lege ni. A yeke ye so Luc, wasungo Évangile, asala lani. Na pekoni so lo bungbi gbâ ti aye so andu tënë ti lo, lo leke ni “na tâ lege ni”. (Luc 1:3). Mo lingbi ti leke atënë ti mo ni alingbi na angoi so aye ni asi na ni na peko ti mba, wala na lege ti atënë so akpa tele, peut-être na ziango na mbeni mbage aye so asi nga na mbeni mbage nde aye so ayeke na gunda ni, wala na mbeni mbage akpale so asi, nga na mbeni mbage nde aye so a sala ti leke na ni. Ye ni kue aluti na ndo ye so ayeke mû ande maboko na mo mingi ti wara ye so mo zia na gbele mo. A lingbi mo londo hio pëpe na mbeni tënë ti gue na mbeni nde, me a lingbi mo gue na azo ni yeke si ala bâ kamba so ayeke na popo ti atënë ni. A lingbi akpengba tënë so mo fa ague na azo ni ti gboto atënë ti nda ni so ayeke na lege ni. Na ngoi so mo yeke leke yâ ti atënë ti mo, bi bê na ndo tongana nyen azo ni ayeke bâ ande diskur ni. A yeke duti ande ngangu na ala pëpe ti gbu nda ti tënë so mo yeke fa na peko ti tele? Fade bê ti ala ayeke pusu ala ti sala ye alingbi na ye so ala yeke mä, tongana ti so mo zia na gbele mo?

Kapa ti peko ayeke ti leke akozo tënë so ayeke zingo nzara ti azo ni ti mä tënë ti mo, na so afa na azo so ayeke mä mo ande so ye so mo ye ti sala tënë na ndo ni ayeke ye ti nzoni ndali ti ala. A lingbi ti duti nzoni ti sû na mbeti akozo tënë ni. Ti hunzi na ni, leke mbeni tënë ti nda ni so apusu zo ti sala ye alingbi na ye so lo mä na so ague legeoko na ye so mo zia na gbele mo.

Tongana mo leke plan ti mo hio mingi, mo yeke wara ande ngoi ti kiri ti leke yâ ni pendere kozo ti mû diskur ti mo. Mo lingbi ti bâ so a yeke nzoni mo fa ambeni wungo ti aye, mbeni tapande wala mbeni ye so asi ti mû ngangu na atënë ti mo. Ti sala kusala na aye so asi ade ti ninga pëpe, wala mbeni ye so asi na so agbu bê ti azo mingi na ndo so mo yeke dä, alingbi ti mû maboko na azo ni hio ti gbu nda ti tënë ni. Na ngoi so mo yeke kiri ti bâ diskur ti mo, mo lingbi peut-être ti bâ ambeni lege ti sala si aye so mo yeke fa alingbi na azo ni. Ti sala mbeni pendere diskur na lege ti anzoni tënë ahunda ti gi nda ti ye na ti kiri ti leke pekoni pendere.

Peut-être ti ambeni wamungo diskur, a yeke nzoni ala sû atënë mingi na mbeti ahon ambeni. Me tongana mo leke atënë ti mo gi na gbe ti angbongboro tënë so ayeke mingi pëpe, mo zi aye so amû biani ngangu na ni pëpe na mo leke ni na lege ni, mo yeke bâ ande so mo yeke na bezoin mbeni pëpe ti sû atënë oko oko na mbeti, atâa so mo yeke na kode mingi pëpe. So ngoi si mo yeke bata ande nde! Na fade diskur ti mo ayeke ga pendere ahon ti kozo. A yeke duti ande polele so mo yeke wara biani nzoni na lege ti Ekole ti Kusala ti aChrétien.