Fini Sese​—Mo Yeke Duti Dä Ande?

“Mbeni ye ti nzoni ahon teti ala ayeke pepe, gi ti sala ngia na ti sala nzoni na lâ ti fini ti ala kue. Na a lingbi azo kue ate na anyon na awara ngia na yâ kusala kue ti ala, ye so kue ayeke matabisi ti Nzapa nga.”​—ZO-TI-FA-TENE 3:12, 13.

1. Ngbanga ti nyen e lingbi ti tene so na ngoi ti kekereke ye ayeke ga nzoni?

AZO MINGI aba Nzapa ti Ngangu Ahon Kue tongana mbeni zo so akpengba mingi, na ayeke ngangu. Ye oko, versê so ayeke na nduzu ge ayeke mbeni tâ tene so mo lingbi ti wara na yâ Tene ti lo so asû na gbe ti yingo. A gue legeoko na dutingo ti lo ti “Nzapa so ayeke na ngia,” nga na lege so lo zia akozo babâ na mama ti e na yâ mbeni paradis na ndo sese. (1 Timothée 1:11; Genèse 2:7-9) Tongana e yeke gi ti hinga ye nzoni na ndo ngoi ti kekereke so Nzapa amu zendo ni na azo ti lo, a lingbi bê ti e adö pepe ti manda tene ti aye so ayeke ga ande na e ngia so aninga.

2. Ambeni ye so mo yeke ku ayeke so wa?

² Na yâ ti article so ahon, e ba awe ota ti angoi osio so Bible asala kozoni tene ti “ayayu ti fini na sese ti fini.” (Esaïe 65:17) Na Apocalypse 21:1, a sû mbeni oko ti aprophétie so e lingbi ti zia bê dä. Aversê so aga na pekoni asala tene ti ngoi so fade Nzapa ti Ngangu Ahon Kue ayeke gbian ngangu mingi aye so ayeke na ndo sese ti ga nzoni ahon. Fade lo mbô angule ti vundu. Fade azo ayeke kui pepe ndali ti gango mbakoro, kobela, wala andao. Mua, wuluwulu, na pasi ayeke hon ande biaku. Tâ so mbeni pendere beku! Me e lingbi ti yeda na bê kue so fade ye tongaso ayeke si, na ye wa mara ti beku tongaso alingbi ti sala na ndo e laso?

Anda ti Tene so Apusu E ti Mä na Bê Kue

3. Ngbanga ti nyen e lingbi ti zia bê kue na ndo azendo ti Bible so andu ngoi ti kekereke?

³ Ba tongana nyen Apocalypse 21:5 angbâ ti gue na li ni. A fa peko ti tene ti Nzapa so ayeke na ndo mbata ti lo ti yayu, lo tene: “Ba! Mbi yeke sala ye kue fini.” Zendo ti Nzapa so ayeke pendere ahon tene kue ti lipanda so mbeni mara alingbi ti leke, pendere ahon tene ti a-droit so azo aleke na ngoi ti e, wala pendere ahon abibe kue so zo alingbi ti duti na ni teti kekereke. A yeke mbeni tene so zo alingbi biani ti zia bê na ndo ni, mbeni tene so alondo na Zo so Bible atene lo “lingbi sala mvene pepe.” (Tite 1:2) Na lege ni, mo lingbi ti ba so a yeke nzoni e ngbâ na ndo so, ti wara ngia na yâ pendere beku so na ti zia bê kue na Nzapa. Me a hunda e ti ngbâ ge pepe. Aye mingi angbâ teti e ti manda na ndo kekereke ti e.

4, 5. Aprophétie wa ti Bible so e ba awe alingbi ti kpengba ziango bê ti e kue na ndo ye so ayeke ku e?

⁴ Gbu li ti mo kete na ye so article so ahon afa na ndo azendo ti Mbeti ti Nzapa so andu ayayu ti fini na sese ti fini. Isaïe afa giriri tene ti mbeni fini bungbi ti aye tongaso, na prophétie ti lo aga tâ tene tongana aJuif akiri na kodoro ti ala na ala kiri azia na sese tâ vorongo. (Esdras 1:1-3; 2:1, 2; 3:12, 13) Me so ayeke la ni ye kue so prophétie ti Isaïe agboto lê na ndo ni? Oko pepe! Aye so lo fa tene ni kozo ayeke ga ande tâ tene ti kota ni na mbeni ngoi so angbâ la ni yongoro mingi. Ngbanga ti nyen e tene tongaso na nda ni? Teti ye so e diko na 2 Pierre 3:13 na Apocalypse 21:1-5. Aversê so asala tene ti ayayu ti fini na sese ti fini so ayeke ga ande na anzo ye na aChrétien na ndo sese kue.

