Mu Tapande ti Jéhovah Tongana Mo Yeke Fa Lege na Amolenge ti Mo
“Mbeni molenge ayeke so babâ ti lo awa lo pepe?”—AHÉBREU 12:7.
1, 2. Ngbanga ti nyen ababâ na mama ayeke na kpale ti bata amolenge ti ala laso?
MBENI gingo nda ti ye so a sala na Japon, a sala fadeso angu kete awe, afa so ndulu na ndambo ti akangba zo so a hunda tene na ala aba so lisoro ayeke dä mingi pepe na popo ti ababâ na mama na amolenge ti ala, na so ababâ na mama ayeke voro amolenge ti ala ahon ndo ni. Na yâ mbeni gingo nda ti ye nde so a sala ni gi na yâ ti kodoro ni so, ndulu na zo oko na popo ti azo osio so akiri tene na ahundango tene so a hunda ayeda so ala hinga pepe tongana nyen ti sala ye na amolenge. A yeke ba bibe so gi pepe na mbage ti Tö. Mbeni mbeti-sango (The Toronto Star) atene: “Mingi ti ababâ na mama ti Canada ayeda so ala hinga mbilimbili pepe tongana nyen ti duti anzoni babâ na mama.” Na ndo kue, ababâ na mama aba so a yeke ngangu mingi ti bata amolenge ti ala.
2 Ngbanga ti nyen ababâ na mama ayeke na kpale ti bata amolenge ti ala? Mbeni kota nda ti tene ni ayeke so e yeke na “lâ ti nda ni,” na “ngoi ti kpale na ti ngangu” asi. (2 Timothée 3:1, NW) Na ndo ni, Bible afa so “suma ti bibe ti bê ti zo ayeke sioni, a to nda ni tongana lo de pendere.” (Genèse 8:21) Nga, apendere mbilimbili ayeke ndulu ti tï na gbe ti angangu so Satan, tongana “bamara so atoto,” ayeke sala na ndo ala so ahinga ye mingi pepe. (1 Pierre 5:8) Aye ti kanga lege ayeke dä mingi teti ababâ na mama Chrétien so aleke na bê ti ala ti bata amolenge ti ala “na yâ wango-tene nga na fango lege ti bibe ti Jéhovah.” (aÉphésien 6:4, NW) Tongana nyen ababâ na mama alingbi ti mu maboko na amolenge ti ala ti maï ti ga awavorongo Jéhovah so ayeke biazo na so alingbi ti hinga popo ti “ye ti nzoni na ti sioni”?—aHébreu 5:14, NW.
3. Ngbanga ti nyen fango lege na wango ti ababâ na mama ayeke kota ye mingi teti batango amolenge ni nzoni?
3 Salomon, Gbia ti ndara, atene: “Ye ti buba akanga na ndo ti bê ti molenge-koli.” (aProverbe 13:1, NW; 22:15) Ti lungula mara ti ye ti buba so na yâ bê ti ala, a hunda na ababâ na mama ti se na lege ti ndoye amolenge ti ala. Ye oko, apendere ayeda lakue pepe na mara ti sengo ndo tongaso. Biani, fani mingi ala yeke sala ngonzo na wango so a mu na ala, atä zo so ayeke mu ni. Tongaso, a lingbi ababâ na mama ahinga ti “fa na molenge lege so a lingbi lo gue dä.” (aProverbe 22:6) Tongana amolenge abata mara ti wango tongaso nzoni, a lingbi ti mu fini na ala. (aProverbe 4:13) So tâ kota ye mingi ti tene ababâ na mama ahinga ye so fango lege na amolenge ahunda!
Wango-tene ti Fa Lege Aye ti Tene Nyen?
