Nzo tënë teti azo ti amara kue

“Fade i ga atémoin ti Mbi . . . juska na nda ti sese kue.”​—KUSALA 1:8.

ANZONI wafango ye ayeke bi bê ti ala gi pëpe na ye so ala yeke tene na a-élève ti ala, me nga na lege so ala yeke tene ni. Teti so e yeke awafango tâ tënë ti Bible, e yeke sala nga tongaso. E yeke bi bê na aye use so kue: tokua so e yeke fa nga na akode so e yeke sala na kusala. Tokua ti e, nzo tënë ti Royaume ti Nzapa, agbian pëpe, me e yeke gbian yâ ti akode ti e ti lingbi na aye so asi. Ndali ti nyen? Ti tene e fa ni na azo mingi tongana lege ayeke dä.

² Na gbiango yâ ti akode ti fango tënë ti e, e yeke mû tapande ti awakua ti Nzapa ti ândö. Bâ gi tapande ti bazengele Paul. Lo tene: “Na popo ti aJuif, mbi ga tongana Juif . . . na popo ti ala so ayeke na Ndia pëpe, mbi ga tongana zo so ayeke na Ndia pëpe . . . Na popo ti azo ti ngangu pëpe, mbi ga tongana zo ti ngangu pëpe, si mbi lingbi wara azo ti ngangu pëpe. Mbi ga ye kue na popo ti azo kue, si na lege ti ye so kue, mbi lingbi sö ambeni zo.” (1 aCorinthien 9:19-23). Paul awara lani aye ti nzoni mingi na gbiango yâ ti fango ye ti lo ti lingbi na dutingo ti zo oko oko. E nga e yeke wara ande aye ti nzoni mingi tongana, na nzobe, e gbian yâ ti afango ye ti e ti lingbi na dutingo ti azo so e yeke sala tënë na ala.

Na “nda ti sese kue”

³ Mbeni kota kpale so azo ti fango nzo tënë ayeke tingbi na ni ayeke konongo ti territoire ni: “sese so kue”. (Matthieu 24:14). Na yâ ti angu 100 so ahon, awakua mingi ti Jéhovah asala kua ngangu ti kangbi nzo tënë na afini kodoro. Ye so asala si mbeni pendere guengo na li ni so adö bê abâ gigi na ndo sese kue. Na tongo nda ti ngu 1900, a fa tënë lani na yâ ti akodoro mingi pëpe, me laso aTémoin ti Jéhovah ayeke fa tënë na wâ na yâ ti akodoro 235! Biani, a yeke fa nzo tënë ti Royaume même na “nda ti sese kue”.​—Esaïe 45:22.

⁴ Aye wa si ayeke na gunda ti guengo na li ni so? Gbâ ti aye. Amissionnaire so a leke ala na lege ti Galaad, Ekole ti fango Bible ti Société Watchtower, nga, ade ti ninga mingi pëpe, azo ahon 20 000 so awara kota mbeti ti ala ti Ekole ti Formation Ministérielle asala mbeni kota ye na yâ guengo na li ni so. Ambeni zo ni nga ayeke aTémoin mingi so na nginza ti ala mveni ague na akodoro so a hunda ti wara awafango tënë ti Royaume dä mingi. Mara ti bibe ti gbanzingo ye na tele ti aChrétien so (akoli na awali, amaseka na ambakoro, akumbamba na azo so asala mariage) asala mbeni kota ye mingi na yâ fango tokua ti Royaume na ndo sese kue (Psaume 110:3; aRomain 10:18). A bâ ala tâ na nene ni mingi. Bâ ye so ambeni filiale asû na ndo ala so alondo na kodoro wande si ayeke sala kusala na yâ territoire ti filiale ni so bezoin ayeke dä mingi.

