E duti na nzoni bango ndo na ndo salango kusala na a-ordinateur
1 Bazengele Paul awa aChrétien ti kozo siècle ti zia si mbeni ye agboto lê ti ala pëpe, ngbanga ti so “lâ ade mingi pëpe.” (1 aCor. 7:29). Teti so hunzingo ti aye ti fadeso aga ndulu, so tâ kota ye ti tene e ‘gi kozoni Royaume ti Nzapa na mbilimbili ti Lo’ na e ‘zia l’heure ti e ahon senge pëpe’! Ngoi ayeke biani ye ti ngele mingi.—Mat. 6:33; aEph. 5:15, 16.
2 Azo agonda kode ti amasini tongana mbeni ye so ayeke mû maboko ti vo ngoi mingi. Na tapande, gi na petengo mbeni bouton ti ordinateur, mbeni zo alingbi fade fade ti wara gbâ ti asango. Mingi ni, a-ordinateur alingbi ti mû gi anzene-ngbonga ti sala mbeni kusala so alingbi ti mû angbonga wala ayenga mingi tongana a sala ni na mbeni lege nde. Tongana a sala na kua na lege ni, a yeke mû maboko.
3 A yeke vo ngoi biani?: Na mbeni mbage, zo alingbi ti wara pëpe agbakuru tongaso sân ti futa nginza, na a yeke hunda nga ngoi mingi na lo. A hunda peut-être angbonga mingi ti manda kode ti hunda ordinateur ti sala ambeni kusala. Na ndo ni, mbeni zo so aye tene ti ordinateur mingi alingbi ti mû gbâ ti ngoi ndali ni, ngoi so a lingbi fade ti sala na mbeni nzoni ye nde. A lingbi e duti na nzoni bango ndo, na girisango pëpe kpengba-ndia so asigigi na yâ gbotongo mê ti bazengele Paul, so atene na aChrétien ti tambela ‘tongana azo ti ndara, ti zia l’heure ti ala ahon senge pëpe’.—Bâ 1 aCor. 7:31.
4 Ambeni ita so ayeke na anzoni bibe aleke aprogramme ti ordinateur ti bata na adossier ti kongregation. Biani, a yeke na zo oko oko ti bâ tongana nyen lo yeke sala kusala na ordinateur ti lo. Ye oko, a lingbi a bata na yâ ordinateur pëpe adossier ti kongregation so a leke afiche ndali ni, teti amolenge wala ambeni zo nde so a mû lege na ala pëpe alingbi ti bâ ni. A lingbi a zia adossier ti kongregation kue (compte, afiche ti aWafango tënë ti Kongregation, na ambeni ye nde) na yâ ti aformulaire so société aleke, na a lingbi abata pëpe na ndo ordinateur aye so a sû na ndo ti aformulaire so. Na lege so, fade a yeke bata adossier ti kongregation, so ambeni zo ayeke na droit ti bâ ni pëpe.
5 A lingbi asurveillant so ayeke na kungba agbu li ti ala nzoni kozoni ti mû adevoir ti Ekole ti Kusala ti aChrétien, na ti leke programme ti Bungbi ti Kusala. A yeke nzoni ala hinga atënë so a lingbi a fa na yâ mbage ti adevoir oko oko. Na tapande, na ekole, ambeni devoir ayeke dä so a yeke a-élève kue pëpe si a lingbi ti sala ni. A lingbi aita so ayeke na kungba agirisa pëpe nda ti devoir ni, akode ti ita so aga ti sala ni, nga mara ti devoir wa si ayeke. A lingbi a zia pëpe na ordinateur ti soro aita ni.
6 Ambeni zo ayeke leke adevoir na ala zia ni na ndo so azo so ayeke na ordinateur alingbi ti mû ti sala na kusala. Me a lingbi mbeni ita so a mû na lo devoir ti sala na abungbi ti kongregation atene pëpe so lo lingbi ti vo ngoi tongana lo sala kusala na adevoir so mbeni zo nde aleke ni, na mbilimbili tongana lo hinga lê ti zo ni pëpe. A-Chrétien so ayeke na kungba atene pëpe so ala yeke na mbeni diskur wala mbeni bungbi nde ti leke, ti tene na pekoni ala zia ni na mbeni ndo so azo so ayeke na ordinateur alingbi ti mû ti sala na kusala. Nde na so, ita oko oko alingbi ti sala nzoni kusala na ordinateur nga na Bibliothèque de la Société Watchtower na ndo CD-ROM, si lo lingbi gi nda ti ambeni tënë hio na yâ kete ngoi so lo yeke na ni.