4. Kozo nda ti tene “wango-tene ti fa lege” so a sala na kusala na yâ Bible aye ti tene nyen?
4 Teti ala sala mbito ti tene a ba ala tongana azo so ayeke sala ngangu na ndo amolenge na lege ti mitele, ti tene ti yanga, wala ti bibe, ambeni babâ na mama akpe ti se amolenge ti ala. A hunda na e pepe ti duti na mara ti mbito tongaso. Tene “wango-tene ti fa lege,” tongana ti so a sala na kusala na yâ Bible, andu pepe mbeni lege ti salango sioni wala ti salango sana na zo. Tene ti Grec so a sû pekoni na “wango-tene ti fa lege” andu kozoni kue lege ti wa zo, ti fa ye na zo, ti se zo; na a ndu nga, ngoi na ngoi, sengo ndo ti ngangu me na lege ti ndoye.
5. Ngbanga ti nyen a yeke duti nzoni ti ba lege so Jéhovah ayeke sala na ye na mbage ti azo ti lo?
5 Na mungo mara ti wango-tene tongaso ti fa lege, Jéhovah Nzapa azia tapande ti mbilimbili-kue. Na hakango Jéhovah na mbeni babâ na sese, bazengele Paul asû na mbeti: “Mbeni molenge ayeke so babâ ti lo awa lo pepe? . . . Ababâ ti e awa e teti lâ oko oko na lege so a ba nzoni na lê ti ala, me Nzapa awa e ti sala nzoni na e, si e lingbi ga nzoni-kue tongana Lo.” (aHébreu 12:7-10) Biani, Jéhovah ayeke mu wango-tene ti fa lege na azo ti lo si na nda ni ala lingbi ga nzoni-kue, wala ala duti na sioni oko pepe. Kite ayeke pepe so e lingbi ti manda ye mingi na ndo mungo wango ti fa lege na amolenge na bango tongana nyen Jéhovah afa lege na azo ti lo.—Deutéronome 32:4; Matthieu 7:11; aEphésien 5:1.
Ndoye: Ngangu so Apusu Zo ti Sala Ye
6. Ngbanga ti nyen a lingbi ti duti ngangu teti ababâ na mama ti mu tapande ti ndoye so Jéhovah ayeke na ni?
6 Bazengele Jean atene: “Nzapa ayeke ndoye.” Tongaso, ye so apusu lakue Jéhovah ti fa lege ayeke ndoye. (1 Jean 4:8, NW; aProverbe 3:11, 12) So ti tene ababâ na mama so ayeke na ndoye teti amolenge ti ala ayeke ba so a yeke duti ande ngangu pepe ti mu tapande ti Jéhovah na lege so? A yeke lakue tongaso pepe. Ndoye ti Nzapa aluti na ndo akpengba-ndia. Nga, mbeni wagingo nda ti ye na yanga ti Grec afa so mara ti ndoye tongaso “ague lakue pepe legeoko na abibe so a dü zo na ni.” Nzapa azia pepe si bibe ti salango ndoye ahon ndo ni afa lege na lo. Lo yeke ba lakue ye so ayeke biani teti nzoni ti azo ti lo.—Esaïe 30:20; 48:17.
7, 8. (a) Tapande wa ti ndoye so aluti na ndo akpengba-ndia Jéhovah afa na gigi na yâ salango ye ti lo na mbage ti azo ti lo? (b) Tongana nyen ababâ na mama alingbi ti mu tapande ti Jéhovah na mungo maboko na amolenge ti ala ti maï kode ti bata akpengba-ndia ti Bible?