⁵ “A-Témoin so e ye ala mingi ayeke mû li ni na fango tënë na ando so kongregation ayeke dä pëpe, ala yeke mû maboko ti sigigi na afini kongregation nga na yâ guengo na li ni na lege ti yingo ti aita-koli na aita-wali ti ndo ni.” (Équateur). “Tongana a tene aita ti kodoro wande so asala kusala ge ahon, ye so ayeke sala ande ye na ndo nzoni dutingo ti akongregation. A yeke mbeni deba nzoni ti wara ala na popo ti e.” (République Dominicaine). “Na yâ mingi ti akongregation ti e, aita-wali ayeke mingi, na ambeni ngoi tongana mo mû azo 100, azo 70 ayeke aita-wali (Psaume 68:12). Mingi ti aita-wali ti ndo ni so aga na yâ tâ tënë ade ti ninga pëpe, me aita-wali pionnier so ayeke nga akumbamba so alondo na akodoro wande ayeke mû maboko mingi na yâ lekengo afini ita-wali so. Aita-wali ti kodoro wande so ayeke tâ mbeni matabisi teti e!” (Mbeni kodoro na Poto ti Tö). Mo gbu li mbeni lâ awe na ndo salango kusala na mbeni kodoro nde?a​—Kusala 16:9, 10.

“Azo bale-oko ti yanga nde nde kue”

⁶ Mbeni kota kpale ni nga ayeke ayanga ti kodoro ndenge na ndenge so azo ayeke tene ni na ndo sese. Tënë ti Nzapa afa kozoni: “Na lâ ni kâ, fade azo bale-oko ti yanga nde nde kue ti amara, ala gbu sakatumbo ti zo so ayeke Juif, ala tene, Fade e gue na mo, teti e mä so Nzapa ayeke na i.” (Zacharie 8:23). Na yâ gango tâ tënë ti prophétie ni laso, azo bale-oko so aduti fä ti azo mingi so asi singo, so a sala tënë ti ala na Apocalypse 7:9. Ye oko, bâ so na lege ti prophétie ti Zacharie, “azo bale-oko” so ayeke londo gi pëpe na popo ti amara kue, me nga na popo ti azo ti ‘yanga nde nde kue ti amara’. E bâ awe gango tâ tënë ti kpengba nzene nzene tënë so ti prophétie ni? Biani, e bâ ni.

⁷ Bâ aye so. A sala fadeso ngu 50 awe, a sala lani ambeti ti e na ayanga ti kodoro 90. Laso, wungo so ague na li ni ti hon 400. “Ngbâa be-ta-zo na ti ndara” asala kue ti sigigi na ambeti même na ambeni yanga ti kodoro so gi mbeni kete wungo ti azo si ayeke tene ni (Matthieu 24:45, NW ). Na tapande, ambeti ti Nzapa ayeke sigigi fadeso na yanga ti Groenlandais (so azo 47 000 si atene ni), yanga ti Palau (so azo 15 000 si atene ni) nga na yanga ti Yap (so azo ti tenengo ni asi nga 7 000 pëpe).

“Kota lege” so azi teti ambeni fini kusala

⁸ Ye oko, laso e yeke pëpe na bezoin ti gue na kodoro wande ti fa nzo tënë na azo ti ayanga kue. Na yâ ti angu so ahon ade ti ninga pëpe, guengo ti azo kutu mingi nga na ti aréfugié na yâ ti akodoro so amaï mingi na lege ti tënë ti nginza asala si gbâ ti azo so ayeke tënë ayanga ti kodoro mingi ayeke kâ. Na tapande, na Paris, France, azo ayeke tene ayanga ti kodoro ndulu na 100 tongaso. Na Toronto, Canada, wungo ni ayeke 125; na Londres, Angleterre, a yeke tene ayanga ti kodoro wande ahon 300! Gango ti azo ti kodoro wande na yâ ti aterritoire ti akongregation mingi azi mbeni “kota lege” teti afini kusala ti fango nzo tënë na azo ti amara kue.​—1 aCorinthien 16:9.

