Chapitre Use

Sepela Jéhovah tongana oko tâ Nzapa

1. Oko tâ Nzapa ayeke zo wa?

BIBLE atene atâa so azo mingi ayeke dä so a bâ ala tongana anzapa, “na lê ti e Nzapa ayeke gi oko, Babâ mveni”. (1 aCorinthien 8:5, 6). ‘Oko Nzapa’ so ayeke Jéhovah, Wasalango aye kue (Deutéronome 6:4; Apocalypse 4:11). Jésus atene so Jéhovah ayeke ‘Nzapa ti lo, nga Nzapa ti adisciple ti lo.’ (Jean 20:17). Lo yeda na Moïse so atene giriri: “L’Eternel [“Jéhovah”, NW] ayeke Nzapa, na mbeni nzapa nde ayeke pëpe.” (Deutéronome 4:35). Jéhovah ayeke kota mingi ahon aye kue so azo ayeke voro, tongana ayanda, azo so a bâ ala tongana anzapa, wala wato ti lo Satan Diable, so ayeke “nzapa ti sese so”. (2 aCorinthien 4:3, 4). Nde na aye so kue, Jéhovah ayeke ‘gi oko tâ Nzapa,’ tongana ti so Jésus ahiri na lo.​—Jean 17:3.

2. Tongana e yeke manda ye na ndo Jéhovah, a lingbi ye so andu fini ti e tongana nyen?

² Tongana azo so ayeke na bê ti kiri singila amanda apendere lengo ti Nzapa, ala yeke ga na mbage ti lo. Ala yeke ga nga ndulu na lo tongana ala manda ye so lo sala awe, nga ye so lo yeke sala ande teti e. Tongana ndoye so ala yeke na ni teti Jéhovah ayeke kono, ala yeke bâ so mbeni ye apusu ala ti sepela lo. Tongana nyen? Mbeni oko lege ni ayeke ti sala tënë ti lo na ambeni zo. A-Romain 10:10 atene so ‘zo asala tënë na gigi na yanga ti lo ti wara salut.’ Mbeni lege nde ti sala ni ayeke ti sala ye na ti sala tënë tongana lo. A-Ephésien 5:1 atene: “I sala legeoko tongana Nzapa asala, tongana amolenge so Lo ndoye i mingi”. Ti mû tapande ti Jéhovah mingi ahon, a lingbi e hinga atâ lengo ti lo.

3. Akota lengo ti Nzapa ayeke so wa?

³ Na yâ ti Bible kue, gbâ ti atënë ayeke dä so afa akpengba lengo ti Nzapa. Akota lengo osio ti lo ayeke ndara, mbilimbili, ngangu, na ndoye. ‘Ndara ayeke na Nzapa’. (Job 12:13). “Lege ti Lo kue ayeke mbilimbili”. (Deutéronome 32:4, e si e sû agere ti mbeti so nde). “Lo yeke na ngangu mingi”. (Esaïe 40:26, e si e sû agere ti mbeti so nde). “Nzapa ayeke ndoye.” (1 Jean 4:8, e si e sû agere ti mbeti so nde). Ye oko, na popo ti akota lengo osio ti Nzapa so, so wa ayeke kota mingi? So wa, so ahon atanga ni kue, afa mbilimbili mara ti Nzapa wa lo yeke?

“Nzapa ayeke ndoye”

4. Na popo ti alengo ti Nzapa, so wa apusu lo lani ti leke ndagigi nga na aye kue so ayeke na fini?

⁴ Bâ mbilimbili ye so apusu Nzapa ti leke ndagigi, a-ange, nga na azo ti sese. A yeke lani ndara wala ngangu ti lo? Pëpe, teti atâa so Nzapa asala lani kusala na ni, a yeke pëpe angangu so apusu lo ti sala ye. Nga, mbilimbili ti lo ahunda pëpe ti tene lo kangbi na azo fini so lo yeke na ni. Nde na so, a yeke biani kota ndoye ti Nzapa si apusu lo ti kangbi ngia ti dutingo na fini na ambeni zo. Ndoye apusu lo ti leke na bê ti tene azo so amä yanga aduti na fini ti lakue lakue na yâ Paradis (Genèse 1:28; 2:15). Ndoye apusu lo ti leke aye ti zi ngbanga so kengo yanga ti Adam aga na ni na ndo azo.

