Sala si angbongboro tënë asigigi polele

ANGBONGBORO tënë ti mbeni devoir ayeke nyen? A yeke pëpe apendere mbage ni so a sala tënë ni gi hio tongaso. A yeke anene bibe so mo yeke mû ngoi ti zi nda ni nzoni. A yeke abibe so ayeke sala kota kusala ti tene mo si na ye so mo zia na gbele mo.

Kota ye so ayeke mû lege na mo ti sala si angbongboro tënë ni asigigi polele ayeke ti soro atënë so mo yeke sala na kusala ande nga ti leke yâ ni na ndara. Mingi ni, ti gi nda ti aye teti mbeni devoir ayeke ga na aye so mo yeke sala kusala na ni kue pëpe. Tongana nyen mo lingbi ti hinga ye so a lingbi mo sala na kusala?

Kozoni, bâ nzoni azo so ayeke mä mo ande. Ala hinga ye gi kete na ndo ye so mo yeke sala ande tënë na ndo ni, wala ala hinga ni nzoni mingi? Mingi ti ala ayeda na ye so Bible atene na ndo ni, wala ala yeke ndulu ti dë kite na ni? Mara ti akpale wa ala yeke wara lâ na lâ na ngoi so ala yeke sala ngangu ti sala ye alingbi na ye so Bible atene na ndo tënë ni? Use ni, hinga nzoni na yâ ti li ti mo ye so mo ye ti si dä tongana mo yeke sala ande tënë na azo so na ndo kota li ti tënë so mo ye ti sala na kusala. Sala kusala na awango use so ti hinga atënë ti mo nzoni na bata gi ye so alingbi na ni biani.

Tongana a mû na mo mbeni plan mungo, na mbeni kota li ti tënë nga na angbongboro tënë ni, a lingbi mo mû gi pekoni. Ye oko, tongana mo bata na li ti mo awango so a mû na yâ paragraphe so ahon, ye so mo fa ayeke kiri ande ti duti nene ye na ngoi so mo yeke zi nda ti ngbongboro tënë oko oko. Tongana a mû na mo mbeni plan oko pëpe, a yeke na mo ti soro angbongboro tënë ni.

Tongana mo yeke na angbongboro tënë ni polele awe na yâ ti li ti mo, na mo leke anzene nzene tënë so ayeke na gbe ni, a yeke duti ande ngangu pëpe ti sala devoir ti mo. Peut-être azo so ayeke mä mo ayeke wara ye ti nzoni dä mingi.

Alege nde nde ti leke yâ ti atënë so mo yeke sala na kusala. Na lekengo yâ ti kota mbage ti devoir ti mo, mo lingbi ti mû peko ti akode nde nde mingi. Na ngoi so mo yeke hinga ala nzoni, mo yeke bâ ande so mingi ti ala ayeke lë lengo, a lingbi na ye so mo ye ti si dä.

Mbeni kode so yâ ni ayapu mingi ayeke ti kangbi yâ ni na ali ti tënë. (Ngbongboro tënë oko oko ayeke kota ye teti so a yeke mû lege na azo so ayeke mä mo ti gbu nda ti devoir ni, wala a yeke mû maboko ti si na ye so mo zia na gbele mo.) Mbeni kode ni ayeke ti zia aye na molongo ni so asi na yâ ti ngoi. (Na tapande, aye so asi kozo na Kota Moa alingbi peut-être ti ga kozo na aye so ague juska ti si na futingo Jérusalem na ngu 70, so aga ti lo kozo na aye so ayeke si na ngoi ti e.) Ota ye ni ayeke ti fa ye so ayeke na gunda ti mbeni ye so asi. (Mo lingbi ti zi nda ti tënë tongaso na alege nde nde. Na tapande, mo lingbi ti to nda ni na mbeni ye so ayeke si fadeso, na pekoni fa ye so ayeke na gunda ni.) Osio kode ni andu salango tënë na ndo ti aye so ague nde nde. (Mo lingbi ti sala tënë ti nzoni nde na sioni.) Ngoi na ngoi, a lingbi ti wara na yâ ti devoir oko akode mingi.

Tongana a bi lani tënë ti mvene na ndo Etienne na gbele Sanhédrin ti aJuif, lo mû mbeni kpengba diskur so amû peko ti kode ti fango aye na molongo so asi. Na ngoi so mo yeke diko Kusala 7:2-53, bâ so Etienne asoro atënë ni gi senge tongaso pëpe, nda ni ayeke dä. Kozoni, Etienne afa polele so lo yeke tene peko ti mbeni mbaï so azo so ayeke mä lo alingbi ti bele ni pëpe. Na pekoni lo fa na gigi so, atâa so aita ti Joseph ake lo Joseph ni lani, Nzapa asala kusala na lo ti zi azo. Nga, Etienne afa so aJuif ake lani yanga ti Moïse, lo so Nzapa ayeke sala kusala na lo. Lo hunzi tënë ti lo na fango polele so azo so asala si Jésus Christ akui afa na gigi oko mara ti bibe so aJuif ti giriri afa.

