Pendere gbakuru ti kiringo na peko ti ambeti
JÉHOVAH NZAPA, so lo yeke Mveni ti Bible, aye si a fa nzo tënë ti Royaume ti lo “na amara kue, akete mara kue, azo ti yanga nde nde kue, na azo nde nde kue”. (Apocalypse 14:6). Lo ye si a duti ngangu pëpe na azo kue ti wara Tënë ti lo so a sû na mbeti. A yeke ngbanga ni la si a kiri peko ti Bible na ayanga ti kodoro mingi ahon tanga ti abuku kue na ndo sese. Azo saki mingi so ayeke kiri peko ti ambeti amû gbâ ti ngoi nga ala sala ngangu mingi ti kiri peko ti abibe ti Nzapa na yâ ti ambeni yanga ti kodoro nde.
Ye oko, Bible ayeke gi pëpe mbeni mbeti so a hunda ti kiri pekoni na mbeni yanga ti kodoro nde. Fani mingi, a yeke sala kusala na Bible ni tongana mbeni pendere gbakuru ti kiringo na peko ti ambeni tënë nde. Ti wara lege ti kiri peko ti ambeni tënë na lege ni, mingi ti azo so ayeke kiri peko ti ambeti ayeke haka lege so a kiri na peko ti atënë ti yâ ti Bible na ayanga ti kodoro nde nde. Fadeso, a yeke sala nga kusala nzoni mingi na Bible tongana mbeni gbakuru ti kiringo na peko ti atënë na lege ti ordinateur.
A yeke ngangu biani na mbeni ordinateur ti kiri na peko ti atënë na lege ni. Ambeni kota wakode abâ ti ala so kiringo na peko ti ambeti ayeke mbeni ye so ahon ngangu ti mbeni ordinateur. Ngbanga ti nyen? Salango tënë ayeke gi pëpe mungo gbâ ti atënë ti tingbi na tele ti mba. Yanga ti kodoro oko oko ayeke na ambeni ye so ayeke gi ti lo mveni: a yeke aye tongana kode ti ziango atënë ni na peko ti tele, andia ti salango tënë ni, ambeni ye so andia ni andu ni pëpe, lege so azo ni ayeke sala tënë nga na atënë so a honde mbeni ye na yâ ni. Ngangu so a sala ti yôro aye so kue na yâ ti mbeni ordinateur atambela nzoni pëpe. A bâ so a yeke ngangu mingi ti gbu nda ti mingi ti ambeti so mbeni ordinateur si akiri pekoni.
Ye oko, ti fadeso, azo so ahinga ye mingi na ndo ti ordinateur ayeke manda afini kode ti kiringo na peko ti atënë na lege ti ordinateur. Franz Josef Och, so lo yeke bâ ndo na ndo kiringo na peko ti ambeti na lege ti ordinateur, atene: “Kode ti e ayeke so: ordinateur ni ayeke sala mbeni molongo ti gbâ ti atënë, na pekoni lo soro gi ambilimbili tënë so alingbi na tënë so lo ye ti kiri na pekoni.” Zia e mû gi mbeni tapande: bâ so mo ye ti mû Français ti kiri pekoni na Sango. Kozoni, mû ambeni tënë so ayeke dä na yanga ti akodoro use so. Na pekoni yôro ni na yâ ti ordinateur. Ordinateur ni ayeke haka atënë ti Français na ti Sango ni. Na tapande, tongana ordinateur ni awara na Sango tënë “da” fani mingi, nga tongana lo wara mara ti oko tënë so na Français, ordinateur ni ayeke tene na nda ni so tënë na yanga ti Sango “da” alingbi na ti Français ni. Na peut-être atënë so ayeke ndulu na ni aye ti fa so da ni ayeke “kota” wala “kete”, “ngbele ni” wala “fini ni”. Tongaso, ordinateur ni ayeke leke molongo ti atënë so nda ni ayeke gi oko. Na peko ti lekengo molongo ti atënë ni (so alingbi ti mû ambeni lango wala ayenga kete tongaso), ordinateur ni alingbi ti sala kusala na atënë so a yôro na yâ ni na ndo ambeni fini tënë so lo wara ti kiri na pekoni. Atâa so lege so lo kiri na peko ti atënë ni alingbi ti gue oko pëpe na ndia ti yanga ti kodoro ni, mingi ni zo ayeke gbu kamême nda ti atënë ni nga na asango so alingbi.
Tongana atënë so a yôro kozoni na yâ ordinateur ni ayeke gbâ ni nga ayeke nzoni mingi, aye so ayeke sala ngangu mingi na ndo pendere ti kiringo na peko ti ambeti ni. Na a yeke ge si Bible ayeke mbeni gbakuru so alingbi ti mû maboko mingi. A kiri na pekoni nzoni na ayanga ti akodoro mingi, a yeke ngangu pëpe ti wara ni nga a yeke wara atënë mingi na yâ ni. Ni la Bible ayeke kozo ye so azo ti gingo nda ti aye asoro ni ti yôro na mbeni fini yanga ti kodoro na yâ ti mbeni ordinateur.