Mbeni fini sese so Nzapa amû zendo ni
BIBLE, so ayeke Tënë ti Nzapa so a sû ni na mbeti, amû beku na e tongana a tene: “Na lege ti zendo ti Lo, e yeke ku ayayu ti fini na sese ti fini so mbilimbili aduti na yâ ni.”—2 Pierre 3:13.
“Ayayu ti fini” ayeke nyen? Bible azia kamba na popo ti yayu na yanga-ti-komande (Kusala 7:49). “Ayayu ti fini” so ayeke mbeni fini yanga-ti-komande so ayeke komande ande sese. A yeke fini teti so a yeke mû place ti ayanga-ti-komande ti fadeso; a yeke nga mbeni fini kapa na yâ gango tâ tënë ti ye so Nzapa aleke ti sala. A yeke Royaume so Jésus afa na e ti sambela ngbanga ni (Matthieu 6:10). Teti so Nzapa si ayeke Gunda ti yanga-ti-komande so, na lo yeke na yayu, a hiri ni “royaume ti yayu”.—Matthieu 7:21.
“Sese ti fini” ayeke nyen? A yeke pëpe mbeni tâ fini sese biani, teti Bible afa polele so fade azo ayeke lango na ndo sese so teti lakue lakue. Tongaso, “sese ti fini” ayeke mbeni fini bungbi ti azo. A yeke duti ande fini ngbanga ti so a yeke futi azo ti sioni (aProverbe 2:21, 22). Ala so kue ayeke duti na fini na ngoi ni so, fade ala yeke gonda Nzapa, ala yeke mä yanga ti lo na ala yeke sala ye alingbi na andia ti lo (Psaume 22:28). A tisa azo ti amara kue ti manda andia so na ti sala ye alingbi na ni na yâ fini ti ala laso. A yeke ye so mo yeke sala la?
Na yâ fini sese ti Nzapa, fade azo kue ayeke yekia komandema ti lo ti Gbia. Ndoye ti mo teti Nzapa ayeke pusu mo ti mä yanga ti lo? (1 Jean 5:3). A yeke bâ ni polele na yâ da ti mo, na place ti kua, na ekole wala na yâ lege so mo yeke sala kusala na fini ti mo?
Na yâ fini sese so, fade azo ayeke bungbi oko na yâ vorongo tâ Nzapa. Mo yeke voro Wasalango yayu na sese? Vorongo so mo mû na Nzapa ayeke sala biani si mo duti beoko na aita ti mo ti amara kue, ti akete mara kue na ti ayanga kue so ayeke sala na Nzapa?—Psaume 86:9, 10; Esaïe 2:2-4; Sophonie 3:9.
[Encadré na lembeti 17]
Nzapa so amû zendo ti aye so
Nzapa so ayeke lo so asala ayayu na sese. A yeke lo so Jésus Christ ahiri lo ‘gi oko tâ Nzapa’.—Jean 17:3.
Mingi ti azo ti sese ayeke voro anzapa so ala mveni aleke. Azo kutu mingi ayeke kuku na gbe ti a-image so ayeke na fini oko pëpe. Ambeni zo ni ayeke gonda aye wala ndokua ti kusala so azo asala, andara ti azo so amaï bibe ti tombango peko ti mosoro wala ala yeke yä anzara ti bê ti ala mveni. Même ti ala so atene so ala yeke sala gi ye so ayeke na yâ Bible, a yeke ala kue pëpe si amû gonda na iri ti lo so Bible ahiri lo ‘tâ Nzapa’.—Deutéronome 4:35.
Na salango tënë ti lo mveni, Wasalango ye atene: ‘Iri ti mbi ayeke Yahve [“Jéhovah”, NW ].’ (Esaïe 42:5, 8, Tene ti Nzapa, Kozo Mbouki ). Na yâ Bible, iri so asigigi fani 7 000 na ndo ni na yâ akozo yanga so a sû na ni. Jésus Christ afa na adisciple ti lo ti sambela tongaso: “Babâ ti e so ayeke na yayu, e ye iri ti Mo aga nzoni-kue.”—Matthieu 6:9.
Tâ Nzapa ayeke mara ti zo wa? Lo tene so ni yeke fa ‘be-nzoni nga na grâce, ngonzo ti ni alondo fade fade pëpe, tâ tënë na nzobe ti ni ayeke kota mingi’, na ni yeke gbanzi tele ti ni oko pëpe ti se ala so ayeke doro akomandema ti ni (Exode 34:6, 7). Mbaï ti asalango ye ti lo na mbage ti azo afa so biani lo yeke mara ti zo tongaso.
A lingbi a sala si iri ti lo, nga na lo mveni so ayô iri ni, aga nzoni-kue. Teti lo yeke Wasalango ye nga na Gbia ti ndagigi kue, lo lingbi biani ti duti lo so a lingbi e mä yanga ti lo na so a lingbi vorongo ti e kue ague na lo. A yeke ye so mo mveni mo yeke sala na mbage ti lo?
[Encadré/Foto na lembeti 18]
Afini ye wa fade “ayayu ti fini na sese ti fini” ayeke ga na ni?
Fade a yeke gbian sese ti ga paradis Luc 23:43
Azo ti amara kue, akete mara kue na Jean 13:35;
ayanga kue ayeke sala beoko Apocalypse 7:9, 10
na yâ ndoye
Tâ siriri na ndo sese kue nga Psaume 37:10, 11;
nzoni dutingo teti azo kue Michée 4:3, 4
Kua so amû ngia na azo nga gbâ ti kobe Esaïe 25:6; 65:17, 21-23
A yeke lungula kobela, vundu na kui Esaïe 25:8;
Mbeni sese so azo ni asala beoko Apocalypse 15:3, 4
na yâ vorongo ti tâ Nzapa
[Encadré/Afoto na lembeti 19]
Fade mo wara nzoni dä?
Nzapa alingbi pëpe ti tene mvene!—Tite 1:2.
Jéhovah atene: “Fade tënë ti Mbi akiri na Mbi senge pëpe, me a sala ye so Mbi ye, na fade tënë ni awu na kusala so Mbi to lo dä.”—Esaïe 55:11.
Jéhovah angbâ ti leke “ayayu ti fini na sese ti fini”. Yanga-ti-komande ti yayu so ato nda ti sala kusala awe. A zia gunda ti “sese ti fini” ni laso awe.
Na pekoni so lo fa ambeni ye ti pendere mingi so “ayayu ti fini na sese ti fini” ayeke ga na ni na azo, Apocalypse afa peko ti yanga ti Nzapa mveni, Kota Gbia ti ndagigi kue, so atene: “Bâ, Mbi sala si ye kue aga fini.” Na Lo tene nga: “Sala tënë so na mbeti, teti tënë so ayeke tâ tënë na biani.”—Apocalypse 21:1, 5.
Kota hundango tënë so andu fini ti e biani ayeke so: E yeke gbian aye na yâ fini ti e tongana ti so a hunda ti wara lege ti duti na popo ti azo ti “sese ti fini” so na gbe ti komandema ti “ayayu ti fini”?