7 Bi bê na ndo ndoye so Jéhovah afa na gigi na yâ salango ye ti lo na mbage ti azo ti Israël. Moïse asala kusala na mbeni pendere hakango ndo ti fa peko ti ndoye ti Jéhovah teti fini mara ti Israël. E diko: “Tongana so ngualo azingo amolenge ti da ti lo, Lo yengi kpangbi ti Lo na ndo ala, Lo gbala kpangbi ti lo, lo kamata ala, Lo yö ala na ndo kpangbi ti lo, legeoko tongaso L’Eternel oko afa lege na Jacob.” (Deutéronome 32:9, 11, 12) Ti fa na amolenge ti lo ti hulu, mama ngualo “azingo amolenge ti da ti lo,” na hulungo ni nga na pengo yâ ti kpangbi ti lo ti wa amolenge ti lo ti londo na ti hulu. Na nda ni, tongana mbeni kete ndeke oko alondo na yâ da ni (so fani mingi a yeke na ndo mbeni hoto kâ na nduzu) ti hulu na mbage ti sese, mama ni ‘ayengi kpangbi ti lo na ndo’ molenge ni. Tongana a ba so kete ndeke ni ague ti pika li ti lo na sese, mama ni alï na gbe ti lo, na lo yö lo “na ndo kpangbi ti lo.” Na lege ti ndoye, Jéhovah abata mara ti Israël so aba gigi fini fini legeoko tongaso nga. Lo mu na azo ni Ndia ti Moïse. (Psaume 78:5-7) Na pekoni, Nzapa aba lege ti mara ni nzoni, na lo duti ndulu ti mu maboko na azo ti lo tongana ala yeke na yâ kpale.
8 Tongana nyen ababâ na mama Chrétien alingbi ti mu tapande ti ndoye ti Jéhovah? Kozoni kue, a lingbi ala fa na amolenge ti ala andia na akpengba-ndia so a wara na yâ Mbeti ti Nzapa. (Deutéronome 6:4-9) Ye so agi ayeke ti mu maboko na molenge ni ti mu adesizion so alingbi na akpengba-ndia ti Bible. Na salango tongaso, ababâ na mama ti ndoye ayeke yengi kpangbi ti ala na ndo amolenge, tongana a lingbi ti tene tongaso, na bango tongana nyen ala yeke sala kusala na akpengba-ndia so ala manda awe. Na ngoi so amolenge ni ayeke kono na ayeke wara liberté mingi ahon, ababâ na mama so andoye ala ayeke duti ndulu ti “li na gbe ti ala” na ti ‘yö ala na ndo kpangbi ti ala’ na ngoi kue so kpale ayeke dä. Mara ti kpale wa?
9. A lingbi ababâ na mama so ayeke na ndoye aduti ndulu ti bi bê na mbilimbili kpale wa? Mu mbeni tapande.
9 Jéhovah Nzapa agboto mê ti azo ti Israël na ndo akpale ti asioni kamarade. (Nombre 25:1-18; Esdras 10:10-14) Laso nga, salango kamarade na azo ti sioni ayeke mbeni kota kpale teti azo mingi. (1 aCorinthien 15:33) Ababâ na mama Chrétien asala nzoni ti mu tapande ti Jéhovah na lege so. Mbeni molenge ti wali ti ngu 15 so iri ti lo ayeke Lisa asala nzala ti mbeni molenge ti koli so akangbi pepe andia so andu ye ti yingo na ti salango ye ti sewa ti lo. Lisa atene: “Ababâ na mama ti mbi aba fade fade so mbeni ye agbian na yâ bango ndo ti mbi, na ala to nda ti gi bê ti ala. Na ambeni ngoi, ala mu na mbi wango ti sengo ndo; na ambeni ngoi nde, ala wa mbi na lege ti nzobe.” Ala duti na tele ti Lisa, na ala mä lo na be-nze-pepe; na lege so, ala mu maboko na lo ti hon ndo ti ye so ala ba tongana gunda ti kpale ni: nzala ti wara yengo dä ti akamarade ti lo.a