5. Ti Bible, lengo wa Jéhovah ayeke lo mveni, na ngbanga ti nyen?

⁵ Tongaso, na popo ti alengo kue ti Nzapa, a yeke ndoye si ayeke kota mingi. Ndoye ayeke tâ gi salango ye ti lo mveni. Atâa so ndara, mbilimbili, na ngangu ayeke akota lengo mingi, Bible atene lâ oko pëpe so Jéhovah mveni ayeke alengo so. Me Bible atene Jéhovah ayeke ndoye. Biani, Jéhovah mveni ayeke ndoye. A yeke pëpe gi asenge tënë so agbu bê si ayeke fa lege na ndoye so. Me a yeke akpengba-ndia ti tâ tënë na ti mbilimbili si ayeke fa lege na ndoye ti Nzapa. A yeke mara ti ndoye so ayeke kota ahon atanga ni kue, tongana ti so Jéhovah Nzapa mveni azia tapande ni. Mara ti ndoye tongaso ayeke nde mingi na bibe ti kion. Lakue, a yeke aye so zo asala si afa na gigi mara ti ndoye tongaso.

6. Ye nyen amû lege na e ti haka peko ti Nzapa atâa so lo yeke kota ahon e?

⁶ A yeke pendere lengo so si amû lege na e ti haka peko ti Nzapa. E lingbi ti tene so e lingbi lâ oko pëpe ti haka Nzapa nzoni, teti e yeke mbilimbili-kue pëpe, wala teti so e yeke girisa lege lakue. Me bâ mbeni tapande nde ti kota ndoye so Jéhovah afa: Lo hinga akatikati ti ye, lo yeda na ni, na lo hunda pëpe ti tene e duti mbilimbili-kue. Lo hinga so a yeke ngangu teti e ti duti mbilimbili-kue fadeso (Psaume 51:5). A yeke ngbanga ni la Psaume 130:3, 4 atene: “O L’Eternel, tongana Mo bata tënë ti sioye, O Seigneur, ka zo nyen alingbi ti ngbâ? Me pardon ayeke na Mo, si zo alingbi kpe mbito ti Mo.” Tâ tënë, Jéhovah ayeke “Nzapa ti be-nzoni na ti grâce, ngonzo ti Lo alondo fade pëpe, . . . na nzobe ti Lo ayeke kota mingi”. (Exode 34:6). “Mo, Seigneur, Mo yeke nzoni, na Mo ye ti pardone”. (Psaume 86:5). So tâ tënë ti lungulango vundu! Bâ tongana nyen a yeke dë bê biani ti sala na nzoni Nzapa tongaso, nga ti tene lo bata e na ndoye nga na be-nzoni!

7. A lingbi ti bâ ndoye ti Jéhovah na yâ aye so lo leke tongana nyen?

⁷ A lingbi nga ti bâ ndoye ti Jéhovah na yâ ti aye so lo leke. Gbu li na ndo apendere ye so Jéhovah aleke ti mû ngia na e: apendere hoto, agbako, abale, na angu-ingo. Lo mû na e mara ti akobe nde nde ti nzere na yanga ti e, na ti bata e. Nga, Jéhovah amû na e gbâ ti apendere fleure so afun nzoni, na anyama so apika bê. Lo leke aye so alingbi ti mû ngia na azo, atâa so lo yeke même na bezoin pëpe ti sala tongaso. Biani, e lingbi pëpe ti wara ngia kue na yâ ti aye so Nzapa aleke, teti e yeke laso na yâ mbeni sese ti sioni, na e yeke mbilimbili-kue pëpe (aRomain 8:22). Me tara ti gbu li na ndo ye so Jéhovah ayeke sala ande teti e na yâ Paradis! Wasungo psaume adë bê ti e: “Mo lungula maboko ti Mo, na Mo mû ye alingbi na [mbilimbili] nzara ti ye kue so ayeke na fini.”​—Psaume 145:16.

