Chapitre Oko

Beoko na yâ vorongo laso: A ye ti tene nyen?

1, 2. (a) Pendere ye wa ayeke si laso na ngoi ti e? (b) Pendere beku wa azo ti bê ti mbilimbili ayeke na ni?

MBENI pendere ye ayeke so: gbâ ti azo ayeke gue ti sala beoko na yâ vorongo laso na ndo sese kue. A yeke bungbi na ndo oko azo kutu mingi ti amara kue, ti akete mara kue, na ti ayanga kue. Ngu oko oko, a yeke bungbi azo mingi ahon. Na yâ ti Bible, a hinga ala tongana “atémoin” ti Jéhovah, na a hiri ala “azo mingi so asi singo”. Ala yeke sala na lo kusala ti nzoni-kue lâ na bï (Esaïe 43:10-12; Apocalypse 7:9-15). Ngbanga ti nyen? Teti fadeso ala hinga Jéhovah tongana oko tâ Nzapa. Ye so ala manda apusu ala ti leke fini ti ala ti tene alingbi na andia ti lo so ayeke mbilimbili. Nga, ala hinga so e yeke na “lâ ti nda ni” ti sioni sese ti laso. Ala hinga nga so, na yâ ngoi kete, Nzapa ayeke futi ande sese ni, na lo yeke zia na place ni fini sese ti lo: paradis.​—2 Timothée 3:1-5, 13; 2 Pierre 3:10-13.

² Tënë ti Nzapa amû zendo so: “A ngbâ kete, na fade azo ti sioni ayeke mbeni pëpe . . . Me azo so ayeke na tâ be-ti-molenge, fade sese ni aga ye ti héritier ti ala, fade ala wara ngia na yâ siriri so awu mingi.” (Psaume 37:10, 11). “Sese ni aga ye ti héritier ti azo ti mbilimbili, na fade ala duti dä lakue.” (Psaume 37:29). “Fade [Nzapa a] mbô ngule kue na lê ti ala, na kui ayeke mbeni pëpe. Vundu, wala toto, wala sana, ayeke mbeni pëpe teti kozo ye ni ahon awe.”​—Apocalypse 21:4.

3. Laso, azo ayeke duti biani beoko na yâ vorongo tongana nyen?

³ Akozo wakodoro ti fini sese so ayeke duti ande azo so a yeke bungbi ala laso ti sala beoko na yâ tâ vorongo. Ala manda awe ye so bê ti Nzapa aye, na ala yeke gi kue ti sala ye alingbi na ni. Ti fa lani tongana nyen salango tongaso ayeke kota ye mingi, Jésus atene: “Na so ayeke fini ti lakue lakue: ti hinga Mo, Mo so gi Mo oko ayeke tâ Nzapa, na ti hinga Jésus Christ, Lo so Mo to lo awe.” (Jean 17:3). Bazengele Jean asû na mbeti: “Sese so ayeke hon, na nzara ni kue, me zo so asala ye so Nzapa aye, lo duti lakue lakue.”​—1 Jean 2:17.

Tâ nda ni

4. (a) Bungbingo azo mingi ti duti beoko na yâ vorongo laso aye biani ti tene nyen? (b) Bible afa bungbingo azo so tongana nyen?

⁴ Laso, bungbingo azo mingi ti sala beoko na yâ vorongo aye biani ti tene nyen? A ye ti fa polele so e yeke ndulu mingi na hunzingo ti sese ti sioni ti fadeso. Nga, fade fini sese ti Nzapa ayeke to nda ni fade fade na pekoni. E yeke bâ na lê ti e gango tâ tënë ti aprophétie ti Bible, so asala giriri tënë ti kota bungbingo azo so. Mbeni prophétie ni oko atene: “Na lâ ti nda ni [so e yeke dä] fade tënë asi tongaso, A sala si hoto ti da ti L’Eternel [tâ vorongo Jéhovah so ayeke na nduzu mingi] aga li ti ahoto kue, na A yä hoto so na nduzu ahon ambeni hoto kue [ahon tanga ti avorongo kue]; na azo ague kâ tongana ngu so asua. Amara mingi ague, ala tene, I ga, zia e ma na Hoto ti L’Eternel, na da ti Nzapa ti Jacob; fade Lo fa lege ti Lo na e, na e tambela na lege ti Lo”.​—Michée 4:1, 2; Psaume 37:34.