⁵ Tongana ti so e tene kozoni, Bible asala kusala na tene “ayayu ti fini na sese ti fini” fani osio. E ba awe ota na popo ni na atene so e si dä na nda ni amu ngangu na zo. Na fango ni polele, Bible atene giriri so fade Nzapa ayeke futi biaku sioni nga na ambeni lingu ti pasi, na fade na pekoni lo yeke hiri deba nzoni na ndo ti azo na yâ fini bungbi ti aye so lo mu zendo ni.

6. Ye wa osio prophétie ni so asala tene ti “ayayu ti fini na sese ti fini” asala giriri tene ni?

⁶ Zia e ba fadeso ndangba ngoi so awara tene “ayayu ti fini na sese ti fini,” na Esaïe 66:22-24: “L’Eternel atene, Legeoko tongana ayayu ti fini na sese ti fini, so fade Mbi créé, angbâ lakue na gbele Mbi, fade ahale ti i na iri ti i angbâ tongaso nga. Na fade tene asi tongaso, a to nda ni na fini nze juska mbeni fini nze, na a to nda ni na lâ ti sabbat juska mbeni lâ ti sabbat, fade mi kue aga ti sambela na gbele Mbi, L’Eternel atene. Fade ala sigigi na ala ba akuâ ti azo so ake Mbi; teti fade ngusu ti ala akui pepe, na wâ ti ala amingo pepe; na fade ala ga ye ti ke na lê ti mi kue.”

7. Ngbanga ti nyen na nda ni e lingbi ti tene so Esaïe 66:22-24 ayeke wara ande mbeni gango tâ tene na alango so ayeke ga?

⁷ Prophétie so aga tâ tene la ni na popo ti aJuif so akiri na yâ kodoro ti ala, me a duti nga na mbeni gango tâ tene nde. Gango tâ tene so alingbi ti duti yongoro kâ na peko ti salango use mbeti ti Pierre nga na Apocalypse, teti ala gboto lê na ndo mbeni ‘yayu ti fini na sese ti fini’ so ayeke ga ande. E lingbi ti ku mbeni gango tâ tene ti kota na ti biaku na yâ fini bungbi ti aye. Ba ambeni dutingo so e lingbi ti ku ti wara ngia dä.

8, 9. (a) Na lege wa fade azo ti Nzapa ‘angbâ ti luti’? (b) Kota ti prophétie so atene fade awakua ti Jéhovah ayeke voro lo “a to nda ni na fini nze juska mbeni fini nze, na a to nda ni na lâ ti sabbat juska mbeni lâ ti sabbat” ayeke so wa?

⁸ Apocalypse 21:4 afa so fade kui ayeke mbeni pepe. Versê ti Esaïe 66 ague legeoko na bibe so. E lingbi ti ba na versê 22 so Jéhovah ahinga so ayayu ti fini na sese ti fini ayeke gi teti kete ngoi pepe. Na ndo ni, fade awakua ti lo ayeke ngbâ teti lakue lakue; fade ala ‘ngbâ ti luti’ na gbele lo. Ye so Nzapa asala awe na mbage ti mara so lo soro apusu e ti zia bê kue na tene so. Atâ Chrétien awara asioni ye ti ngangu mingi, même ambeni zo asala ngangu kue ti futi ala biaku. (Jean 16:2; Kusala 8:1) Ye oko, atä awato ti azo ti Nzapa so ayeke na ngangu mingi, tongana Togbia ti Rome Néron wala Adolf Hitler, ala wara lege pepe ti hunzi biaku awakua be-biani ti Nzapa, so ayö iri ti lo. Jéhovah abata kongrégation ti azo ti lo, na e hinga na bê kue so lo yeke ngbâ ande ti mu maboko na lo ti luti lakue lakue.