Sala si Lisoro Angbâ ti Tambela Lakue
10. Na yâ alege wa Jéhovah azia pendere tapande na ndo tene ti salango lisoro na azo ti Israël?
10 Ti fa lege na amolenge nzoni, a lingbi ababâ na mama asala ngangu ti tene lisoro angbâ ti tambela na popo ti ala na amolenge ti ala. Atä so lo hinga ye so a yeke na yâ bê ti e, Jéhovah awa e ti sala lisoro na lo. (1 Chronique 28:9) Na pekoni so lo mu Ndia na azo ti Israël, Jéhovah amu na aLévite kungba ti fa ye na ala, na lo to aprophète ti sala lisoro ti kiri ala na nzoni lege, na ti mu wango ti sengo ndo na ala. Lo fa nga so lo yeke ndulu ti mä asambela ti ala.—2 Chronique 17:7-9; Psaume 65:3 (65:2, NW); Esaïe 1:1-3, 18-20; Jérémie 25:4; aGalate 3:22-24.
11. (a) Tongana nyen ababâ na mama alingbi ti maï nzoni lisoro na amolenge ti ala? (b) Ngbanga ti nyen a yeke kota ye teti ababâ na mama ti duti azo so amä tene nzoni tongana ala yeke sala lisoro na amolenge ti ala?
11 Tongana nyen ababâ na mama alingbi ti mu tapande ti Jéhovah tongana ala yeke sala lisoro na amolenge ti ala? Kozo ye ni so ayeke kota mingi ayeke so a lingbi ala mu ngoi teti amolenge ti ala. Ababâ na mama ayeke sala nzoni ti ke atene ti buba so ayeke sala si zo awara kamela; a yeke atene tongana ti so: “Tene ni kue la? Mbi ba ti mbi fade so mo ye ti tene mbeni kota tene”; “So gi asenge tene la”; “Ka mo ye a sala tongana nyen? Mo yeke gi molenge.” (aProverbe 12:18) Ti wa amolenge ti zi bê ti ala, ababâ na mama ti ndara ayeke sala ngangu ti dengi mê nzoni na tene so a yeke tene na ala. Ababâ na mama so ake ti bi bê na amolenge na ngoi so ala de kete alingbi ti ba so amolenge ni ayeke ke ande ti bi bê na ala na ngoi so ala ga kota zo. Jéhovah aduti lakue ndulu ti mä azo ti lo. Lo zi mê ti lo lakue ti mä ala so na tâ be-ti-molenge ayeke ga ndulu na lo na lege ti sambela.—Psaume 91:15; Jérémie 29:12; Luc 11:9-13.
12. Alengo wa ti ababâ na mama alingbi ti sala si a duti ngangu pepe teti amolenge ti ga ndulu na ala?
12 Ba nga tongana nyen ambeni lengo na yâ asalango ye ti Nzapa asala si a duti ngangu mingi pepe teti azo ti lo ti ga ndulu na lo na mbito pepe. Na tapande, Gbia David ti Israël ti giriri asala kota siokpari na salango lango sioni na Bath-Shéba. Teti so lo yeke mbilimbili-kue pepe, David asala nga ambeni kota siokpari nde na yâ fini ti lo. Ye oko, lo zia lâ oko pepe ti ga ndulu na Jéhovah na ti gi pardon nga na wango ti lo so a zingo na zo. Kite ayeke pepe so nzobe ti Nzapa na be-nzoni ti lo asala si a duti ngangu pepe teti David ti kiri na Jéhovah. (Psaume 103:8) Na fango na gigi mara ti alengo so alondo na Nzapa tongana be-ti-ndoye na be-nzoni, ababâ na mama alingbi ti mu maboko si lisoro angbâ lakue ti tambela nzoni même na ngoi so amolenge ni aglisa lege.—Psaume 103:13; Malachie 3:17.