5, 6. (a) Tongana nyen a yeke tâ tënë so amara ayeke bi lê na mbage ti Jéhovah? (b) Atënë wa a lingbi e hunda na e mveni?

⁵ Atâa so amara kue ayeke gue pëpe na da ti Jéhovah ti yingo ti voro lo, azo kutu mingi, ti amara kue, ayeke sala ni. Tongana ala yeke manda aye so Jéhovah Nzapa aleke ti sala na lege ti ndoye, nga apendere lengo ti lo, bê ti ala apusu ala ngangu mingi ti sala ye. Na be-ti-molenge, ala yeke gi ti hinga ye so Nzapa aye ala sala. Sambela ti ala ayeke tongana ti wasungo psaume so atene lani: “Fa na mbi lege ti sala ye so Mo ye, teti Mo yeke Nzapa ti mbi.”​—Psaume 143:10.

⁶ Mo bâ tele ti mo na popo ti azo mingi mingi so Jéhovah ayeke bungbi ala fadeso ti sala beoko na yâ vorongo? Salango ye ti mo fadeso na peko ti ye so mo manda na yâ Bible afa nyen na gigi? A fa so mo bâ biani na nene ni so Jéhovah ayeke Lingu ni? Tambelango ti mo na ‘ndo alege ti lo’ ayeke duti ande tongana nyen?

Lege so a yeke bungbi na azo ni

7. (a) Na nda ni, azo wa ayeke sala beoko na yâ vorongo? (b) Ngbanga ti nyen a lingbi mo to nda ti voro Jéhovah fade fadeso? Mo lingbi ti mû maboko na ambeni zo ti sala ni tongana nyen?

⁷ Ye so Jéhovah aye ayeke ti bungbi azo na a-ange kue oko na yâ tâ vorongo. E yeke ku kungo lango so fade azo kue so ayeke na fini ayeke voro ande gi oko tâ Nzapa (Psaume 103:19-22)! Me a lingbi Jéhovah afuti kozoni azo kue so ake ti sala mbilimbili ye so bê ti lo aye. Na lege ti be-nzoni, lo gboto mê kozoni teti ye so lo yeke sala ande, si na ndo kue azo alingbi wara lege ti changé salango ye ti ala (Esaïe 55:6, 7). A yeke tongaso si laso, a yeke hiri “amara kue, akete mara kue, azo ti yanga nde nde kue” na lege so: “I kpe mbito ti Nzapa, i mû gloire na Lo, teti l’heure ti Lo ti fâ ngbanga asi awe; i sambela Lo so asala yayu na sese, kota ngu ti ingo na lingu.” (Apocalypse 14:6, 7). Mo yeda awe na hiringo ndo so? Tongana mo yeda na ni, mo yeke na matabisi ti hiri ambeni zo nde ti hinga tâ Nzapa, na ti voro lo.

8. Na peko ti so e manda akozo gere ti afango ye ti Bible, a lingbi e duti na nzara ti sala nyen?

⁸ Ambeni zo atene ala mä na bê na Jéhovah, me ala ngbâ lakue ti sala gi aye so anzere na ala. Jéhovah aye pëpe ti tene azo tongaso avoro lo. Lo ye si azo ‘ahinga biani ye so Lo ye’, na ti fa ni polele na yâ fini ti ala (aColossien 1:9, 10). Ni la, azo so amanda awe akozo gere ti fango ye ti Bible. Na pekoni, bê ti kiri singila so ala yeke na ni apusu ala ti gue hio na li ni ti ga aChrétien biazo. Ala ye ti hinga Jéhovah mbilimbili. Ala ye ti kono ye so ala hinga na ndo Tënë ti lo nzoni, na ti sala ye alingbi na ni mingi ahon na yâ fini ti ala. Ala yeke gi ti fa na gigi alengo ti Babâ ti e ti yayu, na ti bâ aye tongana ti so lo yeke bâ. Salango tongaso apusu ala ti gi lege kue ti mû mbage na kusala ti salut so a yeke sala laso na ndo sese. A yeke nga ye so mo ye ti sala?​—Marc 13:10; aHébreu 5:12–6:3.

