YE TI MANDA 11
Wara ye ti nzoni mingi na lege ti dikongo Bible
A si na mo awe so mo ye ti komanse mbeni kota kua me mo bâ so a yeke ngangu mingi? Ti tene kua ni akpengba na mo mingi ape, mo peut ti sara ni kete kete. Dikongo Bible ayeke nga tongaso. Peut-être mo yeke hunda terê ti mo: “Mbi yeke komanse na ndo wa?” Na yâ ti ye ti manda so, e yeke bâ ambeni ye so akpengba ape so mo peut ti sara ti aidé mo ti diko Bible nga ti tene mandango ni anzere na mo.
1. Ngbanga ti nyen la e doit ti diko Bible lakue?
Zo so ayeke diko lakue Bible, wala “ndia ti Jéhovah,” ayeke duti na ngia nga aye so lo sara ayeke ga nzoni. (Diko Psaume 1:1-3.) Ti komanse ti diko Bible, gi ti diko ni teti akete penze-ngbonga lâ oko oko. Tongana mo hinga nzoni aye so ayeke na yâ ti Bible, a yeke nzere na mo mingi ti diko ni.
2. Nyen la ayeke aidé mo ti wara ye ti nzoni na lege ti dikongo Bible?
Ti wara ye ti nzoni mingi na lege ti dikongo Bible, a lingbi mo luti kete nga mo gbu li na ndö ti ye so mo diko. A lingbi mo diko Bible nga “mo gbu li ti mo dä.” (Josué 1:8, kete tënë na gbe ni.) Na ngoi so mo yeke diko Bible, hunda terê ti mo na ahunda so: ‘Ye so afa na mbi nyen na ndö ti Jéhovah Nzapa? Mbi lingbi ti sara ye alingbi na ni na yâ ti gigi ti mbi tongana nyen? Mbi lingbi ti sara kua na versê so tongana nyen ti mû maboko na ambeni zo?’
3. Tongana nyen la mo peut ti wara ngoi ti diko Bible?
A yeke ngangu na mo ti wara ngoi ti diko Bible? Ti mingi ti e a yeke tongaso. Gi ti ‘sara kusala nzoni na ngoi ti mo’. (aÉphésien 5:16). Mo peut ti sara ni tongana lâ oko oko mo zia mbeni mbilimbili ngoi ti diko Bible. Ambeni zo ayeke diko Bible hio na ndapre. Ambeni ayeke diko ni na midi, na ngoi ti wungo terê. Ti ambeni, ala yeke diko ni na lakui, kozo ti lango. Ti mo, nzoni ngoi ni ayeke so wa?
GI TI HINGA AYE MINGI
Gi ti sara si dikongo Bible anzere na mo mingi. Gi ti hinga tongana nyen ti leke aye ti manda ni nzoni, tongaso si mo wara ye ti nzoni mingi na lege ti mandango Bible ti mo.
Tongana ti so e lingbi ti manda ti ye akobe nde nde, e lingbi ti manda ti ye dikongo Bible
4. Gi ti sara si dikongo Bible anzere na mo
Peut-être a yeke ngangu ti komanse ti diko Bible. Ye oko, tongana ti so mbeni zo alingbi ti manda ti ye mbeni fini kobe, e lingbi ti manda ti ye dikongo ni. Diko 1 Pierre 2:2, na pekoni kiri tënë na hunda so:
Mo pensé nyen, tongana mo diko Bible lâ oko oko, a peut ti sara si mo ye ti diko ni nga mo ye ti diko ni encore mingi?
Zia VIDÉO ni ti bâ tongana nyen la ambeni zo akomanse ti ye dikongo Bible. Na pekoni kiri tënë na ahunda so:
Na yâ ti vidéo ni, akpale wa la amaseka ni ahon ndö ni?
Nyen la amû maboko na ala ti ngbâ ti diko Bible lakue?
Nyen la ala sara ti tene dikongo Bible anzere na ala mingi?
Awango so ayeke aidé mo ti komanse dikongo Bible:
Soro Bible so a kiri peko ni nzoni na atënë so azo ayeke tene ni laso. Na tapande, Mbeti ti Nzapa ti fini dunia.
Kozo ni, diko ambage so anzere na mo mingi. Ti hinga ambeni ye so mo peut ti sara, bâ encadré “Komanse ti diko Bible.”
Zia marque na terê ti achapitre ti Bible so mo diko awe. Sara kua na encadré “Bâ lege so dikongo Bible ti mo ayeke gue na li ni” so ayeke na yâ ti mbeti so.
Sara kua na application JW Library®. Na lege ni, mo peut ti diko Bible wala ti mä dikongo ni na ndo kue so mo yeke dä na lege ti téléphone wala mbeni appareil nde.
Sara kua na Ambeni tënë so ayeke na yâ ti Mbeti ti Nzapa ti fini dunia. Na yâ ni, mo yeke wara acarte, atableau nga na mbeni kete bakari so apeut ti sara si dikongo Bible anzere na mo mingi.
5. Leke terê ti mo ndali ti étude ti mo
Diko Psaume 119:34, na pekoni kiri tënë na hunda so:
Ngbanga ti nyen la a yeke nzoni mo sambela kozo ti diko Bible wala ti leke étude ti mo?
Tongana nyen la mo peut ti wara aye ti nzoni mingi lakue tongana a sara étude ti mo? Na ngoi so mo yeke leke mbeni ye ti manda so ayeke na yâ ti mbeti so, gi ti sara aye so:
Diko aparagraphe so ayeke na tongo nda ti ye ti manda ni.
Gi aversê na diko ni, nga gi ti bâ tongana nyen la a gue oko na ye so mo manda.
Sû kamba na gbe ti akota tënë so ayeke kiringo tënë ti ahunda oko oko kue; a yeke mû maboko na mo ti sara lisoro na ndö ti ye ti manda ni na zo so ayeke manda Bible na mo.
Mo hinga?
E aTémoin ti Jéhovah e sara kua na aBible nde nde. Me e ye mingi Mbeti ti Nzapa ti fini dunia ndali ti so a kiri na peko ni na lege ni, ayeke polele nga iri ti Nzapa ayeke na yâ ni.—Bâ article “Eskê aTémoin ti Jéhovah ayeke na Bible ti ala wani?” na ndö ti site.
AMBENI ZO ATENE: “Mandango Bible ayeke kua mingi. Mbi yeke na ngoi wala ngangu ti sara ni ape.”
Mo tene ti mo nyen?
NA NDURU TËNË
Ti wara aye ti nzoni mingi na lege ti Bible, leke kapa ti diko ni, sambela ti mä yâ ti ye so mo diko nga leke terê ti mo ndali ti étude ti mo.
Dango bê
Nyen la ayeke aidé mo ti wara ye ti nzoni mingi na lege ti Bible?
Na ngoi wa la mo lingbi ti diko Bible nga ti manda ni?
Ngbanga ti nyen la a yeke nzoni mo leke terê ti mo lakue ndali ti étude ti mo?
GI NDA TI YE
Bâ ambeni ye so apeut ti aidé mo ti wara aye ti nzoni mingi na ngoi so mo yeke diko Bible.
“Lege ti wara ye ti nzoni na lege ti dikongo Bible” (Tour ti Ba Ndo N° 1 2017)
Manda akode ota ti dikongo Bible.
“Bible apeut ti aidé mbi tongana nyen?—Kozo mbage ni: Diko Bible” (Article na ndö ti site)
Bâ tongana nyen la dikongo Bible alingbi ti nzere na mo.
Mä awango ti azo so adiko Bible a sara ngu mingi awe.