Azo alingbi ti hunzi nzinga?

AZO kutu mingi akono sân ti hinga ye so ayeke nzinga. Lâ oko pëpe, ala lango na nzara wala ala lango na yâ ti dê. Ye oko, mingi ti azo so ayeke bâ mawa ti awanzinga na ala sala ngangu mingi ti mû maboko na ala.

Me, nzinga ayeke tâ mbeni ngangu kpale teti azo so bira, angu so asuku mingi, hulengo ndo na ambeni kpale atï na ndo ti ala. Aye so ayeke mbeni tënë ti kota gingo bê teti azo ti Afrika so afâ yaka ti wara gi na kobe ti yanga ti ala. Ambeni azia ndo ti ala na ngangu ti gue na yâ mbeni kota gbata, wala ti ga aréfugié na mbeni kodoro wande. Ambeni zo ti akete kodoro amû lege ti akota gbata ngbanga ti so nzara ti duti na nzoni fini agboto ala.

Mingi ni, agbata so azo asi singo dä aga mbeni ndo so nzinga ayeke maï dä. A yeke tâ même ngangu ti wara kete place ti lu kobe na ndo ni. Warango kua ayeke lakue ngangu. Teti ala gi ye ti sala gbä, azo mingi amû kua ti bingo kpale. Azo so ayeke lango na yâ ti agbata tongaso ayeke dekongo ti hunda maboko, me angorogbia ayeke na ngangu pëpe ti leke kpale ti guengo na li ni ti yere. Na bingo lê na ndo mbeni tondo ti Bendo ti Gigi ti nze ti novembre 2003, mbeni mbeti-sango (The Independent) ti Londres atene: “Nzara na ndo sese angbâ ti gue gi na li ni. Na lege ti adikongo ye, a bâ so azo kutu 842 laso ayeke te kobe nzoni oko pëpe (na ye ni angbâ ti gue gi na li ni), so a zia na ndo ni azo kutu oku ngu oko oko.”

Filiale ti aTémoin ti Jéhovah na Afrika ti Mbongo ayeke wara ngoi na ngoi ambeti so awayere atokua. Na tapande, mbeni koli na gbata ti Bloemfontein atokua mbeti so: “Mbi yeke na kua pëpe, na mbi yeke nzi lakue tongana lege azi na mbi. Tongana mbi sala ni pëpe, andâ e duti na nzara teti alango mingi, sân ti sala tënë ti ngangu dê so ayeke sala e. Warango kua aga tâ ngangu. Azo mingi ayeke tambela na bê ti lege ti gi kua nga na mbeni ye ti tengo ni. Mbi hinga ambeni so ague ti gi kobe na ndo so a yeke tuku asaleté dä. Ambeni nga afâ tele ti ala. Legeoko tongana mbi, bê ti amba ti mbi mingi anze kue, na beku oko ayeke dä pëpe. Na bango aye ni, beku teti kekereke ayeke dä pëpe. Nzapa so asala e na nzara ti te ye na ti yü bongo, lo yeke bâ aye so pëpe?”

Akiringo tënë ti dengo bê na ndo agingo bê ti koli so ayeke dä. Tongana ti so article ti peko ayeke fa, a wara akiringo tënë so na yâ Tënë ti Nzapa, Bible.