⁹ Legeoko nga, azo ti fini sese so aduti be-ta-zo na Nzapa, bungbi ti atâ wavorongo lo na yâ fini sese, ayeke ngbâ ande ti luti na gbele lo, tongana zo oko oko, teti ala yeke mu mbeni vorongo so ayeke na sioni pepe na Wasalango aye kue. Vorongo so ayeke duti ande pepe gi ngoi na ngoi, wala pepe gi tongana lege ayeke dä. Ndia so Nzapa amu giriri na Israël na lege ti Moïse, ahunda la ni ambeni kusala ti vorongo nze oko oko, na ngoi ti fini nze, nga yenga oko oko, na lâ ti Sabbat. (Lévitique 24:5-9; Nombre 10:10; 28:9, 10; 2 Chronique 2:4) Tongaso Esaïe 66:23 afa so vorongo so ayeke mu na Nzapa ayeke duti lakue lakue, yenga na yenga nga nze na nze. Bibe so atene Nzapa ayeke dä pepe nga na ndendia ti lege ti vorongo ayeke duti ande na lâ ni kâ mbeni pepe. “Fade mi kue aga ti sambela na gbele” Jéhovah.

10. Ngbanga ti nyen mo lingbi ti yeda na bê kue so fade azo ti sioni alingbi ti buba pepe fini sese?

¹⁰ Esaïe 66:24 amu na e beku so fade a yeke sala sioni mbeni lâ oko pepe na siriri nga na mbilimbili so ayeke duti na yâ fini sese. Fade azo ti sioni ayeke buba ni pepe. Dabe mo so 2 Pierre 3:7 atene so “lâ ti fango ngbanga, na lâ ti futi . . . azo so ake Nzapa” ayeke na gbele e. Azo so ayeke kui ande ayeke “azo so ake Nzapa.” Sioni oko ayeke si pepe na azo so tene ayeke na li ti ala pepe, tongana ti so a yeke si fani mingi na yâ ti abira so azo asala, so na yâ ni wungo ti asenge zo so akui ahon ti aturugu. Kota Wafango ngbanga amu na e tâ beku so lâ ti lo ayeke teti futingo ti azo so ake Nzapa.

11. Isaïe afa atene ye wa ayeke si ande na zo kue so ake Nzapa nga na vorongo ti Lo?

¹¹ Azo ti mbilimbili so ayeke sö ande kuâ ayeke ba so tene ti prophétie ti Nzapa ayeke tâ tene. Versê 24 afa so “akuâ ti azo so ake” Jéhovah ayeke duti ande fä ti fango ngbanga ti lo. Tene so Isaïe afa pekoni polele alingbi ti so bê ti zo. Ye oko, a tene gi peko ti ye so asi na yâ ti mbaï. Na gigi ti agbagba ti Jérusalem ti giriri, a yeke wara ando ti tukungo zende, na ngoi na ngoi, ayeke bi nga dä akuâ ti asioni zo ti kengo ndia so afâ ala, so aba atene a lingbi na lungo ni pepe.a Fade fade, angusu na wâ so ayeke gbi dä ahunzi azende nga na akuâ so. Biani, Isaïe amu la ni tapande so ti fa ye so fango ngbanga ti Jéhovah ayeke sala biaku na ndo ala so ake ndia.

Ye so Lo Mu Zendo Ni

12. Ambeni tene nde wa Isaïe afa na ndo tene ti fini na yâ fini sese?

¹² Apocalypse 21:4 asala na e tene ti ambeni ye so ayeke duti ande dä pepe na yâ fini bungbi ti aye so ayeke ga. Me, ye wa ayeke duti ande dä na ngoi ni so? Fade azo ayeke duti na fini tongana nyen? E lingbi ti wara mbeni bibe na ndo ni, so a lingbi ti zia bê na ni? Biani. Na lege ti prophétie, Esaïe chapitre 65 afa aye so e lingbi ande ti wara ngia dä tongana Jéhovah ayeda na e ti duti na fini na ngoi so, biani, lo yeke leke ayayu ti fini na sese ti fini so. Ala so a hiri deba nzoni na ndo ala ti duti ande na mbeni ndo teti lakue lakue na yâ fini sese ayeke ga mbakoro pepe si na nda ni ala ku gi ti kui kuingo. Esaïe 65:20 adë bê ti e: “Fade foroto so akui fade fade ayeke pepe, na mbakoro so akui kozoni si ngu ti lo alingbi ayeke nga pepe. Zo so akui tongana ngu ti lo asi na ngu ngbangbo oko, fade a ba lo tongana molenge; na fade a zonga wasiokpari so ngu ti lo asi na ngu ngbangbo oko.”