8. Kota fä ahon atanga ni kue ti ndoye ti Jéhovah teti e ayeke so wa?

⁸ Mbeni kota ye ahon atanga ni kue ayeke dä so afa ndoye ti Jéhovah teti azo. A yeke so wa? Bible atene: “Nzapa andoye sese so tongaso, Lo mû Molenge ti Lo ngengele oko, si zo so amä na bê na Lo alingbi kui pëpe, me lo yeke na fini ti lakue lakue.” (Jean 3:16). A yeke lani ngbanga ti so azo ayeke nzoni mingi si Jéhovah asala ye so? A-Romain 5:8 akiri tënë: “Nzapa afa na e ndoye ti Lo, teti tongana e de awasiokpari, Christ akui teti e.” Biani, a yeke ti zi e na gbe ti ngbanga ti kuâ na ti siokpari si Nzapa atokua Molenge ti lo so ayeke mbilimbili-kue ti mû fini ti lo tongana sadaka ti sö zo (Matthieu 20:28). Ye so amû lege na azo so andoye Nzapa ti wara fini ti lakue lakue. Singila mingi teti so ndoye ti Nzapa ague na mbage ti azo kue so aye ti sala ye so bê ti lo aye, teti Bible atene na e: “Nzapa ayekia mbeni zo teti lê ti lo pëpe; me na yâ amara kue, zo so akpe mbito ti Nzapa, na lo sala ye ti mbilimbili, lo lingbi na lê ti Lo.”​—Kusala 10:34, 35.

9. Jéhovah amû Molenge ti lo tongana kota ngele teti e. A lingbi ye so andu e tongana nyen?

⁹ Jéhovah amû Molenge ti lo tongana kota ngele ti sö e, na a sala si lege ti fini ti lakue lakue azi teti e. A lingbi aye so kue asala ngangu na ndo lege so e yeke sala kusala na fini ti e laso. Tongana nyen? A lingbi a kono ndoye ti e teti Jéhovah, so ayeke tâ Nzapa. Na oko ngoi ni, a lingbi a pusu e ti dengi mê na Jésus, so aga na iri ti Nzapa. “[Jésus a] kui awe teti azo kue, tongaso a lingbi ala so ayeke na fini aduti teti ala mveni mbeni pëpe, me ala duti teti Lo so akui . . . teti ala.” (2 aCorinthien 5:15). Ti mû peko ti Jésus ayeke biani ye so aga na ngia, teti lo zia lani nzoni tapande ti hakango peko ti ndoye na ti nzobe ti Jéhovah! Ye so asigigi polele na yâ ti atënë so Jésus atene na azo ti be-ti-molenge: “I ga na Mbi, i kue so i sala kusala na i yeke na kungba so ane, na fade Mbi mû na i lege ti hu tele. I yô joug ti Mbi, i manda tënë ti Mbi; teti Mbi yeke na tâ be-ti-molenge na bê ti Mbi ayeke kota pëpe; na fade i wara lege ti hu âme ti i. Teti joug ti Mbi ayeke nzoni, na kungba ti Mbi ane pëpe.”​—Matthieu 11:28-30.

Ndoye ambeni zo

10. Na alege wa e lingbi ti ndoye aita ti e Chrétien?

¹⁰ Tongana nyen e lingbi ti ndoye aita ti e tongana Jéhovah na Jésus? Bâ alege nde nde so e lingbi ti sala ni: “Ndoye anze fade pëpe, na asala be-nzoni; bê asala ndoye pëpe; ndoye asala baba pëpe; ndoye ayeke na be-kota pëpe, ndoye asala kirikiri pëpe, ndoye agi ye ti lo mveni pëpe, bê ti ndoye aso fade pëpe, ndoye adiko sioye pëpe; ndoye awara ngia na ye ti kirikiri pëpe, me ndoye awara ngia na tene-biani; ndoye agbu ngangu na yâ tënë kue, ndoye amä tënë kue na bê ti lo, ndoye aku ye kue, ndoye aduti kpô na yâ ye kue. Fade ndoye awe lâ oko pëpe”.​—1 aCorinthien 13:4-8; 1 Jean 3:14-18; 4:7-12.