Sala Ye na Lege Ni
13. Ti sala ye na lege ni andu nyen?
13 Tongana ala yeke mä amolenge ti ala, a lingbi ababâ na mama asala ye na lege ni, na afa na gigi “ndara so alondo na nduzu.” (Jacques 3:17, NW) Bazengele Paul atene: “Zia azo kue ahinga salango ye ti i na lege ni.” (aPhilippien 4:5, NW) Ti sala ye na lege ni aye ti tene nyen? Oko nda ti tene ti Grec so a sû pekoni na ‘salango ye na lege ni’ aye ti tene “ti luti ngangu pepe gi na ndo tene ti ndia ni so a sû na mbeti.” Na ngoi so ala yeke bata angangu ndia so andu tambela nga na aye ti yingo, tongana nyen ababâ na mama alingbi ti sala ye na lege ni?
14. Tongana nyen Jéhovah afa so lo sala ye na lege ni na mbage ti Lot?
14 Na ndo tene ti salango ye na lege ni, Jéhovah azia mbeni tapande so agboto lê. (Psaume 10:17) Tongana lo wa Lot na azo ti da ti lo ti zia gbata ti Sodome so a fâ ngbanga ti futingo na ndo ni, Lot ‘angbâ ti ku.’ Na pekoni, tongana ange ti Jéhovah ahunda na lo ti kpe ti gue na yâ ndo ti ahoto, Lot atene: “Mbi lingbi kpe ti gue na tele ti hoto so pepe . . . Mo ba fadeso kodoro [ti Tsoar] so ayeke ndulu si mbi lingbi kpe dä, na a yeke kete kodoro. O zia mbi kpe kâ (so ayeke kete kodoro pepe?).” Tongana nyen Jéhovah akiri tene? Lo tene: “Mo ba, mbi yeda na ye so nga, na fade mbi kinda kodoro so pepe, so mo sala tene ni.” (Genèse 19:16-21, 30) Jéhovah ayeke la ni ndulu ti yeda na hundango tene ti Lot. Biani, ababâ na mama ayeke na bezoin ti bata andia so Jéhovah Nzapa azia na yâ Tene ti lo, Bible. Ye oko, lege alingbi ti duti dä ti bi bê na aye so agbu bê ti apendere, tongana aye so ague nde pepe na akpengba-ndia ti Bible.
15, 16. Ye nyen ababâ na mama alingbi ti manda na ndo tapande so a wara na Esaïe 28:24, 25?
15 Ti sala ye na lege ni andu nga lekengo bê ti amolenge ni, si ala duti ndulu ti yeda na wango. Na yâ mbeni tapande, Isaïe ahaka Jéhovah na mbeni wadengo yaka, na lo tene: “Zo so adë yaka ti lu ye, lo ngbâ ti dë yaka ni lakue? Lo dë yâ ti sese na lo leke lakue? Tongana lo leke sese nzoni, lo ki anet na ndo ni pepe? na lo ki cumin dä pepe? na lo lu blé na lege ni, lo lu orge na ndo so a leke teti orge, na lo lu épeautre na yanga ti yaka ni pepe?”—Esaïe 28:24, 25.
16 Jéhovah “adë yaka ti lu ye” na lo “dë yâ ti sese na lo leke lakue.” Na lege so, lo leke bê ti azo ti lo kozoni si lo mu na ala wango-tene ti fa lege. Na mungo wango ti sengo-ndo na amolenge ti ala, tongana nyen ababâ na mama alingbi ti “dë” yâ ti bê ti amolenge ti ala? Mbeni babâ amu tapande ti Jéhovah na ngoi so lo mu wango ti sengo-ndo na molenge ti lo ti koli ti ngu osio. Tongana molenge ti lo ti koli apika mbeni molenge ti koli so ayeke voizin, babâ ni na be-nze-pepe amä kozoni kue molenge ti lo ti koli ni so na fango anda ti tene so apusu lo ti sala ye tongaso. Na pekoni, tongana ti “dë” yâ ti bê ti molenge ni, babâ ni atene na lo mbeni mbaï ti ye so asi na mbeni kete molenge ti koli so aba pasi ngangu na maboko ti mbeni wasalango ye na ngangu. Na mango ye so, bê ti molenge ti koli ni apusu lo ti tene so alingbi a se wasalango ngangu so. Mara ti ‘dengo ye’ tongaso aleke bê ti molenge ti koli ni, na a sala si a duti ngangu pepe na lo ti ba so pikango molenge koli ti voizin so ayeke mbeni salango ye na ngangu, na a yeke sioni.—2 Samuel 12:1-14.
