“I Ga Na Mbi, . . . na Fade Mbi Mû na I Lege ti Hu Tele”

Abungbi So Apusu Zo na Ndoye nga na Anzo Kusala

TI LONDO na Toronto ti si na Tokyo, ti londo na Moscou ti si na Montevideo, fani mingi na yâ yenga oko oko, aTémoin ti Jéhovah kutu mingi nga na andeko ti ala ayeke gue na ando ti vorongo ti ala. Na popo ti azo so, a wara ababâ ti sewa so asala kua ngangu, so anze na peko ti mbeni lango so ayo na ndo ti kusala ti ala; awali na amama so asala kua ngangu na so akete molenge ti ala ague legeoko na ala; angangu maseka so amû lango ni kue ti manda ye na da-mbeti; ambakoro so awoko kue, so a lingbi ala tambela yeke yeke ndali ti asongo ti tele ti ala; awomua nga na anyindu so ayeke na kpengba-be; nga na azo so bê ti ala asui so a lingbi a dë bê ti ala.

A-Témoin ti Jéhovah so ayeke mû mara ti akutukutu nde nde: ti londo na a-train so akpe loro mingi ti si na alele; ti londo na a-métro so azo apete tele na yâ ni ti si na acamion. A lingbi ambeni afâ angu so asi singo na angunde, na ngoi so a lingbi ambeni ahon ndo ti gbâ ti akutukutu so atambela na yâ akota gbata so amû ngonzo na bê. Ngbanga ti nyen azo so kue ayeke sala ngangu mingi tongaso?

Kozoni kue ngbanga ti so guengo na abungbi ti aChrétien nga mungo mbage na ni ayeke mbeni kota lege ti voro Jéhovah Nzapa. (aHébreu 13:15) Bazengele Paul abi bê na ndo mbeni nda ti tënë nde tongana lo sû na mbeti: “Zia e bi bê na ndo mba na popo ti e ti wa tele ti duti na ndoye nga na anzo kusala, na ziango pëpe ti bungbi tele ti e, . . . me na wango tele na popo ti e, na i sala tongaso mingi ahon teti i bâ lango ni aga ndulu.” (aHébreu 10:24, 25, NW) Na yâ aversê so Paul afa na gigi bibe ti wasungo psaume David, so ahe bia: “Mbi yeke na ngia tongana ala tene na mbi, Zia e gue na da ti L’Eternel [“Jéhovah,” NW].”​—Psaume 122:1.

Ngbanga ti nyen aChrétien ayeke na ngia ti gue na abungbi ti ala? Ngbanga ti so azo so ague ayeke bâ ndo gi senge pëpe. Nde na so, abungbi amû lege na ala ti hinga tele nzoni. Abungbingo tele so amû mbilimbili lege ti mû ye, pëpe gi ti wara ye, na ti pusu mba ti fa ndoye na ti sala anzo kusala. Ye so amû maboko ti sala si abungbi aga angoi ti kpengba tele na popo ti mba. Nga, abungbi ti aChrétien ayeke mbeni oko ti alege so na yâ ni Jésus asala si zendo ti lo aga tâ tënë: “I ga na mbi, . . . na fade mbi mû na i lege ti hu tele.”​—Matthieu 11:28, NW.

Mbeni Pendere Ndo ti Lungula Vundu na ti Bi Bê

A-Témoin ti Jéhovah ayeke na anzoni nda ti tënë ti bâ abungbi ti ala tongana mbeni ye ti kiri ti wara ngangu. Kozoni kue, na abungbi ni “ngbâa ti be-ta-zo na ti ndara” ayeke mû kobe ti yingo so asi na tâ ngoi ni. (Matthieu 24:45, NW) Abungbi ayeke nga na kota kusala ti sala si awakua ti Jéhovah aga awafango Tënë ti Nzapa so ayeke na kode nga na wâ. Na ndo ni, na Da ti Royaume, zo alingbi ti wara mbeni bungbi ti andeko so afa na gigi ndoye na bingo bê, so ayeda ti duti ndulu ti mû maboko na ti dë bê ti azo na angoi ti vundu.​—2 aCorinthien 7:5-7.

