Anzoni tënë ti nda ni

MO GI peut-être awe nda ti aye so mo yeke sala na kusala na mo leke yâ ni ndali ti kota mbage ti devoir ti mo. Mo leke peut-être awe akozo tënë so azingo nzara ti azo. Me mbeni ye oko angbâ. A yeke anzoni tënë ti nda ni. Bâ ye so tongana senge ye pëpe. Mingi ni, azo ayeke dabe ti ala a ninga mingi na ye so mo tene na nda ni. Tongana atënë ti nda ni ayeke na ngangu pëpe, même aye so mo tene kozoni alingbi ti lë lengo mingi pëpe.

Bâ tapande so: ndulu na hunzingo ti fini ti lo, Josué amû mbeni kpengba diskur na a-ancien ti mara ti Israël. Na pekoni so lo fa ye so Jéhovah asala na Israël ngbele ye na ngoi ti Abraham, Josué afa angbongboro tënë ni gi ndulu tongaso? Oko pëpe. Nde na so, na bê kue, lo wa azo ni, lo tene: “I kpe mbito ti L’Eternel, na i sala na Lo na be-biani na tene-biani.” Diko mo mveni atënë so Josué atene na nda ni na Josué 24:14, 15.

Mbeni kpengba diskur nde, so a wara na Kusala 2:14-36, ayeke ti so bazengele Pierre amû na gbâ ti azo na Jérusalem na Matanga ti Pentecôte ti ngu 33. Kozoni kue, lo tene so ala yeke bâ gango tâ tënë ti prophétie ti Joël na ndo sango yingo ti Nzapa na ndo ti azo. Na pekoni lo fa tongana nyen ye so ague oko na aprophétie na ndo Messie na yâ ti aPsaume, so a sala kozoni tënë ti londongo ti Jésus Christ na kuâ nga yango lo na koti ti Nzapa. Nga na nda ni, Pierre afa polele tënë so a lingbi zo oko oko na popo ti ala aluti na gbele ni. Lo tene: “Tongaso zia azo ti da ti Israël kue ahinga tënë so biani, Jésus so i fâ Lo na [keke ti pasi, NW ], Nzapa asala si Lo ga Seigneur na Christ.” Azo ni ahunda, ala tene: “Aita, fade e sala nyen?” Pierre akiri tënë na ala, lo tene: “I changé bê ti i, i azo oko oko kue, i kamata batême na iri ti Jésus Christ.” (Kus. 2:37, 38). Teti tënë ni andu bê ti ala, na lango ni so azo 3 000 tongaso ayeda na tâ tënë na ndo Jésus Christ.

Atënë so a lingbi a girisa ni pëpe. A lingbi ye so mo tene na nda ni ague tâ oko na kota li ti devoir ti mo. A yeke nzoni a duti aye so ayeke ga gi gango na peko ti angbongboro tënë so mo zi nda ni awe. Atâa so mo ye peut-être ti yôro na yâ ni akota tënë ti kota li ti diskur ni, a hunda pëpe ti tene peko ti kota li ti tënë ni kue.

Mingi ni, ye so mo yeke gi na salango tënë ayeke ti wa azo ni ti sala mbeni ye alingbi na atënë so mo fa. Mbeni oko ti aye so atënë ti mo ti nda ni ayeke gi ayeke ti fa na ala ye so a lingbi ala sala. Na ngoi so mo soro kota li ti tënë ti mo nga na angbongboro tënë ni, mo yeke bâ nzoni ngbanga ti nyen tënë ni ayeke kota ye ndali ti azo so ayeke mä mo? Mo yeke bâ nga ye so mo ye ti si dä na salango devoir ni? Tongana a yeke tongaso, mo hinga awe ye so mo ye ti tene ala sala. Fadeso, fa ye ni so ayeke nyen nga tongana nyen ti sala ni.

Nde na fango na azo ni ye so a lingbi ala sala, a lingbi atënë ti mo ti nda ni si afa na azo ni ye so ayeke pusu ala ti sala ye. A lingbi a wara na yâ ni ambilimbili nda ti tënë ti sala ye nga aye ti nzoni so zo alingbi ti wara na salango tongaso. Tongana mo leke ndangba tënë ni pendere mingi nga mo tënë ni nzoni, a yeke kiri ti mû ngangu na devoir ti mo kue.

Girisa pëpe so devoir ni ayeke gue ti hunzi. Ni la, a lingbi ye so mo yeke tene afa tongaso. A yeke nzoni loro ti salango tënë ti mo alingbi na ni. Sala tënë na loro mingi pëpe ti hunzi na nda ni gi hio tongaso. Na mbeni mbage, zia pëpe si totongo ti go ti mo akiri gi na gbe ni. A yeke nzoni go ti mo atoto alingbi na ni, me a hon ndo ni pëpe. A lingbi andangba tënë ti mo afa so a yeke hunzingo ti tënë ti mo la. A lingbi salango tënë ti mo afa so mo yeke na wâ na mo hinga ye na bê kue. Na ngoi so mo yeke haka peko ti devoir ti mo, girisa pëpe ti haka peko ti atënë ti mo ti nda ni.