⁹ A-Témoin saki mingi ahon ndo ti kota kpale so na mandango mbeni yanga ti kodoro nde. Ti mingi ti ala, mandango yanga ti kodoro ni ayeke kete ye pëpe; ye oko kota ngangu so ala sala, peko ni angbâ senge pëpe. Ala wara kota ngia na mungo maboko na awande nga na aréfugié so asala kodoro kâ ti manda tâ tënë ti Bible. Na mbeni ngu so ahon ade ti ninga pëpe, na popo ti azo kue so a batize ala na akota bungbi ti district na mbeni kodoro ti Poto ti Do, azo 40 na ndo ti azo 100 alondo na mbeni kodoro wande.

¹⁰ Tâ tënë, mingi ti e ayeke pëpe na yâ dutingo so amû lege na ala ti manda mbeni yanga ti kodoro wande. Atâa so kue, e lingbi ti mû maboko na awande so asala kodoro na e na salango kusala nzoni na mbeni fini brochure so asigigi: Une bonne nouvelle pour des gens de toutes nations,b so a yeke wara na yâ ni pendere tënë ti Bible na ayanga ti kodoro mingi (Jean 4:37). Mo yeke sala kua na brochure so na fango tënë?

Tongana azo ake ti mä nzo tënë ni

¹¹ Teti so ngangu ti Satan na ndo azo ayeke gue na li ni na yâ sese so, mbeni kpale so e yeke tingbi na ni mingi ayeke so na yâ ti ambeni territoire gi mbeni kete wungo ti azo si ayeke mä e. Biani, salango ye so adö bê ti e pëpe, ngbanga ti so Jésus atene kozoni awe so mara ti ye tongaso ayeke duti dä. Na salango tënë ti ngoi ti e, lo tene: “Fade ndoye ti azo mingi aga dê.” (Matthieu 24:12). Ti tâ tënë ni, mango na bê na Nzapa nga bango Bible na nene ni akiri na peko ngangu na popo ti azo mingi (2 Pierre 3:3, 4). Ye so asala si na ambeni mbage ti sese, gi mbeni kete wungo ti azo si ayeke ga afini disciple ti Christ. Ye oko, ye so aye pëpe ti tene so angangu kusala so aita ti e ti koli na ti wali so angbâ lakue be-ta-zo ti fa tënë na yâ ti aterritoire so azo ayeke mä ala nzoni pëpe ayeke gi senge senge (aHébreu 6:10). Ngbanga ti nyen? Bâ atënë so.

¹² Évangile ti Matthieu aluti na ndo akota ye use so kusala ti e ti fango tënë andu ni. Oko ni ayeke so e yeke “fa tënë na amara kue si ala ga adisciple”. (Matthieu 28:19). Use ni ayeke so tënë ti Royaume ayeke tongana “tënë ti témoin”. (Matthieu 24:14). Aye use so kue ayeke kota ye, me use ni so la ayeke kota mingi. Ngbanga ti nyen?

¹³ Matthieu, mbeni oko ti azo so asû Bible, atene so abazengele ahunda Jésus: “Fade fä ti singo ti Mo, na ti nda ti ngoi so, ayeke nyen?” (Matthieu 24:3). Ti kiri tënë, Jésus atene so mbeni kota mbage ti fä ni ayeke duti kusala ti fango tënë na ndo sese kue. Ge, lo sala tënë ti salango adisciple? Oko pëpe. Nde na so, lo tene: ‘Fade a fa Tene-nzoni so ti royaume na sese so kue teti tënë ti témoin na amara kue.’ (Matthieu 24:14). Na lege so, Jésus afa atene fango tënë ti Royaume si ayeke duti mbeni kota mbage ti fä ni.