Bâ ye so asi na Phillis, mbeni womua so aglisa koli ti lo tongana amolenge ti lo ayeke na ngu oku nga na miombe. Na fango ye so abungbi ti aChrétien asala ti kiri ti mû ngangu na lo nga na amolenge ti lo, lo tene: “Guengo na Da ti Royaume adë bê ti e lani teti so afon e wamabe afa lakue ndoye nga na bingo bê na gbungo e na yâ maboko ti ala, na mungo na e mbeni bibe ti Mbeti ti Nzapa, wala na gbungo maboko ti e na ngangu kete ti fa ndoye ti ala na mbage ti e. A duti mbeni ndo so mbi ye lani ti duti dä lakue.”​—1 aThessalonicien 5:14.

Na peko ti so Marie asigigi na yâ mbeni kota opération, wanganga ti lo atene so a yeke mû ayenga omene wala ahon so ti tene lo wara nzoni seni. Na ngoi ti akozo yenga ti hungo tele ti lo, Marie alingbi pëpe ti gue na abungbi. Wanganga ti lo abâ so lo yeke na ngia tongana ti kozo pëpe. Tongana lo bâ so ita-wali ni ayeke gue pëpe na abungbi, lo wa lo ti gue. Marie atene so koli ti lo, so ayeke pëpe na yâ lege ti vorongo ti lo, ayeke yeda pëpe ti zia lo ti gue na abungbi ndali ti seni ti lo. Tongaso, wanganga ni asû mbeni mbeti so “ahunda na ngangu” na Marie ti gue na Da ti Royaume ti wara songo so amû ngangu na akpengba zo. Marie ahunzi tënë ti lo tongaso: “Na peko ti so mbi gue gi na mbeni bungbi oko, tele ti mbi aga nzoni mingi ahon. Mbi to nda ti te ye, ti lango na bï kue, a lingbi mbi nyon yorö lakue pëpe ti kaï na asongo ti tele ti mbi, na yanga ti mbi akiri ayeke na ngia!”​—aProverbe 16:24.

Ndoye so ayeke na yâ abungbi ti aChrétien ahon senge tongaso pëpe na lê ti azo ti gigi. Mbeni wamandango mbeti na kota da-mbeti asoro ti manda ye na ndo aTémoin ti Jéhovah ti sû mbeni mbeti ndali ti ye so lo manda so ayeke senda-mara zo. Na ndo dutingo ti aye na yâ abungbi ni, lo sû atënë so na yâ mbeti ti lo: “Yambango mbi na ngia nga na wâ . . . apika bê ti mbi mingi. . . . Nzobe ti aTémoin ti Jéhovah ayeke mbeni lengo so ayeke polele mingi nga lengo so mbi bâ tongana kota mbage ti ye so atambela na yâ bungbi ni.”​—1 aCorinthien 14:25.

Na yâ sese so wusuwusu ayeke dä mingi, kongregation ti aChrétien ayeke ndo ti batango tele na lege ti yingo. A yeke mbeni pendere ndo ti siriri na ti ndoye. Na guengo na abungbi, mo lingbi ti bâ na lê ti mo mveni tâ tënë ti atënë ti wasungo psaume so: “Bâ! Tongana nyen a yeke nzoni nga a nzere teti aita ti duti ndo oko na yâ beoko!”​—Psaume 133:1, NW.

[Encadré/Foto na lembeti 25]

A KAÏ MBENI NZALA SO AYEKE NDE

Tongana nyen ala so alingbi ti mä ndo pëpe awara nzoni na lege ti abungbi ti aChrétien? Na ndo sese kue, aTémoin ti Jéhovah ayeke sigigi na akongregation so atene yanga ti awambongi. Na yâ angu 13 so ahon, a leke akongregation 27 nga na agroupe 43 so atene yanga ti awambongi na États-Unis. Na yâ akodoro 40 na ndo ni, a wara fadeso akongregation 140 so atene yanga ti awambongi. A leke ambeti teti aChrétien na ndo kasete-vidéo na ayanga ti awambongi 13.

Akongregation ti aChrétien amû lege na awambongi ti sepela Jéhovah. Odile, mbeni ngbele Catholique na France, so na ambeni ngoi bê ti lo asui mingi na lo bi bê ti fâ tele ti lo, akiri singila mingi teti fango ye ti Bible so lo wara na abungbi ti aChrétien. Lo tene: “Mbi kiri mbi wara nzoni seni nga na tâ ngia ti duti na fini. Me ahon ye kue, mbi wara tâ tënë. Fadeso mbi hinga ye so mbi yeke gi ti sala na fini ti mbi.”