A yeke nzoni atënë ti nda ni ayo tongana nyen? A yeke pëpe mbeni ye so a yeke hinga ni na lege ti wungo ti ngoi ni. A lingbi yâ ti atënë ti nda ni agboto pëpe. A yeke hinga so yongo ni alingbi na ni gi na lege ti ye so atënë ti nda ni asala na ndo azo ni. Atënë ti nda ni so akpengba pëpe, andu tâ gi tënë ni na amû beku ayeke lakue nzoni mingi. Ti ala so ayo kamême, so a zia na yâ ni mbeni tapande, ala lingbi nga ti lë lengo tongana a leke ni pendere mingi. Haka andulu tënë ti nda ni ti buku ti Zo-ti-fa-tene kue, so a wara na Zo-ti-fa-tene 12:15, 16, na ti Fango ye ti Jésus na ndo ti Hoto so ayeke ndulu mingi, tongana ti so ayeke na Matthieu 7:24-27.

Na fango tënë. Mingi ni, a yeke na fango tënë si mo yeke tingbi na nene ti atënë ti nda ni ahon atanga ti ndo kue. Tongana mo leke tele ti mo na mo bi bê na azo na ndoye, mo lingbi ti sala aye ti nzoni mingi. Mo lingbi ti sala kusala nzoni mingi na wango so a mû na alembeti so ahon, même na ngoi ti lisoro ti mo na mbeni zo.

Mbeni lisoro alingbi ti duti ndulu mingi. Zo ni ayeke peut-être na ye mingi ti sala. Vizite ti mo kue alingbi ti ninga gi penze-ngbonga oko. Tongana a yeke na lege ni, mo lingbi ti tene mbeni ye tongaso: “Mbi hinga so mo yeke na ye mingi ti sala. Me mbi ye ti zia na mo mbeni tënë oko so amû ngangu na zo. Bible afa so Wasalango e aleke mbeni pendere ye ti sala: ti sala si sese so aga mbeni ndo so azo alingbi ti duti dä lakue lakue. E lingbi ti duti na yâ ti Paradis so, me a yeke na e ti manda aye so Nzapa ahunda.” Wala mo lingbi gi ti hunda ti kiri na mbeni lango nde so alingbi na lo.

Tongana vizite ni aninga pëpe ngbanga ti so zo ni afâ yâ ti lisoro ni na ngangu, wala lo tene asioni tënë, mo lingbi lakue ti sala aye ti nzoni mingi. Dabe mo na wango so ayeke na Matthieu 10:12, 13 nga na aRomain 12:17, 18. Kiringo tënë ti mo na ngangu pëpe alingbi ti gbian bango ndo ti lo na ndo ti aTémoin ti Jéhovah. So ayeke duti ande pendere ye mingi.

Na mbeni mbage nde, peut-être lisoro so mo sala na mbeni zo anzere. Tongaso, kiri mo fa ngbongboro tënë so mo ye ti tene lo dabe ti lo na ni. Zia na yâ ni mbeni ye so alingbi ti pusu lo ti sala ye alingbi na ni.

Tongana lege ayeke dä ti kiri ande mbeni lâ ti bâ zo ni, sala si lo ku ni kungo. Hunda mbeni tënë, peut-être mbeni oko ni so a sala tënë na ndo ni na yâ Comment raisonner à partir des Écritures wala mbeni mbeti so a leke ni ti manda na Bible na zo. Girisa pëpe ye so mo zia na gbele mo, tongana ti so Jésus atene na so a wara ni na Matthieu 28:19, 20.

Mo yeke hunzi ti manda Bible na zo la? Ti kiri ti fa kota li ti tënë ni ayeke mû maboko ande na wamandango ye ni ti dabe ti lo na ye so a sala tënë na ndo ni. Salango kusala na ahundango tënë ti dango bê ayeke mû ande maboko ti bata anene tënë ni na yâ ti li ti wamandango ye ni, mbilimbili tongana a sala dango bê so na loro pëpe. Tongana mo hunda tënë na wamandango ye ni na ndo tongana nyen ye so ala manda alingbi ti ga na ye ti nzoni na lo, wala tongana nyen lo lingbi ti kangbi ni na ambeni zo, ye so ayeke mû peut-être maboko na lo ti bâ tongana nyen ti sala kusala na ye so lo manda.​—aProv. 4:7.

Dabe mo so atënë ti mo ti nda ni ayeke sala ngangu na ndo nzoni ti diskur ti mo kue.