11. A lingbi e ndoye nga azo wa, nga tongana nyen?

¹¹ A lingbi e ndoye azo wa nga, na tongana nyen? Jésus atene lani: “Tongaso i gue, i fa tënë na amara kue si ala ga adisciple, i batize ala na iri ti Babâ, na ti Molenge, na ti Yingo Vulu; i fa na ala ti bata ye kue so Mbi komande i.” (Matthieu 28:19, 20). So aye ti tene a lingbi e fa na azo so ade aga aita ti e Chrétien pëpe, nzo tënë ti fini sese ti paradis ti Nzapa so ayeke ga. Jésus afa polele so a lingbi ndoye ti e angbâ pëpe gi na azo so ayeda na atënë ti mabe ti e, teti lo tene: “Tongana i ndoye ala so andoye i, i wara futa ti nyen? Azo ti kamata lampo asala legeoko pëpe? Na tongana i balao gi aita ti i, i sala nyen ahon ambeni zo? A-Gentil asala legeoko pëpe?”​—Matthieu 5:46, 47; 24:14; aGalate 6:10.

‘Tambela na iri ti Jéhovah’

12. Iri ti Nzapa alingbi gi na lo oko ngbanga ti nyen?

¹² Mbeni kota mbage nde ti sepelango tâ Nzapa ayeke dä. A yeke ti hinga oko iri ti lo, Jéhovah, ti sala kusala na ni, na ti fa ni na ambeni zo. Wasungo psaume afa na gigi mbeni ye so lo hunda na bê ti lo kue: “Si [azo a] lingbi hinga gi Mo oko ayeke, Mo so iri ti Mo ayeke L’Eternel [“Jéhovah”, NW], Mo so Mo yeke Lo Ti Nduzu Ahon Kue na ndo sese kue.” (Psaume 83:19). Iri Jéhovah aye ti tene “Lo so asala si ye aga.” Lo yeke mbeni Kota Nzapa so aleke ye ti sala, na lo yeke sala lakue si a ga tâ tënë. Na a yeke gi oko tâ Nzapa si ayeke na droit ti yô iri so, teti azo alingbi lakue pëpe ti hinga wala aye so ala leke ti sala ayeke tambela ande nzoni (Jacques 4:13, 14). Gi Jéhovah oko si alingbi ti tene so fade atënë ti lo ‘asala ye so’ lo to ala ndali ni (Esaïe 55:11). Bê ti azo mingi ayeke pika tongana ala bâ iri ti Nzapa na yâ ti aBible ti ala ti fani oko ni, na tongana ala hinga nda ni (Exode 6:3). Me ala yeke wara aye ti nzoni na lege ti ye so ala hinga gi tongana ala “tambela na iri ti L’Eternel [“Jéhovah”, NW] . . . lakue lakue.”​—Michée 4:5.

13. Ti hinga iri ti Jéhovah na ti tambela na iri ti lo aye ti tene nyen?

¹³ Na ndo iri ti Nzapa, Psaume 9:11 atene: “Ala so ahinga iri ti Mo, fade ala zia bê ti ala na Mo”. So ahunda ye mingi ahon gi ti hinga iri ti Jéhovah. Gi ti hinga iri so senge tongaso aye pëpe ti tene zo so ahinga ni azia bê kue na ndo Jéhovah. Ti hinga iri ti Nzapa aye ti tene ti fa bê ti kiri singila teti mara ti Nzapa so lo yeke, ti yekia ngangu ti komande ti lo, ti yeda na akomandema ti lo, ti zia bê kue na lo na yâ aye kue (aProverbe 3:5, 6). Legeoko nga, tambelango na iri ti Jéhovah ahunda nga ti tene e mû tele ti e na lo, na e duti oko ti awavorongo lo. A lingbi e sala biani si fini ti e ague oko na ye so bê ti lo aye (Luc 10:27). Mo yeke sala ni?