¹⁴ Tongaso, tongana e yeke fa nzo tënë ti Royaume, e dabe ti e so atâa tongana e yeke wara nzoni lakue pëpe na salango adisciple, e yeke sala nzoni mingi na fango “tënë ti témoin”. Atâa azo amä e wala ala mä e pëpe, ala hinga awe ye so e yeke sala, na tongaso e yeke mû mbage ti e na gango tâ tënë ti prophétie ti Jésus (Esaïe 52:7; Apocalypse 14:6, 7). Jordy, mbeni Témoin ti Poto ti Do so ade maseka, atene: “Ti hinga so Jéhovah ayeke sala kusala na mbi na yâ gango tâ tënë ti Matthieu 24:14 asala si mbi yeke na ngia mingi.” (2 aCorinthien 2:15-17). Kite ayeke pëpe so mo kue mo bâ ye ni tongaso.

Tongana a kanga lege na tënë so e yeke fa

¹⁵ Kangango lege alingbi ti duti mbeni kpale ndali ti kusala ti fango nzo tënë ti Royaume. Jésus agboto mê ti adisciple ti lo kozoni: “Fade amara kue ake i ngbanga ti iri ti Mbi.” (Matthieu 24:9). Legeoko tongana ti so a sala na akozo Chrétien, laso azo ake adisciple ti Jésus, ala kanga lege na ala nga ala sala ngangu na ala (Kusala 5:17, 18, 40; 2 Timothée 3:12; Apocalypse 12:12, 17). Na yâ ti ambeni kodoro, ngorogbia akanga lege na ala na ndembe so. Ye oko, teti so ala ye ti mä yanga ti Nzapa, atâ Chrétien so ayeke na yâ ti akodoro so angbâ ti fa nzo tënë ti Royaume (Amos 3:8; Kusala 5:29; 1 Pierre 2:21). Ye nyen amû lege na ala, nga na tanga ti aTémoin ti ndo lê sese kue, ti sala tongaso? Jéhovah amû ngangu na ala na lege ti yingo vulu ti lo.​—Zacharie 4:6; aEphésien 3:16; 2 Timothée 4:17.

¹⁶ Jésus agboto lê na ndo kota kamba so ayeke na popo ti yingo ti Nzapa na kusala ti fango tënë tongana lo tene na adisciple ti lo: ‘Fade i wara ngangu tongana Yingo Vulu aga na ndo i; na fade i ga atémoin ti Mbi . . . juska na nda ti sese kue.’ (Kusala 1:8; Apocalypse 22:17). Molongo ti aye ni na yâ versê so ayeke kota ye mingi. Kozoni, adisciple awara yingo vulu, na pekoni ala mû kua ti fango tënë na ndo sese kue. A yeke gi na lege ti mungo maboko ti yingo ti Nzapa si ala yeke wara ngangu ti kanga bê na yâ fango “tënë ti témoin na amara kue”. (Matthieu 24:13, 14; Esaïe 61:1, 2). Tongaso, a yeke tâ na lege ni so Jésus asala tënë ti yingo vulu tongana “Consolateur”, wala wamungo maboko (Jean 15:26). Lo tene so yingo ti Nzapa ayeke fa ye nga ayeke fa lege na adisciple ti lo.​—Jean 14:16, 26; 16:13.

¹⁷ Na alege wa yingo ti Nzapa ayeke mû maboko na e laso tongana e tingbi na sioni kengo ndo ndali ti fango nzo tënë? Yingo ti Nzapa ayeke mû ngangu na e, nga lo yeke ke ala so asala ngangu na e. Ti fa mbeni tapande ni, zia e bâ mbeni ye so asi na yâ fini ti Gbia Saül.