9. Na lege wa tâ beoko alingbi ti ga tâ ye laso?

⁹ Bible afa so a lingbi azo so ayeke sala na Jéhovah aduti beoko (aEphésien 4:1-3). A lingbi beoko so aduti dä laso, atâa awokongo ti e, wala kangbi so ayeke na yâ sese so. Na bê kue, Jésus asambela ti tene adisciple ti lo aduti yanga oko, na tâ beoko. So aye ti tene nyen? Kozoni kue, a ye ti tene ala yeke duti na nzoni songo na Jéhovah nga na Molenge ti lo. Ti use ni, ala yeke duti beoko na popo ti ala mveni (Jean 17:20, 21). Ti sala ni, kongregation ti aChrétien ayeke sala kusala tongana mbeni bungbi so na lege ni Jéhovah ayeke fa ye na azo ti lo.

Aye wa amû lege ti duti na beoko?

10. (a) Tongana e sala kusala na Bible ti kiri tënë na ahundango tënë so andu e, e yeke maï ye wa? (b) Na lege ti kiringo tënë ti mo na atënë so a hunda na yâ paragraphe so, gi nda ti aye so amû lege na aChrétien ti duti beoko.

¹⁰ Na gbe ni ge, a fa akota ye mbasambala so amû lege ti duti beoko na yâ vorongo. Kiri tënë na ahundango tënë so aga na pekoni. Na oko ngoi ni, gi ti bâ tongana nyen atënë ni oko oko andu songo ti mo na Jéhovah, nga na aita ti mo Chrétien. Gbu li na ndo ti akota tënë so, na diko aversê so a zia na yâ aparenthèse, me a fa pëpe tënë ti yâ ni. Salango tongaso ayeke mû ande maboko na mo mingi ti maï ndara so alondo na Nzapa, ngangu ti gbungo li, nga na bango nda ti ye nzoni, alengo so e kue e yeke na bezoin ni (aProverbe 5:1, 2; aPhilippien 1:9-11). Gi nda ti aye so oko na oko.

(1) E yeda so Jéhovah ayeke na droit ti fa aye so ayeke nzoni na so ayeke sioni. “Zia bê ti mo kue na L’Eternel, na zia bê ti mo na hingango ye ti mo mveni pëpe. Mo bi bê ti mo na Lo na lege ti mo kue, na fade Lo sala si lege ti mo aga mbilimbili.”​—aProverbe 3:5, 6.

A lingbi e gi wango, nga na fango lege ti Jéhovah na ngoi ti mungo adesizion ngbanga ti nyen? (Psaume 146:3-5; Esaïe 48:17).

(2) Bible ayeke dä ti fa lege na e. “Teti tënë so nga, e mû merci na Nzapa lakue, teti, tongana i kamata Tënë ti Nzapa so e mû na i, i kamata Tënë ni tongana tënë ti azo pëpe, me, tongana Tënë ti Nzapa, na a yeke so biani, Tënë so asala na yâ i so i mä na bê.”​—1 aThessalonicien 2:13.

Tongana zo asala ye so “na lê ti lo mveni lo bâ” ayeke nzoni, kpale wa ayeke dä? (aProverbe 14:12; Jérémie 10:23, 24; 17:9).

Tongana e hinga pëpe wango so Bible amû na ndo mbeni tënë, a lingbi e sala nyen? (aProverbe 2:3-5; 2 Timothée 3:16, 17).

(3) Programme ti e kue ti tengo kobe ti yingo ayeke gi oko. “Fade L’Eternel afa nda ti tënë na amolenge ti mo; na fade amolenge ti mo aduti na siriri mingi.” (Esaïe 54:13). “Na a lingbi e bi bê ti e na ambeni zo na popo ti e ti wa ala si ala ndoye azo, na ala sala kusala nzoni; a lingbi e zia ti bungbi pëpe, legeoko tongana ambeni zo asala, me e wa tele ti e na ambeni zo, na a lingbi i wa tele ti i mingi ahon teti i bâ so lâ [ti futingo] ni aga ndulu.”​—aHébreu 10:24, 25.