7 Ahon ti sala mbeni copie wala ti kangbi na popo ti aita aprogramme ti ordinateur, amolongo ti ambeti nga na ambeni mbeti so andu ni, wala ti leke na ti kangbi adevoir ti Bungbi ti Kusala na ti Ekole ti Kusala ti aChrétien na lege ti ordinateur wala na ambeni lege nde, a yeke lakue nzoni mingi ahon teti aita ti leke adevoir ti ala mveni na bingo bê na ndo abezoin ti kongregation ti ala (1 Tim. 4:13, 15). A lingbi a sala kusala lâ oko pëpe na aye so andu kongregation, ti wara na nginza.
8 Me ti mû aversê so ayeke na yâ Tour ti Ba Ndo wala Mandango Buku ti Kongregation, ti gboto ni na ndo mbeni lembeti nde na lege ti ordinateur, na ti kangbi ni na aita ayeke tongana nyen? Biani, a yeke peut-être nzoni ahon tongana aita asû akete tënë na yâ Bible ti ala mveni nga na ndo ambeti so a yeke manda. Na ngoi ti abungbi, salango kusala na ordinateur ti gboto na ndo lembeti tënë ti yâ ti aversê ti mbeni publication me so a fa tënë ti yâ ni pëpe alingbi ti lungula nzara ti gi ni na yâ Bible mveni. Biani, gingo aversê na ngoi ti mandango Bible wala na bungbi ti kongregation ayeke mbeni mbage ti lekengo e nzoni, na a mû maboko na e nzoni ti sala kuâ mbilimbili na Bible na yâ fango tënë. Mingi ni, tongana biani aversê ni ayo mingi, a yeke nzoni ti diko ni na yâ Bible, mbilimbili na ngoi so a hunda na azo kue ti diko ni legeoko na yâ Bible ti ala.
9 Ambeni sioni gbanda nde: Tongana ti so a fa na lembeti 15 ti Tour ti Ba Ndo ti lango oko ti nze ti janvier 1994, tingbingo ordinateur ti e na a-ordinateur so ayeke kangbi asango alingbi ti ga na akota kpale na lege ti yingo. Legeoko tongana ti so mbeni zo ti sioni bê alingbi ti yôro mbeni programme (virus) so aleke ti buba ambeti kue so a bata na yâ ti mbeni ordinateur, a-apostat, amokonzi ti lege ti vorongo, wala azo so agi ti buba nzoni tambela ti amba ti ala wala ti buba mbeni ye nde, alingbi ti yôro asioni bibe na yâ ti asango so a-ordinateur ayeke kangbi. A yeke nzoni a bâ ndo mbilimbili na ndo mara ti asango tongaso, atâa so a leke ni “gi teti aT.J”. A lingbi a zi lege ni gi na awakua be-ta-zo ti Jéhovah so aga biazo awe. Tongaso pëpe, a lingbi ti zia aita na gbele ngangu ti “asioni kamarade” (1 aCor. 15:33). Société awara ambeti so asala tënë ti aye so a di iri ni “réseaux privés” so ambeni zo asala na kusala, pëpe gi ti pika patara senge senge na ndo atënë ti yingo, me nga ti mû asioni wango, ti tene peko ti akpere-kpere nga na asango ti wataka, ti lu asioni bibe na yâ ti ambeni zo, ti sala si azo akomanse ti hunda atënë na ti dë kite, ye kue so a sala si mabe ti ambeni abuba, na ti fa na azo gbungo nda ti Bible, so alondo tâ gi na bê ti ala mveni. Na bango ni kozo, a lingbi ti tene so asango ni anzere na alingbi ti fa ye na zo. Me ti tâ tënë ni, a honde aye so alingbi ti sala sioni na zo. A-Chrétien ayeke bi lê na mbage ti ‘ngbâa be-ta-zo na ti ndara’ ti wara kobe ti yingo, nga na gbungo nda ti atënë nzoni mingi ahon, so aga na ngoi so alingbi (Bâ Tour ti Ba Ndo ti lango oko ti nze ti novembre 1994, alembeti 9 ti si na 11). Chrétien oko oko ayeke na kota kungba ti bata mabe ti lo yongoro na aye kue so alingbi ti sala ngangu na ndo ni. Na ti sala ni nzoni, a lingbi lo hinga mbilimbili zo wa ayeke na peko ti aye so kue.—Mat. 24:45-47; 2 Jean 10, 11.