Sala kusala na angbongboro tënë mingi pëpe. A hunda akota ye mingi pëpe ti zi na nda ti mbeni kota li ti tënë. Na yâ ti aye mingi, a hunda ti hon oku pëpe. Ye so ayeke tâ tënë atâa mo yeke sala tënë teti penze-ngbonga 5, 10, 30 wala ahon so. Gi lege pëpe ti sigigi na angbongboro tënë mingi mingi. Tongana abibe ni ayeke mingi pëpe na yâ ti devoir oko, azo so ayeke mä mo alingbi biani ti gbu nda ni. Tongana devoir ni ayo, a lingbi nda ti angbongboro tënë ni asigigi nzoni mingi na mo fa nda ni polele.

Atâa wungo ti angbongboro tënë so mo sala na kusala ayeke oke, sala kue ti zi nda ni oko na oko nzoni mingi. Mû ngoi so alingbi na ni na azo so ayeke mä mo ti gi nda ti ngbongboro tënë oko oko, si a lingbi ti ngbâ a ninga na yâ ti li ti ala.

Zia si devoir ti mo aduti na lê ti azo tongana ye so akpengba pëpe. Ye so aluti lakue pëpe na ndo wungo ti atënë so a fa na yâ ni. Tongana mo bungbi abibe ti mo nzoni na gbe ti ali ti tënë so ayeke mingi pëpe, na mo zi nda ni oko na oko, a yeke duti ande ngangu pëpe ti mä devoir ti mo na ti dabe na ni.

Sala si angbongboro tënë ti mo asigigi polele. Tongana mo leke yâ ti atënë so mo sala na kusala na lege ni, a yeke duti ande ngangu pëpe ti tene salango devoir ni amû ngangu na angbongboro tënë ti mo.

Kota ye so amû lege ti sigigi na mbeni ngbongboro tënë polele ayeke ti fa ye so amû ngangu na ni, aversê wala ambeni ye nde. A yeke sala ye so na mbeni lege so asala si aye ni so agboto lê na ndo mbeni ngbongboro tënë na amû ngangu na ni. A lingbi tanga ti anzene nzene tënë kue afa ngbongboro tënë ni polele wala afa so a yeke tâ tënë. Yôro na yâ ni pëpe ambeni bibe so alingbi na ni pëpe gi ngbanga ti so a nzere na mo. Na ngoi so mo yeke zi nda ti anzene nzene tënë, fa polele kamba so ayeke na popo ti ala na ngbongboro tënë so ala yeke mû ngangu na ni. Zia pëpe si a duti azo so ayeke mä mo si awara ni. Mo lingbi ti fa kamba so ayeke na popo ni tongana mo kiri na ndo ti ambeni tënë so afa na gigi ngbongboro tënë ni, wala na kiringo ngoi na ngoi na ndo kota mbage ti ngbongboro tënë ni mveni.

Ambeni wamungo diskur ayeke fa wungo ti angbongboro tënë ti ala ti gboto lê na ndo ni. Atâa so a yeke mbeni lege ti gboto lê na ndo angbongboro tënë, a lingbi a duti pëpe na place ti sorongo na kode atënë ti sala na kusala nga ti zingo nda ni na lege ni.

Mo lingbi ti soro gi ti tene ngbongboro tënë ti mo tâ gi na tongo nda ni kozoni si mo fa atënë so amû ngangu na ni. Ye so ayeke mû ande maboko na azo so ayeke mä mo ti bâ nene ti ye so ayeke ga na peko, nga a yeke gboto lê na ndo ngbongboro tënë ni. Mo lingbi ti mû ngangu na tënë ni na lege so mo fa kota tënë ti yâ ni na pekoni so mo zi nda ni kue nzoni awe.

Na fango tënë. Akpengba-ndia so a sala tënë ni na yâ aparagraphe so ahon alingbi gi na adiskur oko pëpe, me nga na lisoro so mo yeke sala na fango tënë. Na ngoi so mo yeke leke tele ti mo, bi bê na kota ye kue so asi, so azo so ayeke na ndo so mo yeke dä ahinga ni. Soro mbeni kota li ti tënë so amû lege na mo ti fa tongana nyen beku so Bible amû ayeke ga ande na yorö na kpale ni. Soro peut-être angbongboro tënë use ti zi na nda ti kota li ti tënë so. Soro aversê wa mo yeke sala ande na kusala ti mû ngangu na atënë so. Na pekoni leke tongana nyen mo yeke to nda ti lisoro ni ande. Mara ti lekengo tele tongaso ayeke mû lege na mo ti sala ye alingbi na ye so lisoro ni ahunda. A yeke mû nga maboko na mo ti tene mbeni tënë so azo ti lisoro ti mo ni ayeke dabe ti ala na ni ande.