Jéhovah aleke aye ti mû kobe ti yingo. Azo so ate ni nzoni ayeke wara aye ti nzoni wa? (Esaïe 65:13, 14).

(4) Jésus Christ ayeke Mokonzi ti e, a yeke mbeni zo ti sese pëpe. “I zia azo adi iri ti i Rabbi pëpe, teti Oko ayeke Maître ti i, na i kue i yeke aita. I di iri ti mbeni zo Babâ ti i na sese so pëpe, teti Oko ayeke Babâ ti i, Lo so ayeke na yayu. Na i zia ala di iri ti i aMaître pëpe, teti Oko ayeke Maître ti i, Christ mveni.”​—Matthieu 23:8-10.

A lingbi mbeni zo na popo ti e atene so lo yeke kota ahon atanga ni? (aRomain 3:23, 24; 12:3).

(5) E hinga so gi Royaume ti Nzapa si ayeke oko beku ti azo kue. “Tongaso, a lingbi i sambela na lege so: Babâ ti e so ayeke na yayu, e ye iri ti Mo aga nzoni-kue. E ye royaume ti Mo aga. E ye ala sala na sese ye so bê ti Mo aye legeoko tongana ala sala na yayu. Me i gi royaume ti Nzapa na mbilimbili ti Lo kozoni”.​—Matthieu 6:9, 10, 33.

‘Gingo royaume kozoni’ ayeke mû lege ti bata beoko ti e tongana nyen? (Michée 4:3; 1 Jean 3:10-12).

(6) Yingo vulu amû lege na awavorongo Jéhovah ti lë alengo so ayeke kota mingi teti beoko ti aChrétien. “Lengo ti Yingo ayeke ndoye, tâ ngia, siriri, be-nze-pepe, nzobe, bê ti sala nzoye, be-biani, tâ be-ti-molenge, na ngangu ti kanga nzara ti tele.”​—aGalate 5:22, 23.

Tongana e ye si yingo ti Nzapa alë alengo so na yâ e, a lingbi e sala nyen? (Kusala 5:32).

Dutingo na yingo ti Nzapa ayeke sala ye na ndo songo ti e na afon e Chrétien tongana nyen? (Jean 13:35; 1 Jean 4:8, 20, 21).

(7) Atâ wavorongo Nzapa kue ayeke fa nzo tënë ti Royaume ti lo. “Fade a fa tene-nzoni so ti royaume na sese so kue teti tënë ti témoin na amara kue; na tongaso fade nda ni aga.”​—Matthieu 24:14.

A lingbi ye wa apusu e ti mû mbage mingi na yâ kusala ti fango tënë? (Matthieu 22:37-39; aRomain 10:10).

11. Tongana e sala ye alingbi na atâ tënë ti Bible, ye nyen ayeke si na pekoni?

¹¹ Vorongo Jéhovah na beoko ayeke gboto e ndulu na lo mingi ahon. A yeke mû nga lege na e ti duti na pendere songo na aita ti e ti koli na ti wali. Psaume 133:1 atene: “Bâ, a yeke nzoni na a nzere mingi, tongana aita aduti na beoko!” A yeke biani ye ti dengo bê ti gue yongoro na sese so, yongoro na kion ti lo kue, pitan ti lo kue, salango ngangu ti lo kue, na ti bungbi na azo so andoye biani Jéhovah na abata andia ti lo!

