Mo Dabe Mo na Ni?

Dikongo a-article ti Tour ti Ba Ndo so asigigi ade ti ninga pëpe anzere na mo mingi? Tongaso, bâ wala mo lingbi ti kiri tënë na ahundango tënë so ge:

• Kapa wa mo lingbi ti leke, so andu Fango Ye ti Jésus na ndo Hoto, ti lungula asuingo bê?

Mo lingbi ti diko lâ oko oko mbeni oko ti akozo ye so Jésus afa na yâ fango ye so wala na ambeni ndo nde na yâ a-Évangile. Tongana mo gbu li ti mo na ndo fango ye so na mo gi ti sala ye alingbi na ni, ngia ti mo ayeke kono na asuingo bê ti mo ayeke kiri na peko.​—15/12, alembeti 12-14.

• Atënë ota wa afa so a yeke nzoni a-ancien afa na aserviteur ti mungo maboko ti yô ambeni kungba na ndo ti so ala yô awe?

Teti so wungo ti aTémoin ti Jéhovah ayeke gue na li ni, a yeke na bezoin ti ambeni ita-koli so a lingbi ti zia bê kue na ala ti mû maboko na afini zo so awara batême ti maï. Gango mbakoro wala akpale ti seni azia katikati fadeso na ye so ambeni zo so asala kusala ti a-ancien aninga awe alingbi ti sala. Ambeni ancien so alingbi kue ayeke yô ambeni kungba nde na ti so andu kongregation ti ala. Tongaso ala lingbi mbeni pëpe ti sala ye mingi na yâ kongregation ti ala mveni.​—1/1, alembeti 29.

• Na lege wa azo azia bê na anzapa so ayeke na fini pëpe?

Azo mingi ayeke voro anzapa ti alege ti vorongo ti ala. Ye oko, legeoko tongana Baal na lâ ti Élisée, anzapa so ayeke na fini pëpe alingbi ti sö zo oko pëpe. (1 aGbia 18:26, 29; Psaume 135:15-17) Ambeni ayeke voro akota zo ti mozoko wala akota wanguru, so alingbi pëpe ti mû na ala tâ beku teti kekereke. Nde na ala, Jéhovah ayeke biani na fini na lo yeke sala si aye so lo leke na bê ti lo aga tâ ye.​—15/1, alembeti 3-5.

• E lingbi ti manda nyen na lege ti ye so Caïn asala tongana Nzapa agboto mê ti lo?

Nzapa amû na e ngangu ti soro ye so bê ti e aye. Nde na Caïn so asoro ti sala sioni, e lingbi ti soro ti sala ye so ayeke mbilimbili. Tondo ti Bible afa nga so Jéhovah ayeke fâ ngbanga na ndo ala so aye ti gbian bê ti ala pëpe.​—15/1, alembeti 22-23.

• Dutingo na saleté pëpe ayeke mbilimbili kota ye laso ngbanga ti nyen?

Teti so dutingo ti azo ayeke gbian lakue, azo mingi amû ngoi kete ahon ti kozo ti sukula yâ ti da ti ala. Gingo pëpe ti duti na kobe nga na ngu so ayeke na saleté pëpe alingbi ti ga na akpale ti seni. Na ndo ti so a lingbi zo aduti na saleté pëpe na lege ti mitele, Bible agboto lê na ndo nene ni ti duti na saleté pëpe na lege ti yingo, ti salango ye, na ti bibe.​—1/2, alembeti 3-6.

• Paul atene so ala so ayeke atémoin kozo na ngoi ti aChrétien ayeke “ga mbilimbili-kue pëpe nde na e.” Tongana nyen? (aHébreu 11:40, NW)

Na ngoi ti Komandema ti Ngu Saki Oko, fade Christ na aita ti lo so a sa yingo na ndo ti ala na yayu ayeke sala kusala tongana agbia na aprêtre. Fade ala yeke sala si azo so a zingo ala na kuâ awara aye ti nzoni na lege ti kota ngele so Jésus afuta. Fade abe-ta-zo so, tongana ala so a sala tënë ti ala na yâ chapitre 11 ti aHébreu, ayeke “ga mbilimbili-kue.”​—1/2, lembeti 23.

• Paul aye ti tene nyen tongana lo tene na aHébreu: “I de i ke juska na mênë pëpe”? (aHébreu 12:4)

Lo ye ti tene ti ke juska na kuâ. Na yâ mbaï e yeke wara atapande ti azo so angbâ be-ta-zo juska na kui. Atâa so aHébreu so Paul asû mbeti ni na ala awara mara ti atara tongaso pëpe, a lingbi ala ga abiazo na ala kpengba mabe ti ala ti luti na gbele aye kue so alingbi ti si.​— 15/2, lembeti 29.

• Ngbanga ti nyen a yeke na lege ni pëpe ti tene so be-nzoni ti Jéhovah awoko mbilimbili ti lo?

Na ambeni yanga ti kodoro, “ti woko” aye même ti tene ti kanga lege. Jéhovah ayeke Nzapa ti mbilimbili nga ti be-nzoni. Tongana lo fa na gigi alengo so, ala use kue asala kusala nzoni. (Exode 34:6, 7; Deutéronome 32:4; Psaume 116:5; 145:9) A hunda pëpe ti tene be-nzoni awoko mbilimbili ti Jéhovah.​—1/3, lembeti 30.

• A yeke na lege ni ti tene Chrétien ahunda si a leke kuâ ti mbeni zo ti lo si a fun pëpe?

Lekengo kuâ si a fun pëpe ayeke mbeni kode ti bata na mbeni kuâ. Ambeni zo ti giriri asala ni gi ndali ti atënë ti vorongo. A yeke tongaso pëpe teti atâ wavorongo Nzapa. (Zo-ti-fa-tene 9:5; Kusala 24:15) Nda ti lekengo kuâ si a fun pëpe ayeke gi ti kanga lege na kuâ ni ti buba, wala ti kiri na pupu-sese, ye so na nda ni a lingbi ti kpe ni pëpe. (Genèse 3:19) Me zia e gi bê ti e pëpe tongana ndia ahunda ti tene a leke kuâ si a fun pëpe, tongana ambeni zo ti sewa ni aye si a duti tongaso, wala ngbanga ti so ambeni zo ayeke londo na yongoro ndo ti lu kuâ ni.​—15/3, alembeti 29-31.

• Atapande wa ti Bible afa na e so Nzapa ayamba azo ti amara kue?

Jéhovah ato prophète Jonas ti gboto mê ti azo ti Ninive, na Nzapa awa lo ti yeda na gbiango bê ti ala. Na lege ti tënë ti yanga nga na ti tapande, Jésus awa azo ti ndoye azo ti Samarie. Bazengele Pierre nga na bazengele Paul ala use kue ayeke na kungba ti fa nzo tënë na azo so ayeke aJuif pëpe. Na lege ti atapande so, e lingbi ti bâ nene ni ti mû maboko na azo ti amara kue.​—1/4, alembeti 21-24.