Yingo ti Nzapa aga wato ti lo

¹⁸ Saül ato nda ni nzoni mingi tongana kozo gbia ti Israël, me na pekoni lo ke yanga ti Jéhovah (1 Samuel 10:1, 24; 11:14, 15; 15:17-23). Ni la yingo ti Nzapa amû maboko na gbia so mbeni pëpe. Ngonzo agbu Saül na lo fa ngonzo so na salango ngangu na David, so a sa mafuta na li ti lo ti duti ande gbia, nga so na ngoi ni kâ lo yeke wara lani mungo maboko ti yingo ti Nzapa (1 Samuel 16:1, 13, 14). David akpa mbeni zo so fango lo aso pëpe, teti biani, ye so lo gbu na maboko ti lo ayeke gi harpe, me Saül ayeke ti lo na likongo. Ni la, mbeni lâ tongana David ayeke pika harpe ni ti he na bia, “Saül abi likongo so, lo tene na bê ti lo, Fade mbi pika lo ti bungbi lo na [mur] ti da. Me David akpe lo lege use.” (1 Samuel 18:10, 11). Na pekoni, Saül amä molenge ti lo Jonathan, kamarade ti David, na lo deba, lo tene: “L’Eternel ayeke! fade mbi fâ David pëpe.” Ye oko, na mbeni ngoi nde, “Saül aye ti pika David ti bungbi lo na [mur] ti da na likongo ti lo; me David akpe, na likongo akpo da senge.” Tongaso, David akpe ague yongoro, me Saül atomba peko ti lo. Na yâ ti ngoi ti ngangu so, yingo ti Nzapa aga wato ti Saül. Na lege wa?​—1 Samuel 19:6, 10.

¹⁹ David akpe ague na ndo ti prophète Samuel, me Saül atokua azo ti gbu lo. Ye oko, tongana ala si na ndo so David ahonde tele ti lo dä, “Yingo ti Nzapa azu na ndo awakua ti Saül, na ala fa tënë na iri ti Nzapa.” Teti so yingo ti Nzapa asala ngangu mingi na ndo ti ala, li ti ala agirisa na tokua ni biani. Lege ota so Saül atokua azo ti gbu David ti kiri na lo, gi oko mara ti ye ni so la akiri asi. Na nda ni, Gbia Saül mveni ague na peko ti David, me lo nga kue lo lingbi lani pëpe ti luti na gbele ngangu so yingo ti Nzapa asala na ndo ti lo. Biani, yingo vulu asala si lo ngbâ place oko “na lâ ni so na bï ni so kue”, ti tene David awara ngoi nzoni ti kpe.​—1 Samuel 19:20-24.

²⁰ A yeke wara na yâ mbaï so ti Saül na David mbeni ye ti manda so ayeke mû ngangu na zo: ala so ayeke sala ngangu na awakua ti Nzapa alingbi pëpe ti sö benda tongana yingo ti lo atiri na ala (Psaume 46:12; 125:2). Jéhovah aleke lani ti tene David aga gbia na ndo Israël kue. Atâa lo yeke na ngangu tongana nyen, mbeni zo oko alingbi ti gbian tënë so pëpe. Ti ngoi ti e, Jéhovah aleke na bê ti lo awe so ‘fade a fa Tene-nzoni so ti royaume’. Zo oko pëpe alingbi ti kanga lege na kusala so.​—Kusala 5:40, 42.

²¹ Ambeni mokonzi-nzapa na azo ti poroso amû mvene nga même ye ti ngangu ti tara ti kanga lege na e ti gue na li ni. Ye oko, legeoko tongana ti so Jéhovah abata ândö David na lege ti yingo, lo yeke bata ande azo ti lo nga laso (Malachie 3:6). Ni la, legeoko tongana David, e yeke tene na bê kue: “Mbi zia bê ti mbi na Nzapa, fade mbito asala mbi pëpe; zo alingbi sala nyen na mbi?” (Psaume 56:12; 121:1-8; aRomain 8:31). Na maboko so Jéhovah ayeke mû, zia e leke na bê ti e ti ngbâ ti luti na lê ti akpale na ngoi so e yeke sala kusala so Nzapa amû na e, so ayeke ti fa nzo tënë ti Royaume na azo ti amara kue.

[Akete tënë na gbe ni]

Mo lingbi ti dabe mo na ni?

• Ngbanga ti nyen e yeke gbian yâ ti akode ti e ti fango tënë?

• “Kota lege” azi teti ambeni fini kusala wa?

• Ye wa kusala ti e ti fango tënë ayeke sala, même na yâ ti aterritoire so azo ayeke mä e nzoni pëpe?