17. Ye ti manda wa so a ndu wango ti sengo-ndo ti ababâ na mama a mu ni na Esaïe 28:26-29?
17 Isaïe akiri ahaka wango ti sengo-ndo ti Jéhovah na mbeni mbage nde ti kusala ti fango yaka: pikango le-kobe. Mbeni wadengo yaka ayeke sala kusala na agbakuru nde nde ti pikango le-kobe, alingbi na kpengbango ti kako ti le-kobe ni. A yeke sala kusala na keke ti pika na anet so akpengba pepe, na a yeke sala kusala na mbeni keke so ayeke ngangu ahon ti pika na cumin; me ti pika ale-kobe so kako ni akpengba, a yeke sala kusala na mbeni chariot ti pikango le-kobe wala mbeni roue ti charrette. Ye oko, fade lo yeke pika pepe le-kobe ni juska ti neka yâ ni kue. Legeoko nga, tongana Jéhovah aye ti lungula na yâ azo ti lo mbeni ye so anzere pepe, lo yeke sala kusala na alege nde nde ti sengo ndo alingbi na abezoin ni nga na aye so asi. Lâ oko lo sala ye kirikiri pepe wala ahon ndo ni pepe. (Esaïe 28:26-29) Ti ambeni molenge, gi senge bango ndo ti ababâ na mama ti ala alingbi awe ti kiri na ala na ndo nzoni lege, na a yeke na bezoin pepe ti sala mbeni ye nde. Ti ambeni nde, a hunda ti mu adango bê fani mingi, na ti ambeni nde nga, a hunda ti ndu bê ti ala na mbeni lege so ayeke ngangu mingi ahon. Ababâ na mama so ayeke sala ye na lege ni ayeke mu ande wango ti sengo-ndo na amolenge ti ala alingbi na abezoin ti ala oko oko.
Sala si Alisoro na Sewa Amu Ngia
18. Tongana nyen ababâ na mama alingbi ti vo ngoi teti mandango Bible na sewa lakue lakue?
18 Na popo ti apendere lege ti fa ye na amolenge, a yeke wara mandango Bible na sewa lakue, nga lisoro na ndo Mbeti ti Nzapa lâ na lâ. Mandango ye na sewa ayeke ga na ye ti nzoni mingi ahon tongana a sala ni lakue. Tongana a sala ni gi tongana ngoi ayeke dä, wala na peko ti mbeni desizion so a mu gi ndali ti nzerengo tele ti ngoi ni, a yeke duti ngangu ti sala ni lakue. Tongaso, a lingbi ababâ na mama ‘avo ngoi’ teti mandango ye. (aÉphésien 5:15-17, NW) Ti wara mbeni mbilimbili ngoi so alingbi na programme ti azo ni kue alingbi ti duti ye ti ngangu. Mbeni mokonzi ti sewa aba so tongana amolenge ti lo ayeke kono, aprogramme ti ala so ayeke nde nde asala si a duti ngangu mingi ti bungbi sewa ni kue legeoko. Ye oko, sewa ni ayeke bungbi lakue legeoko na abï ti abungbi ti kongregation. Tongaso, babâ ni aleke ti sala mandango Bible na sewa na yâ mbeni oko ti abï ni so. Ye so atambela nzoni. Amolenge ni ota kue awara fadeso batême awe tongana awakua ti Jéhovah.