13. Tongana nyen Esaïe 65:20 adë bê ti e so fade azo ti Nzapa ayeke duti nzoni?

¹³ Tongana ye so aga tâ tene ti kozoni na ndo mara ti Isaïe, a ye ti tene la ni so aforoto ti kodoro ni ayeke na nzoni dutingo. Fade mbeni wato oko pepe ayeke ga ti gbu na ngangu aforoto, wala ti futi azo so ade ngangu, tongana ti so azo ti Babylone asala giriri. (2 Chronique 36:17, 20) Na yâ ti fini sese so ayeke ga, fade azo ayeke na nzoni dutingo na ala lingbi ti wara ngia na yâ fini. Tongana mbeni zo asoro ti sala kpengba-li ti ke Nzapa, fade a yeke mu lege na lo pepe ti ngbâ na fini. Nzapa ayeke lungula lo. Na tongana wasiokpari so ake yanga ayeke na ngu ngbangbo oko? Fade lo kui “tongana molenge” tongana a haka ni na fini ti lakue lakue.​—1 Timothée 1:19, 20; 2 Timothée 2:16-19.

14, 15. Na lege ti Esaïe 65:21, 22, mo lingbi ti ku ti sala apendere kusala wa?

¹⁴ Ahon ti ngbâ na ndo lege so ayeke lungula ande na mbeni zo so asala siokpari na mbana, Isaïe asala tene ti dutingo ti fini so ayeke wara ande na yâ fini sese. Tara ti ba so mo yeke na ndo so asala tene ni. Ye so peut-être aga kozo na li ti mo, ayeke aye so andu mbilimbili atene so agbu bê ti mo. A yeke ye so Esaïe asala tene ni na aversê 21 na 22: “Fade azo asala da, na ala duti na yâ ni; fade ala lu vigne na yaka, na ala te lê ni. Fade azo asala da si mbeni zo aduti na yâ ni pepe; fade ala lu ye si mbeni zo ate pepe; fade lâ ti azo ti Mbi ayeke mingi tongana lâ ti keke; na azo ti Mbi so Mbi hiri ala, fade ala wara ngia na kusala ti maboko ti ala teti lâ mingi.”

¹⁵ Tongana ade mo leke da lâ oko pepe wala ade mo lu yaka lâ oko pepe, prophétie ti Isaïe afa so mbeni fango ye ayeke ku mo. Me, mo yeke ye ande ti manda ni na maboko so awafango ye so alingbi ayeke mu na mo, peut-être azo ti nzobe so alango ndulu na mo so ayeke na ngia ti mu maboko na mo? Isaïe afa pepe so da ti mo ayeke duti ande na akota fenêtre so ayeke na a-rideau me na vitre pepe, so ayeke mu lege na mo ti wara pendere pupu so ayeke ya, wala tongana da ni ayeke duti ande na afenêtre so a-vitre ayeke dä si mo lingbi ba na gbiango ti angoi na gigi. Na yâ ti plan ti da ti mo, mo leke ti sala li ti da ni na dengingo ni si ngu-nduzu na neige asua na ndo ni? Wala a lingbi na ndo so mo yeke dä, fade mo leke li ti da ni kpangbala, tongana mbeni oko ti ala so a wara na Moyen-Orient, mbeni li ti da so mo na sewa ti mo ayeke wara tele dä ti te na anzoni kobe na ti sala lisoro?​—Deutéronome 22:8; Néhémie 8:16.

16. Ngbanga ti nyen mo lingbi ti ku ti tene fini sese amu ngia na e teti lakue lakue?

¹⁶ Ye so ayeke kota mingi ahon ti hinga anzene nzene tene so ayeke so mo yeke duti ande na da ti mo mveni. A yeke duti ande ti mo, pepe tongana ti laso so azo ayeke ba pasi ti leke ndo, na mbeni zo nde si awara nzoni dä. Esaïe 65:21 atene nga so fade mo lu na mo te lengo ni. Biani, ye so afa dutingo ti aye ni kue. Fade mo wara kota ngia na lege ti angangu so mo sala, fade mo ko lengo ti kusala ti mo. Na fade mo yeke sala ni na yâ fini so aninga, “tongana lâ ti keke.” Ye so alingbi biani na tene “ye kue fini”!​—Psaume 92:13-15 (92:12-14, NW).