10 Oko article ti Tour ti Ba Ndo ni agboto lê na ndo nene ti kpe andia so abata ye so a sigigi na ni. Mingi ti andokua so aleke na akä a-ordinateur ayeke zia na tele ni andia so abata ye ti ala. Ala yeke mû mbeni mbeti so azi lege na mbeni zo ti duti na gbakuru ni, na a fa tongana nyen a lingbi ti sala kusala na aprogramme ni na lege so ndia ayeda na ni. Mingi ni, mbeti so azi lege na mbeni zo ti duti na gbakuru ni atene so a lingbi lo sala acopie ti programme ni ti mû na ambeni zo pëpe. Biani, na ndo sese kue, andia so abata akungba afa so tongana mbeni zo asala tongaso, a yeke nzi. Azo mingi so ayeke na kota bê ti wara ye ayeke na mbito pëpe ti doro ndia. Me ti aChrétien, a lingbi ala bata yingo-ti-hinga ti ala na mbage ti atënë so andu ndia, na mungo ye ti César na César (Mat. 22:21; aRom. 13:1).—Bâ Atënë so azo ahunda na yâ Tour ti Ba Ndo ti lango oko ti nze ti mars 2001, lembeti 31.
11 Tongana ambeni kota ndokua ti dengo buze aga ti kä a-ordinateur, ala yeke zia aprogramme nga na ambeti so amû lege na zo ti duti na ni biaku na yâ a-ordinateur ni. Ye oko, ambeni ndo ti kango a-ordinateur ayeke mû pëpe ambeti tongaso, teti aprogramme so ala zia na yâ ti a-ordinateur ni kozo ti kä ni ayeda na ndia pëpe, so ti tene zo so avo ni adoro nga ndia tongana lo sala kusala na aprogramme so. Na ndo tënë so, tongana aChrétien asi na gbele mbeni ye so ndia abata ni, a lingbi ala yôro ni pëpe na mbeni ndo so azo so ayeke na ordinateur alingbi ti bâ ni, wala a lingbi ala kamata ni pëpe (na tapande ambeti ti Société). Tënë ni andu nga aprogramme so ambeni zo asala copie ni sân ti hunda amveni.—aHéb. 13:18.
12 A lingbi a haka kpengba kua so a lingbi ti sala na mbeni masini, na aye ti sioni so a lingbi ti si tongana a sala kusala na ni. Legeoko tongana ti so a lingbi ti sala nzoni kusala na singale, asioni ngangu so a yeke sala na ndo azo laso apusu azo ti sese kue ti gi bê mingi. Akamba so atingbi a-ordinateur amû ndo ti sese kue, na a lingbi ti mû anzoni sango na zo, atâa na kodoro wala na ndo ti kusala. A yeke mû maboko mingi na ando ti dengo buze, abungbi nde nde, nga na azo so aye lakue ti hinga atënë na ndo ambeni ye ti ala mveni wala aye ti dengo buze, na ngoi ti laso so aye kue ayeke gue na loro mingi. Na oko ngoi ni, akpale tongana tënë ti bungbingo ti koli na wali, aye so a tene ti kangbi popo ti azo, nga na anzene nzene sango na ndo mbilimbili lege ti sala ambeni kusala ti sioni, ayeke buba bungbi ti a-ordinateur mingi.
13 Tongaso, anda ti tënë ayeke dä so ngbanga ni, a lingbi Chrétien aduti na nzoni bango ndo na ndo salango kusala na a-ordinateur. Azo mingi awara aye ti nzoni na salango kusala na Bibliothèque de la Société Watchtower na ndo CD-ROM, ye so a mû lege na ala ti gi nda ti aye nzoni. Atâa so e hinga kpengba kua so mbeni gbakuru alingbi ti sala, a lingbi zo so aye ti sala nzoni kusala na ni asala hange, si lo lingbi bata tele ti lo mveni nga ambeni zo yongoro na asioni mbage ti agbakuru tongaso. A lingbi e zia aye na ndo so alingbi, tongaso si même nzoni salango kusala na agbakuru ti kua amû gbâ ti ngoi ti e senge senge pëpe, wala a gboto e yongoro pëpe na kozo kusala nga na ye so e zia na gbele e.—Mat. 6:22; 28:19, 20.