Kpe aye so alingbi ti ga na kangbi

12. A lingbi e kpe bibe ti dutingo nde na Nzapa ngbanga ti nyen?

¹² Na ndo sese kue, e yeke na mbeni beoko ti ngele mingi. Ti futi ni pëpe, a lingbi e kpe aye so aga na kangbi. Mbeni oko ayeke bibe ti dutingo nde, yamba na Nzapa, nga na andia ti lo. Jéhovah ayeke mû maboko na e ti kpe ni na fango na gigi polele nda ti Satan, Diable (2 aCorinthien 4:4; Apocalypse 12:9). A yeke lani Satan si apusu Adam na Ève ti ke ti yeda na tënë so Nzapa atene na ala, na ti mû adesizion so ague nde na ye so bê ti Lo aye. Ye ti pekoni ayeke kota kpale teti ala nga teti e (Genèse 3:1-6, 17-19). Bibe ti dutingo nde na Nzapa nga na andia ti lo amû yâ ti sese so kue. Ni la, tongana bibe so aga na li ti e, a yeke nzoni e tomba ni.

13. Fade ye nyen afa so e yeke leke tele na bê kue ti duti na yâ fini sese ti Nzapa so mbilimbili ayeke dä?

¹³ Na tapande, Jéhovah amû pendere zendo ti futi sioni sese ti laso, na ti zia na place ni ambeni fini yayu na fini sese so “mbilimbili aduti na yâ ni.” (2 Pierre 3:13). A lingbi ye so apusu e pëpe ti komanse ti leke tele ti e ti duti na fini na ngoi so fade mbilimbili amû ndo kue? So aye ti tene a lingbi e bata wango so Bible amû polele: “I ndoye sese so pëpe, wala ye so ayeke na sese so. Tongana mbeni zo andoye sese so, ndoye ti Babâ ayeke na yâ lo pëpe”. (1 Jean 2:15). Tongaso, e kpe salango ye ti sese so: ti duti nde na Nzapa, ti tene zo apensé gi na ndo lo mveni, ye ti pitan, nga salango ngangu. A lingbi e dengi mê lakue na Jéhovah na e mä yanga ti lo na bê ti e kue. A lingbi e sala tongaso atâa so e yeke mbilimbili-kue pëpe. Fini ti e kue ayeke fa na gigi so bibe ti e na aye kue so apusu e ti sala ye ague gi na ndo salango ye so bê ti Nzapa aye.​—Psaume 40:9.

14. (a) Ngbanga ti nyen a lingbi e manda laso alege ti Jéhovah, na ti sala ye alingbi na ni na yâ fini ti e? (b) Aversê so afa na yâ ti paragraphe so aye ti tene nyen teti e?

¹⁴ Jéhovah aleke na bê ti lo ti futi sioni sese ti laso, nga na azo kue so andoye asalango ye ti sese so. Tongana ngoi so lo diko ndali ni asi awe, fade Jéhovah ayeke ku pëpe. Ambeni zo ayeke dä so angbâ ti ndoye sese so atâa so ala tene ala yeke sala na Nzapa. Me ala yeke manda ye so bê ti Nzapa aye na bê ti ala kue pëpe, na ala yeke bata nga ni pëpe na bê kue. Me fade Nzapa apusu ngoi ni na peko pëpe, wala lo changé nga pëpe andia ti lo ti tene alingbi na azo tongaso. Ngoi ti sala ye ayeke gi laso (Luc 13:23, 24; 17:32; 21:34-36). Tongaso, bâ tongana nyen a yeke mû wâ na bê ti bâ so azo mingi so asi singo ayeke gbu ngoi so lege angbâ ti zi! Na bê kue, ala yeke gi ti wara fango ye so Jéhovah ayeke mû na lege ti Bible na ti abungbi ti lo. Na beoko, ala yeke tambela na ndo alege ti lo ti gue na fini sese! Na tongana e manda ye mingi ahon na ndo Jéhovah, fade e ndoye lo, na e ye ti sala na lo nga mingi ahon.

Lisoro ti dango bê

• Ye so Jéhovah aye na ndo vorongo ayeke nyen?

• Tongana e manda awe akozo gere ti afango ye ti Bible, a lingbi na pekoni e sala nyen na bê kue?

• A lingbi e oko oko kue e sala nyen ti duti beoko na ambeni wakua ti Jéhovah?

[Foto na lembeti 4]

‘Fade sese ni aga ye ti héritier ti azo so ayeke na tâ be-ti-molenge, na fade ala wara ngia na yâ siriri so awu mingi’