17. Fade ababâ na mama aba so zendo wa amu biani wâ na bê?

¹⁷ Tongana mo yeke na amolenge, fade atene so ayeke ndu bê ti mo: “Fade ala sala kusala senge pepe, na ala dü amolenge ti wara vundu pepe; teti ala yeke ahale ti azo so L’Eternel ahiri nzoni tene na ndo ala, na fade amolenge ti ala ayeke na ala nga. Na fade tene asi tongaso, kozoni si azo ahiri Mbi, fade Mbi yeda; na tongana ala de ti sala tene, fade Mbi mä ala.” (Esaïe 65:23, 24) Mo hinga pasi ti “dungo amolenge ti wara vundu”? E lingbi pepe ti diko molongo ti akpale kue so ayeke si na amolenge so ayeke mu vundu na ababâ na mama nga na ambeni zo. Na oko lege so, e kue e ba awe ambeni babâ na mama so kua ti nginza ti ala, akusala ti ala, wala angia ti ala agbu bê ti ala mingi na tongaso ala yeke na ngoi mingi pepe ti mu teti amolenge ti ala. Nde na so, Jéhovah amu na e tâ beku so fade lo yeke dengi mê na aye so atia e na lo mu ni na e, na même lo yeke bata si aye ni atia e pepe.

18. Ngbanga ti nyen mo lingbi ti ku ti wara ngia na tele ti anyama na yâ fini sese?

¹⁸ Na ngoi so mo yeke bi bê na ndo ye so mo lingbi ti wara ngia dä na yâ fini sese, ba na li ye so tene ti prophétie ti Nzapa afa: “‘Fade ikaï na molenge ti ngasangbaga ate kobe na ndo oko; fade bamara ate pele tongana bagara; na fade pupu-sese aga kobe ti ngbo. Fade a sala ye ti ngangu, wala a futi ye pepe na hoto ti mbi kue ti nzoni-kue,’ Jéhovah atene.” (Isaïe 65:25, NW) Ambeni wakode ti ndara atara ti sala dessin ti tene so, me ye so ayeke pepe gi mbeni senge dessin ti ndara so na yâ ni mbeni wakode afa abibe ti lo kue dä. Ye so ayeke duti ande tâ ye. Fade siriri ayeke duti na popo ti azo, nga na anyama. Awandara na ndo fini na ala so aye tene ti anyama mingi ayeke mu apendere ngoi ahon ti fini ti ala ti manda ye na ndo ambeni kete mara ti anyama, peut-être gi mbeni kete mara oko wala mara oko. Nde na so, bi bê na ye so mo lingbi ande ti manda tongana azo asala mbeni pepe mbito na anyama. Na ngoi ni so, mo lingbi ti ga ndulu même na andeke nga na akete kete nyama so alango na yâ ti gbako; biani mo lingbi ti ba ala, ti manda ye na lege ti ala, na ti wara ngia na bango ala. (Job 12:7-9) Na fade mo lingbi ti sala ni na siriri, azo wala anyama ayeke sala sioni na mo pepe. Jéhovah atene: “Fade a sala ye ti ngangu, wala a futi ye pepe na hoto ti mbi kue ti nzoni-kue.” Ye so ayeke duti ande nde tongana a haka na ye so e yeke ba na e hinga fadeso!

19, 20. Ngbanga ti nyen azo ti Nzapa ayeke biani nde na tanga ti azo mingi laso?

¹⁹ Tongana ti so a fa kozoni awe, azo alingbi oko pepe ti fa mbilimbili ye so ayeke si kekereke, atä agingo bê so ayeke londo na ndo nde nde ngbanga ti mbeni fini ngoi ti ngu saki oko. Ye so asala si bê ti azo mingi anze, ala yeke na gingo bê, même ala hinga pepe ye ti sala. Peter Emberley, wayinda ti mbeni da senda-gi na Canada, asû na mbeti: “Mingi [ti azo so aga biazo] aluti fadeso na gbele akozo hundango tene so andu fini. Mbi yeke zo wa? Ye nyen mbi yeke gi biani? Ye wa mbi zia tongana ye ti héritier na wagame so ayeke ga? Na ngoi so ala si na ndambo ti fini ti ala, ala yeke tiri ti leke yâ ti dutingo ti ala na ti sala si nda ti fini ti ala ayeke dä.”