• Ngbanga ti nyen mbeni wato alingbi pëpe ti kanga lege na fango nzo tënë ti Royaume?

[Ahundango tënë ti manda na ye]

1. E so e yeke awafango Bible, e yeke bi bê na aye wa, nga ndali ti nyen?

2. Na gbiango yâ ti akode ti fango tënë ti e, e yeke mû tapande ti azo wa?

3. (a) Kpale wa e yeke tingbi na ni na fango tënë? (b) Tongana nyen atënë ti Esaïe 45:22 ayeke ga tâ tënë laso?

4, 5. (a) Azo wa asala kusala mingi si nzo tënë amû ndo? (b) Ambeni filiale atene nyen na ndo ti aita ti akodoro wande so ayeke sala kusala na yâ territoire ti ala?

6. Tongana nyen Zacharie 8:23 agboto lê na ndo kpale ti ayanga ti kodoro na yâ fango tënë?

7. Aye wa afa so nzo tënë asi na azo so alondo na popo ti azo ti “yanga nde nde kue”?

8, 9. Guengo na li ni ti ye wa azi mbeni “kota lege” na e? Na aTémoin saki mingi asala nyen?

10. Tongana nyen mo sala kua na brochure Une bonne nouvelle pour des gens de toutes nations? (Bâ “Ambeni ye na yâ brochure Une bonne nouvelle pour des gens de toutes nations”, na lembeti 26.)

11. Mbeni kpale so e yeke tingbi na ni na yâ ti ambeni territoire ayeke so wa?

12. Aye use so kusala ti e ti fango tënë andu ni ayeke so wa?

13, 14. (a) Mbeni kota mbage ti fä ti singo ti Christ ayeke nyen? (b) Tongana e yeke fa tënë na yâ ti mbeni territoire so azo ayeke mä e mingi pëpe, a lingbi e dabe ti e na nyen?

15. (a) Jésus agboto mê ti adisciple ti lo kozoni na ndo ti nyen? (b) Nyen la ayeke mû lege na e ti ngbâ ti fa tënë atâa a kanga lege na e?

16. Tongana nyen Jésus afa kamba so ayeke na popo ti kusala ti fango tënë na yingo ti Nzapa?

17. Tongana e tingbi na sioni kengo ndo, tongana nyen yingo vulu ayeke mû maboko na e?

18. (a) Kozo, Saül ayeke nzoni; me na pekoni lo wara tâ sioni bibe wa? (b) Akode wa Saül asala na kua ti sala ngangu na David?

19. Tongana nyen yingo ti Nzapa abata David?

20. E lingbi ti manda nyen na ndo mbaï ti ye ti ngangu so Saül asala na David?

21. (a) Ambeni wato ti e ti laso ayeke sala ye tongana nyen? (b) E yeke na beku na nyen?

[Encadré na lembeti 22]

A sala si ala yeke na ngia mingi

“Ala yeke na ngia nga ala ye kusala so ala kue abungbi oko ti sala ni ndali ti Jéhovah.” Tënë so alingbi na mbeni sewa so azia Espagne ti gue na Bolivie. Mbeni oko ti amolenge ti koli ti sewa ni ague lani kâ ti mû maboko na mbeni groupe. Kota ngia so lo wara andu bê ti babâ na mama ti lo. Ni la kete na pekoni, sewa ni kue, so na yâ ni amolenge ti koli osio so ngu ti ala alondo na 14 ti si na 25, ague ti sala kusala kâ. Fadeso, amolenge ni ota ayeke apionnier, nga ade ti ninga pëpe lo so lo mû kua ti pionnier ni kozo ague na Ekole ti Formation Ministérielle.

Angelica ayeke mbeni ita-wali ti ngu 30. Lo londo na Canada na lo yeke sala kusala na Poto ti Tö. Lo tene: “Akpale ayeke mingi, me mungo maboko na azo na lege ti fango tënë asala si mbi wara ngia. Mbeni ye so andu nga bê ti mbi ayeke aTémoin ti ndo ni so fani mingi ala yeke kiri singila mingi na mbi ndali ti so mbi ga ti mû maboko na ala.”