14. Tongana e ye ti sala na Jéhovah teti lakue lakue, a yeke nzoni mbeni ye agbu e gbungo na ngangu na yâ kua ti e?

¹⁴ Tongana e ye ti sala na Jéhovah teti lakue lakue, a lingbi a duti mbeni ye si agbu e na ngangu pëpe ti sala ni. Atâa so asala angu mingi lani awe si Timothée ayeke sala na Jéhovah, Paul amû wango so na lo: ‘Mo leke bê ti mo ti duti ndulu na Nzapa’. (1 Timothée 4:7). A yeke bê ti kiri singila si ayeke pusu zo ti duti ndulu na mbeni zo. ‘Dutingo ndulu na Nzapa’ afa na gigi bibe ti kota kpengo mbito ti Jéhovah mveni. A fa nga na gigi mungo gi mbage ti lo oko, teti e bâ lo nga na alege ti lo na nene ni mingi. A yeke pusu e ti ye si azo kue ayekia iri so. Tongana e ye ti tambela na iri ti Jéhovah, oko tâ Nzapa, teti lakue lakue, a lingbi e gi ti duti ndulu na lo na yâ fini ti e.​—Psaume 37:4; 2 Pierre 3:11.

15. E lingbi ti sala gi na Nzapa oko tongana nyen?

¹⁵ Ti voro Nzapa na mbeni lege so lo yeda na ni, a lingbi e voro mbeni ye nde na tele ti lo pëpe, teti lo “yeke Nzapa so asala mbanda”. (Exode 20:5). E lingbi pëpe ti ndoye Nzapa, nga na oko ngoi ni, ti ndoye sioni sese so Satan ayeke nzapa ni (Jacques 4:4; 1 Jean 2:15-17). Jéhovah ahinga nzoni mingi mara ti zo wa e yeke gi lege ti ga ni (Jérémie 17:10). Tongana e ndoye mbilimbili biani, lo yeke bâ ni, na fade lo mû maboko na e ti gbu ngangu na yâ ti atara ti e ti lâ oko oko. Na mungo maboko na e na lege ti yingo vulu ti lo so ayeke ngangu mingi, fade lo mû lege na e ti hon na ngangu sioni so amû sese kue laso (2 aCorinthien 4:7). Lo yeke mû ande nga maboko na e ti bata lakue kpengba beku ti e ti fini ti lakue lakue na ndo sese so aga paradis. So tâ pendere beku! A lingbi e duti na kota bê ti kiri singila ndali ni, na e duti ndulu ti sala na tâ Nzapa Jéhovah, so azi lege ti fini so na e.

16. A lingbi mo sala nyen, legeoko na ambeni zo kutu mingi?

¹⁶ Na ndo sese kue, azo kutu mingi ayeda na hiringo ndo ti wasungo psaume, so asû na mbeti: “I sala si iri ti L’Eternel [“Jéhovah”, NW] aga kota legeoko tongana mbi sala, na zia e bungbi ti yâ iri ti Lo.” (Psaume 34:4). Jéhovah ahiri mo ti duti na popo ti gbâ ti azo ti amara kue so ayeke sepela iri ti lo.

Lisoro ti dango bê

• Jéhovah ayeke mara ti zo wa? Ye ti nzoni wa e yeke wara tongana e gbu nda ti alengo ti lo polele?

• E lingbi ti mû maboko na ambeni zo ti manda tâ tënë na ndo Nzapa tongana nyen?

• Ti hinga iri ti Jéhovah na ti tambela na iri so andu ye wa?

[Afoto na lembeti 14]

Na lege ti kota ndoye ti lo, ‘fade Jéhovah alungula maboko ti lo, ti mû ye alingbi na nzara ti ye kue so ayeke na fini’