A fa kozoni awe ye so ayeke si ande kekereke

NA NGOI so bazengele Pierre ayeke sara tënë na ndo ti kekereke ti azo na ndo ti sese, lo tene: “Na lege ti zendo ti Lo [Nzapa], e yeke ku ayayu ti fini na sese ti fini so mbilimbili aduti na yâ ni.” (2 Pierre 3:13). Prophète Esaïe ayeke kozo zo so asara tënë ti “ayayu ti fini na sese ti fini” so a mû zendo ni (Esaïe 65:17; 66:22). Na kiringo na ndo ti atënë ti prophétie ti Esaïe so, Pierre afa so tënë ni ade ti ga tâ tënë kue pëpe na ngoi ti lo Pierre ni.

A si na mbeni ngoi, na ngu 96 tongaso, na yâ ti aye so bazengele Jean asû na yâ ti mbeti ti Apocalypse, lo bâ so “fini sese” ni ague oko na aye ti nzoni so Royaume ti Nzapa ayeke ga ande na ni (Apocalypse 21:1-4). Laso, e yeke bâ gango tâ tënë ti aye so Jésus nga na bazengele Paul atene ayeke si ngoi kete kozoni si Royaume ti Nzapa aga. Ni la, e lingbi ti ku ti tene na yâ ti kete ngoi Royaume ti Nzapa asara ande si mbeni fini dunia abâ gigi. Fini dunia so ayeke duti ande tongana nyen? Mbeti ti Esaïe afa ni.

Aye ti nzoni so ayeke bâ ande gigi na yâ ti fini dunia

Siriri amû ndo kue nga azo kue avoro Nzapa oko. “Fade ala pika épée ti ala si a ga soc, na likongo ti ala si a ga zeme ti fâ tikeke; fade mara ayä épée na tere ti mbeni mara pëpe, na fade ala manda lege ti sara bira mbeni pëpe.”​—Esaïe 2:2-4.

Siriri na popo ti azo nga na anyama. “Fade ikaï aduti na ndo oko na molenge ti ngasangbaga, na ze alango na sese na tere ti molenge ti ngasa; molenge ti bagara, na pendere bamara, na bagara ti mafuta, fade ala lango na ndo oko; na fade kete molenge afa lege na ala. Fade mama ti bagara na ours ate kobe na ndo oko, amolenge ti ala alango na sese na ndo oko; fade bamara ate pere tongana bagara. . . . Fade a sara ye ti ngangu, wala a futi ye pëpe na Hoto ti Mbi ti nzoni-kue; teti fade sese ni asi na ndara ti L’Eternel, legeoko tongana kota ngu ti ingo asi na ngu.”​—Esaïe 11:6-9.

Gbâ ti kobe teti azo kue. “Na ndo hoto so, fade L’Eternel Ti Sabaoth asara pumba teti azo kue, pumba ti ye ti mafuta, pumba ti vin so angbâ na yâ ta ni lâ mingi, pumba ti ye ti mafuta so asi na mafuta ti bio, na pumba ti vin ti nzoni mingi so angbâ na yâ ta ni lâ mingi.”​—Esaïe 25:6.

Kui ayeke dä mbeni pëpe. “Lo [Nzapa ahunzi] kui teti lakue lakue; fade Seigneur L’Eternel ambô ngule na lê ti azo kue; na fade Lo lungula zonga ti azo ti Lo na ndo sese kue, teti L’Eternel asara tënë so awe.”​—Esaïe 25:8.

A yeke zingo ande akuâ. “Fade akinda ti mo akiri na fini; fade akuâ ti mbi alondo. I zingo, i sara bia, i so i duti na yâ pupu-sese, . . . na fade sese abi awakinda na gigi.”​—Esaïe 26:19.

Messie ni ayeke Juge ti mbilimbili. “Fade ngia ti Lo ayeke ti kpe mbeto ti L’Eternel; fade Lo fâ ngbanga pëpe na lege ti ye so lê ti Lo abâ, na Lo leke tënë pëpe na lege ti tënë so mê ti Lo amä; me fade Lo fâ ngbanga ti awanzinga mbilimbili, na Lo leke tënë na lege ni teti azo ti tâ be-ti-molenge ti sese so.”​—Esaïe 11:3, 4.

Awaziba abâ ndo, azo so mê ti ala akanga amä ndo. “Na lâ ni kâ, fade lê ti awaziba alungula, na mê ti awambongi alungula nga.”​—Esaïe 35:5.

Asese so abuba akiri alë lê ti kobe. “Fade yando na kuru sese ayeke na ngia; fade désert ayeke na tâ ngia na ambumba tongana rose. Fade [kongö] ni asigigi mingi, na fade désert asara ngia na tâ ngia na bia.”​—Esaïe 35:1, 2.

Mbeni fini sese. “Bâ, Mbi créé ayayu ti fini [fini ngorogbia ti yayu] na sese ti fini [fini bungbi ti azo ti mbilimbili], na fade azo adabe ala na kozo ye pëpe, na ala bi bê ti ala dä mbeni pëpe. Sara ngia, na i duti na ngia lakue na yâ ye so Mbi créé; . . . Fade azo [so aduti na yâ ti fini dunia so Nzapa amû zendo ni] asara da, na ala duti na yâ ni; fade ala lu vigne na yaka, na ala te lê ni. Fade azo asara da si mbeni zo aduti na yâ ni pëpe; fade ala lu ye si mbeni zo ate pëpe; fade lâ ti azo ti Mbi ayeke mingi tongana lâ ti keke; na azo ti Mbi so Mbi iri ala, fade ala wara ngia na kusala ti maboko ti ala teti lâ mingi. Fade ala sara kusala senge pëpe, na ala dü amolenge ti wara vundu pëpe; teti ala yeke ahale ti azo so L’Eternel airi tënë nzoni na ndo ala, na fade amolenge ti ala ayeke na ala nga. Na fade tënë asi tongaso, kozoni si azo airi Mbi, fade Mbi yeda; na tongana ala de ti sara tënë, fade Mbi mä ala.” “L’Eternel atene, Legeoko tongana ayayu ti fini na sese ti fini, so fade Mbi créé, angbâ lakue na gbele Mbi, fade ahale ti i na iri ti i angbâ tongaso nga.”​—Esaïe 65:17-25; 66:22.

A fa kozoni awe apendere ye so ayeke si kekereke

A yeke gi mbeti ti Esaïe oko pëpe si afa aye ti nzoni so ayeke si kekereke. Na yâ ti Bible, a yeke wara gbâ ti aprophétie so afa apendere ye so Nzapa ayeke sara ande na lege ti Royaume ti lo so Christ ayeke gbia ni.a Mo ye ti duti ande na yâ ti paradis so? Mo lingbi ti duti ande dä. Zia mo wani mo gi ti bâ aye so Bible afa na ndo ti anzoni ye so Nzapa aleke ti sara ande kekereke nga tongana nyen mo lingbi ti bâ nzoni dä. A-Témoin ti Jéhovah ayeke duti ande na ngia ti mû maboko na mo.

[Kete tënë na gbe ni]

[Foto na lembeti 8]

Siriri ayeke duti ande na popo ti azo nga na anyama

[Foto na lembeti 9]

Akuâ ayeke kiri ande na fini

[Foto na lembeti 10]

Sese kue ayeke ga ande mbeni paradis