Ambeni ita-wali use so ayeke tomba ngu 30 alondo ti ala na Amerika, na ala yeke sala kusala na République Dominicaine. Ala tene: “Angobo ti salango ye mingi ayeke lani dä so a hunda na e ti leke dutingo ti e ti lingbi na ni. Ye oko, e ngbâ lakue na yâ kusala ti e, na fadeso azo mbasambala na popo ti ala so e yeke manda Bible na ala ayeke ga na bungbi.” Aita-wali use so asala kota kusala na yâ sigingo na mbeni groupe ti awafango tënë ti Royaume na yâ ti mbeni gbata so kongregation ayeke dä pëpe.

Laura, mbeni ita-wali so ayeke tomba ngu 30, ayeke sala kusala na kodoro wande ahon ngu osio awe. Lo tene: “Mbi mveni mbi leke ti duti na mbeni fini so aye mingi ayeke dä pëpe. Ye so amû maboko na awafango tënë ti bâ so ti duti na mbeni gigi so aye mingi ayeke dä pëpe ayeke mbeni ye so zo mveni ayeke soro nga a yeke salango ye na lege ti ndara, me pëpe ngbanga ti so mo yeke zo ti mawa. Ti duti zo so alingbi ti mû maboko na amba ti lo, mbilimbili na amaseka, amû ngia na mbi mingi nga akanga dû ti akpale ti salango kusala na kodoro wande. Mbi yeke changé kusala ti mbi pëpe na mbeni mara ti fini nde, nga mbi yeke ngbâ ande dä lakue tongana Jéhovah ayeda.”

[Encadré/Foto na lembeti 26]

Ambeni ye na yâ brochure Une bonne nouvelle pour des gens de toutes nations

A yeke wara na yâ brochure Une bonne nouvelle pour des gens de toutes nations mbeni tënë na ndo lembeti oko so a sala ni na ayanga ti kodoro 92. A sû tënë ni na mbeni lege so mo bâ mo tene mo mveni si mo yeke sala tënë. Na tongana zo so mo yeke fa tënë na lo adiko ni, a yeke mo bâ mo tene mo la mo yeke sala lisoro na lo.

Carte ti sese ayeke na ndo akozo lembeti ti mbage ti yâ ni. Sala kusala na karte so si mango tele aduti na popo ti mo na zo so mo yeke fa tënë na lo. Peut-être mo lingbi ti fa na lê ni kodoro so mo yeke dä, nga hunda na lo ti fa na mo ndo so lo londo dä. Na lege so, mo lingbi ti sala si lo sala tënë nga si ye ni ayapu.

Akozo tënë ti brochure ni afa aye nde nde so e lingbi ti sala ti fa tënë nzoni na ala so atene mbeni yanga ti kodoro so e mä ni pëpe. Diko aye so nzoni na leke biani na bê ti mo ti sala kusala na ni.

Lembeti ota nga na osio afa gi pëpe iri ti ayanga ti kodoro ni, me a zia nga na tele ti ayanga ti kodoro oko oko afä so mo yeke hinga na ni (na tapande, ti yanga ti Sango ayeke SG). Mbage so ayeke mû maboko na mo ti hinga a-oko fä ni so a zia na tele ti atract nga na ambeni mbeti ti e so ayeke na ayanga ti kodoro nde.

[Foto na lembeti 26]

Mo yeke sala kusala na brochure so na fango tënë?

[Afoto na lembeti 23]

Ambeti ti e ayeke fadeso na ayanga ti kodoro 400

GHANA

LAPONIE (SUÈDE)

PHILIPPINES

[Afoto na lembeti 24]

Mo lingbi ti sala kusala na mbeni ndo so ahunda awafango tënë ti Royaume dä mingi?

ÉQUATEUR

RÉPUBLIQUE DOMINICAINE