19. Tongana nyen ababâ na mama alingbi ti mu tapande ti Jéhovah tongana ala yeke manda ye na sewa?
19 Ye oko, gi ti manda tongaso na loro ambeni buku so andu Mbeti ti Nzapa na ngoi ti mandango ye, alingbi pepe. Jéhovah afa ye giriri na azo ti Israël, so akiri na kodoro ti ala, na lege ti aprêtre so ‘azi nda ti Ndia ni, na afa nda ni’ na “ala ngbâ ti sala si azo agbu nda ti dikongo ni.” (Néhémia 8:8, NW) Mbeni babâ so amu maboko nzoni na amolenge ti lo mbasambala kue ti ndoye Jéhovah ayeke gboto tele ti lo lakue na yâ kubu ti lo kozoni na mandango ye ti sewa, na lo yeke leke ye ni alingbi na abezoin ti amolenge ni oko oko. Lo sala si mandango ye ni aduti ye so amu ngia na amolenge ti lo. Mbeni oko ti amolenge ti lo so akono awe atene: “Mandango ye ni amu ngia na bê ti zo lakue. Tongana e yeke na gigi, na e yeke sala ngia na ballon na tele ti da, na ngoi so a hiri e teti mandango ye ti sewa, fade fade e bi ballon ti e ni, na e mu loro ti gue teti mandango ye ni. A yeke la ni oko ti abï so a mu ngia na e mingi ahon na yâ yenga ni.”
20. Kpale wa so alingbi ti si na ndo batango amolenge a lingbi a ba tene na ndo ni?
20 Wasungo psaume atene: “Biani, amolenge ayeke ye ti héritier so L’Eternel [“Jéhovah,” NW] amu na zo. Amolenge so mo dü ala ayeke futa so Lo mu na mo.” (Psaume 127:3) Ti fa lege na amolenge ti e ahunda ngoi nga na ngangu, me salango tongaso nzoni alingbi ti ga na fini ti lakue lakue na amolenge ti e. So ayeke duti ande tâ pendere futa! Tongaso, zia e duti ndulu ti mu tapande ti Jéhovah tongana e yeke fa lege na amolenge ti e. Ye oko, atä a mu na ababâ na mama kungba ti “bata [amolenge] nzoni na yâ wango-tene nga na fango lege ti bibe ti Jéhovah,” a tene pepe so ala yeke wara ande gi anzoni lengo na pekoni. (aÉphésien 6:4, NW) Atä a bata lo na anzoni kode kue ti dunia, mbeni molenge alingbi ti ke yanga na ti zia ti sala na Jéhovah. Ye nyen a lingbi a sala tongana ye tongaso asi? Fade article ti peko ayeke sala tene dä.
[Kete Tene na Gbe Ni]
a Atapande so a wara na yâ ti article so, nga na ti article so ayeke ga na pekoni alondo peut-être na akodoro so ngobo ti salango ye ti azo ni ayeke nde na ti kodoro ti mo. Tara ti ba akpengba-ndia so ayeke na gbe ni, na sala kusala na ni alingbi na ngobo ti salango ye ti ndo so mo yeke dä.
Mo Yeke Kiri Tene Tongana Nyen?
• Tongana nyen ababâ na mama alingbi ti mu tapande ti ndoye ti Jéhovah so a fa na Deutéronome 32:11, 12?
• Ye nyen mo manda na ndo lege so Jéhovah ayeke sala lisoro giriri na azo ti Israël?
• Ye nyen e manda na ndo lege so Jéhovah amä na hundango ye ti Lot?
• Ye nyen mo manda na Esaïe 28:24-29 na ndo lege ti se amolenge?
[Foto na lembeti 8, 9]
Moïse ahaka fango lege so Jéhovah amu na azo ti lo na asalango ye ti mbeni ngualo na mbage ti amolenge ti lo
[Afoto na lembeti 10]
A hunda na ababâ na mama ti mu ngoi teti amolenge ti ala
[Foto na lembeti 12]
“A yeke la ni oko ti abï so a mu ngia na e mingi ahon na yâ yenga ni”