²⁰ Mo lingbi ti hinga ngbanga ti nyen a yeke tongaso teti azo mingi. Ala lingbi ti gi ti wara ngia na lege ti ambeni kusala so anzere na ala wara ambeni mara ti salango ngia so ayengi zo mingi. Ye oko, ala hinga pepe ye so ayeke ku ala kekereke, na tongaso, na lê ti ala, nda ti fini ayeke pepe, a tambela na lege ni pepe, a yeke biani na nda ni pepe. Fadeso, haka fini ti mo na ti ala, na lege ti ye so e manda. Mo hinga so na yâ ti ayayu ti fini na sese ti fini so Jéhovah amu zendo ni, e lingbi ande ti ba ndo na tele ti e na ti tene na bê ti e kue: ‘Biani, Nzapa asala ye kue fini!’ Ba tongana nyen e yeke wara ande ngia na yâ ye so!

21. Ye oko wa e yeke wara na Esaïe 65:25 nga na Esaïe 11:9?

²¹ A yeke tene ti baba pepe ti ba tele ti e na dutingo na fini na yâ fini sese ti Nzapa. Lo tisa, na même lo hunda na e ngangu, ti voro lo na tâ tene fadeso na ti lë alengo so a hunda ti duti na fini na ngoi so ‘fade ala sala ye ti ngangu wala afuti ye pepe na yâ hoto ti lo kue ti nzoni-kue.’ (Isaïe 65:25, NW) Ye oko, mo hinga so Isaïe asala kusala kozoni na mara ti tene tongaso na so lo yôro na yâ ni mbeni kpengba ye so ayeke kota mingi teti e ti duti na ngia biani na yâ fini sese? Isaïe 11:9 (NW) atene: “Fade ala sala sioni oko pepe wala asala pepe si afuti ye na yâ hoto ti mbi kue ti nzoni-kue; teti fade sese asi singo biani na hingango ye ti Jéhovah tongana ti so ngu ahon ndo ti ngu-ingo kue.”

22. A lingbi ye so e manda na ndo aprophétie osio ti Bible akiri akpengba lekengo na bê ti e kue ti sala nyen?

²² “Hingango ye ti Jéhovah.” Na ngoi so Nzapa ayeke sala ande ye kue fini, fade azo ti sese ayeke wara tâ hingango ye na ndo ti lo nga na ndo ti ye so bê ti lo aye. Fade ye so ayeke ndu ye mingi ahon gi ti manda ye na lege ti anyama so acréé. A ndu nga Tene ti lo so asû na gbe ti yingo. Na tapande, gbu li na ndo ye mingi so e ba awe na lege ti gingo gi nda ti aprophétie osio so asala tene ti “ayayu ti fini na sese ti fini.” (Esaïe 65:17; 66:22; 2 Pierre 3:13; Apocalypse 21:1) Mo yeke na mbeni nzoni nda ti tene ti diko Bible lâ oko oko. A yeke mbeni ye so mo yeke sala lakue? Tongana a yeke tongaso pepe, aye wa mo lingbi ti kiri ti leke si lâ oko oko mo lingbi ti diko ande mbeni mbage ti aye so Nzapa aye ti tene? Fade mo ba so, na ndo ti kungo ti wara ngia ande na yâ fini sese, mo yeke wara ngia mingi ahon fade fadeso, gi tongana ti so wasungo psaume awara giriri.​—Psaume 1:1, 2.

[Kete Tene na Gbe Ni]

Mo Yeke Kiri Tene Tongana Nyen?

• Ngbanga ti nyen e lingbi ti tene na nda ni so Esaïe 66:22-24 asala giriri tene ti mbeni ye so angbâ na gbele e?

• Na popo ti aye so afa na yâ ti aprophétie na Esaïe 66:22-24 nga na Esaïe 65:20-25, so wa mo yeke ku mbilimbili?

• Anda ti tene wa mo yeke na ni ti zia bê kue na ndo kekereke ti mo?

[Afoto na lembeti 15]

Isaïe, Pierre, na Jean asala giriri tene ti ambeni mbage ti “ayayu ti fini na sese ti fini”